霸戲哥之日常#485｜ 動態屍煞

朋友S係超級喪屍片迷，有次無聊傾開偈，話有一輪冇睇過喪屍片，感覺好唔自在。霸戲哥溫提佢之前Ｎ記咪有套《生化危機》影集，結果換嚟一個嗤之以鼻嘅反應。

不過，今日上畫嘅《屍煞32》或者可以幫朋友S頂一頂喪屍癮。套戲由《The Silent House》導演Gustavo Hernandez執導，佢話唔想套套喪屍片都係食人腦咁例牌，就諗咗個幾有趣嘅設定，就係喪屍每次攻擊後要停頓32秒，而呢段「黃金32秒」，就成為咗生還者可以exploit嘅bug。

話就話唔「例牌」，但解釋點解有喪屍出現，依然係最老土嘅神秘病毒喺烏拉圭爆發。主角Iris帶住女兒誤闖喪屍出沒之地，然後一場沒完沒了嘅困獸鬥生死追逐戰就此展開。

如果有32秒時間對付喪屍，大家又會點利用？拿拿聲逃跑，定係諗辦法KO佢哋？相信呢個亦係主角要好好思考嘅問題。唔知主角最終選擇動態清零，定與喪屍共存？

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。