霸戲哥之日常#469｜ 鬼佬版《搵鬼陪你瞓》

Netflix會唔會搞錯咗，突然彈出notification推薦霸戲哥睇探靈真人騷《探靈28天》（28 Days Haunted），明明豬視妹先鍾意睇呢類鬼怪嘢。Anyway，見佢簡介講到懶恐怖咁，即管睇吓鬼佬版《搵鬼陪你瞓》又有咩特別。

節目採用一貫真人騷節目拍攝手法，來自五湖四海嘅靈探隊，個個聲稱身懷絕技，靈體學家、高靈人士、靈媒、甚至消防員都有，連探靈架餐都係hi-tech嘢，絕對唔係烏合之眾。佢哋要分成三小隊，分別探索三大猛鬼地點，任務就係要喺入面捱過28日。與世隔絕28日與鬼為鄰，仲慘過住竹篙灣囉！

但點解要係28日呢？原來係根據殿堂級已故探靈專家華倫夫婦（Ed and Lorraine Warren）嘅理論，話只要用28日時間，就可以打開靈體宇宙嘅大門。華倫夫婦大家都熟悉啦，成個The Conjuring Universe都係以佢哋著作同事蹟為藍本。

霸戲哥成日都講，先撩者賤打死無怨，陰陽兩界從來河水不犯井水，正常應互相尊重，雖然話就話為咗節目效果，都冇理由第一日就去挑釁啲靈界朋友囉！結果下場係點？諗都諗到啦！

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。