霸戲哥之日常#486｜ 天氣反常

大家有冇經歷過11月掛八號波？如果有，閣下至少都50歲。翻查資料，對上一次11月掛八號波已經係1972年嘅事。風球「尼格」比一般八號波弱好多，搞到捕喺杏花邨班追風族好冇癮，亦有唔少人質疑天文台「為掛而掛」，但呢幾年天氣反常，已經係鐵一般嘅事實。

千祈唔好睇少氣候變化，大家都應該聽過蝴蝶效應，細微嘅動作足以造成極大嘅連鎖影響，甚至帶來無可挽回嘅毀滅。

Netflix最近有套紀錄片《地球風暴》，幾值得大家花時間睇睇。分成四集嘅紀錄片，探討四種不同大自然災害，分別係龍捲風（Tornadoes）、火山爆發（Volcanic Eruptions）、地震（Earthquakes）同埋颶風（Hurricanes）。除咗畫面震撼，人類同大自然嘅關係，亦值得我哋去反思。

就以龍捲風嗰集為例，原來全美國每年大約有1200宗龍捲風個案，而因為全球暖化問題持續，令龍捲風個案不斷上升。而好明顯，全球暖化嘅主因就係人為因素。

人類對大自然嘅剝削同破壞，只會帶來更多天災橫禍，最終都會禍延到我哋嘅下一代。

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。