霸戲哥之日常#480｜ 藍天

TVB最近搞咗個全民投票選舉「我揀我想睇」，結果得票最高係《男親女愛》，嚟緊11月7號會喺深夜重播，眾望所歸。

呢套劇都勾起霸戲哥唔少回憶，當年首播嗰陣仲住緊hall，夜晚時段係「預留」咗畀同hallmate 打機（AOE、Diablo），打到天昏地暗，世界發生咩事都唔理。唯獨播出《藍天》主題曲，我哋先肯放低個mouse，捕住喺部12吋老爺電視機前，睇變態Miss Mo點蹧質余樂天。

嘟姐同黃子華呢對鬥氣冤家形象鮮明，但霸戲哥欣賞係，佢準確展示咗當代女權至上嘅意識形態。Miss Mo就係千禧過後典型嘅事業女性，霸道、潑辣、事業心重，同埋缺乏愛情滋潤，嗰種渴望被愛又口硬崇尚單身主義嘅矛盾，形成佢哋力爭上游嘅原動力，同埋激活變態潛能嘅催化劑。

後來霸戲哥出嚟做嘢，先後遇到幾個呢類型女上司，日日搵霸戲哥出氣，當時心諗都唔知係咪冧霸戲哥。依家諗番起都一額汗！

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。