霸戲哥之日常#467｜ 巴黎聖母院

2019年嘅4月15日，大家仲記唔記得做緊乜？相信好多人都同霸戲哥一樣，眼光光咁望住BBC個live，見住熊熊烈火將歷史古蹟巴黎聖母院個屋頂燒成灰燼，而你坐喺電腦前乜都做唔到，心都噏埋。

巴黎聖母院算係法國最具象徵性嘅地標之一，每年有成千萬遊客嚟觀光。巴黎聖母院
建於1163年至1250年間，係天主教巴黎總教區嘅主教座堂，歷代總統同重要人物嘅葬禮都喺呢度舉行，入面亦擺放咗無數珍貴嘅文物，所以呢場大火令全球人類同聲一哭，尤其法國人更加接受唔到，甚至產生創傷後遺症。

Netflix最近有齣影集《聖母院浴火重生記》上架，故事背景設定喺聖母院發生火災當晚，除咗重現消防隊竭力撲火嘅情景，亦側寫入性如何經歷重重考驗，真正浴火重生嘅，其實係人性嘅光輝。

火災後，法國總統馬克龍隨即宣佈啟動修復工程，全球多名富翁亦有捐款協助修復。預計2024年完成重建，趕及喺2024年巴黎奧運會前完工。

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。