霸戲哥之日常#468｜ 星級盛宴

無綫聽日起推出全新飲食節目《黃金盛宴》，由久違TVB嘅馬浚偉擔任主持，亦係TVB台慶55周年嘅重點節目。

叫得「黃金」咁巴閉，梗係唔會好似一般飲食節目咁教吓煮餸咁簡單，而係邀請咗歷年極具代表性嘅飲食節目主持上陣，好似《阿爺廚房》嘅李家鼎、《煮場爭霸》嘅保哥、《食平D》嘅肥媽、《煒哥的味道》嘅陳煒咁，分別用佢哋嘅風格去炮製唔同菜式，被選中嘅菜式就會成為「黃金盛宴」嘅菜單。

霸戲哥成日喺度諗，咁多飲食節目，點先知邊個星廚最把炮？係唔係要搞番個類似《食神》入面嘅大廚烹飪比賽呢？結果TVB節目團隊又真係諗到，雖然未必係比賽模式，但星廚之間應該有較量，自然唔會揸流攤。

至於負責試菜嘅「食家」，都一樣係黃金配搭，除咗曾志偉、謝寧同周中師傅，仲有出名嘴刁嘅蔡瀾，唔少得嘅當然仲有《食神》評判家燕姐啦！

好期待家燕姐不留情面咁批評啲星廚嘅廚藝。

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。