霸戲哥之日常#479｜ Halloween

噚晚大家都玩得盡興嘛？霸戲哥自問老啦，留喺屋企睇場英超都瞌眼瞓，點似得老死B咁一晚踩幾場！香港人好鍾意慶祝萬聖節，多得周邊嘅商業活動帶起啦。記得以前讀U，就只有「正日」（10月31日）有得玩，住嗰間宿舍每年都會搞Halloween Ball，畀晒機會我哋約女仔。只可惜霸戲哥黑仔，頭兩年都抽中死籤要扮鬼，final year索性唔參加⋯⋯

所謂嘅「正日」，應該叫萬聖夜，或萬聖節前夕，英文Halloween其實係嚟自Hallow’s Eve嘅縮寫。只係大家叫慣咗萬聖節，最後撈到亂晒籠啫。

萬聖節除咗傳統嘅Trick or Treat討糖，西方亦流行「練膽大法」——熄燈睇恐怖片。坊間咁多套史上最恐怖電影，但「恐怖」從來冇一個標準，亦冇單位去量度。但近日有班無聊友做咗個比較科學啲嘅研究，推算邊齣電影先至係史上最恐怖。

方法係咁：先喺電影網站、討論區揀出50套「公認」係史上最恐怖電影，然後搵班素人做測試，佢哋分別綁住心跳儀，然後睇片，將睇片時嘅心跳同平時心跳相減，再得出平均值。原理同《賭俠1999》劉華喺大佬B手指度裝個探測器差唔多。

結果史上最恐怖電影係《邪靈》（Sinister），緊隨其後係《兒凶》（Insidious）、《詭屋驚凶實錄》（The Conjuring）同埋《祖孽》（Hereditary）。唔知今晩大家又想唔想試吓Halloween練膽大法？

霸戲哥

** 博客文章文責自負,不代表本公司立場 **

今個星期有鄭伊健同周家怡主演嘅《深宵閃避球》上畫，睇吓有冇機會食住港產片個勢，延續票房神話。

故事以較冷門嘅「閃避球」為題材，講述周家怡扮演嘅外展社工，一直鼓勵一班夜歸問題少女，深宵參與閃避球運動，仲聘請咗伊健做coach，報名參加全港閃避球錦標賽。

閃避球即係Dodgeball，喺外國都幾hit，但港人對佢認知唔多，霸戲哥童年就更少之有少。第一次認識閃避球，應該係細個玩任天堂紅白機嘅時候，當時《熱血高校》好hit，遊戲公司乘勢推出咗個《熱血躲避球》game。記得霸戲哥一放學就去同學屋企玩，玩玩吓仲嚟真搵排球堅掟，搞到得罪唔少同學仔。後來電腦又推出咗隻類似嘅game，好似叫《爆笑躲避球》，角色變晒三國人物，仲識出絕招，唔知年長一輩嘅讀者有冇玩過呢？

講番套戲，雖然話係喜劇，但睇得出導演有啲message想講，霸戲哥最鍾意預告句tag —「喺邊度跌低，就要喺邊度再跌低。」同《一秒拳王》嘅 「避唔到，就捱」一脈相承噃。

相信港人一定有feel。