霸戲哥之日常#465｜ 鱷魚先生

Netflix最近有套真人騷節目《野鱷之境》（Wild Croc Territory），好鬼過癮。節目主人翁Matt Wright係專業捕鱷師，成個真人騷就係圍繞佢同屋企人嘅日常生活，當接到「order」，就會拖齊架餐開工，附咗有捕鱷嘅網同陷阱，仲要出動直升機、船同越野車，真係超級大陣丈。

唔止咁，Matt每次執行任務都會勞師動眾，而佢嘅團隊亦分工分得好仔細，有mission planner、有直升機機師等，始終捕鱷都有一定程度嘅危險，準備充足都係唔想有任差池啫。睇到Matt團隊「懶認真」咁去同大鱷鬥智鬥力，當中亦有唔少驚險鏡頭，真係睇到腎上腺素飆升。

講到捕鱷師，大眾最有印象一定係「鱷魚先生」Steve Irwin，霸戲哥細細個就睇《The Crocodile Hunter》啦。鱷魚先生一生同鱷魚搏鬥無數，點估到會鬥唔贏條魔鬼魚，2006年佢拍紀錄片《海中最致命生物》，畀魔鬼魚拮中心臟慘死，真係好可惜。

大家有所不知，我家大爺雞都好鍾意鱷魚，不過係N年前老麥買開心樂園餐換嘅綠色公仔。還好有鱷魚公仔喺度，先分散到大爺雞注意力，唔係邊嚟寫得到呢篇文呀！

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。