霸戲哥之日常#466｜ 反骨琪

要數TVB台慶劇《美麗戰場》最具話題性人物，如果話係蔣家旻飾演嘅「反骨琪」，相信應該冇乜爭議。印象中，都好耐冇試過有電視角色，好似「反骨琪」咁乞人憎，絕對係前面憎到後面嗰隻，無論你係男定女，都想大把大把扯埋去，唔會手軟。

霸戲哥借啲意問豬視妹，咁「反骨琪」有咩惡行啫？點知豬視妹幾大反應，咬牙切齒咁數佢罪狀：「嘩，迫死繼父、設計陷害家姐、差啲累佢畀人姦，仲唔夠衰？」好似畀「反骨琪」殺全家咁。

原來連維基都有反骨琪嘅24字真言簡介：「為人貪錢，見利忘義，吃裏扒外，工（攻）於心計，心狠手辣，草菅人命。」衰到咁，相信都可以名留電視史。

當然，設計「反骨琪」呢個角色嘅「MK活地亞倫」葉念琛係功不可沒，但冇蔣家旻嘅出色演繹，就唔能夠成就到呢個角色。霸戲哥從來都認為呢啲咁嘅角色最蝦人演，因為衰到咁好易被定形，第日想翻身演番正派角色都好難，不過蔣家旻冇計較之餘，仲好似幾enjoy咁，真係抵佢上位。

下星期《美麗戰場》結局篇，留名睇「反骨琪」展開大報復。

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。