人大政協兩會繼續開，今日到總理李克強在全國人大會議上發表政府工作報告，新聞界見他在報告內有提「一國兩制」，但無提「港人治港」，就議論阿爺治港方針係唔係有變。
我話阿爺治港方針政策無變，但態度明顯變得強硬咗，中央港澳工作協調小組組長張德江昨日已講到更堅的「高度自治不等如完全自治」，相比之下，李總理份報告反而好平淡啦，但這亦不代表兩個常委對香港的態度有差別，只不過李總理個報告講全國問題，對港澳著墨極其有限，而張德江專門論述香港問題，可以說清說透。阿爺的態度夾埋透視出一個「硬」字，而呢個硬字主要針對佔中而來。阿爺覺得你出硬招，佢自然不可以還軟招。
你可能覺得阿爺係唔係反應大得滯? 佔中三子都好溫和啫，強調佔中係和平、理性、非暴力，警察一抬人就俾佢抬走，無嘢呀? 你知北方好多研究員來香港研究研究，我也引述過佔中策劃人的「和平理性非暴力」主張，但北方來客就哈哈大笑，問我點知佔中三子能控制局面? 佢地搞咗一大班人出來，叫得出來叫唔番走，搞出流血事件點算，搞出暴力事件點計? 誰保證香港佔中時不會變成埃及、利比亞、烏克蘭，成為一發不可收拾的街頭暴亂，推翻政府? 呢啲問題我當然答唔到，我都真係擔心佔中策劃人都未必答得到喎。
阿爺怕會爆大鑊，就高規格回應，講衰啲好似黑社會劈友，既然你向我下戰書，我就吹雞班馬赴會，本來好多人入會只為做飲茶灌水的會員，點知而家都要揸刀上陣。有人問做乜李家傑咁激呀，咁隊鍾庭耀，啱唔啱數呀? 我就話呢啲只係枝節，唔係大局，要睇清楚個局。或者李家傑俾人吹雞叫出來，佢未必敢真正去劈友，所以攞把餐刀，揀個最無殺傷力的劈下去，交吓功課都話唔定。揀鍾庭耀好過揀泛民，無咁驚嘛。
見到阿爺排個咁樣的陣，就知道佢絕對不會少看今年秋季呢場風波，人大政協兩會都唔係真正劈友，只係怕自己友身體唔健康要真打時唔打得，所以叫大家落場踼吓波熱吓身先，等到今年秋天才來真的。我有少少擔心，大家玩到咁大，呢個局都幾難善罷啦。
盧永雄
每年人大、政協開會，都好似例菜一樣，委員們去北京吹吹水，食餐飯，就走過場，但今年的情況似乎不一樣。
張德江
中央港澳工作協調小組組長張德江和港澳政協委員會面時，發言都幾強硬，話香港特區的高度自治是由中央授予的，高度自治不是完全自治，中央授權後不管或不能管是錯的，中央對香港仍有監管權。又話現在已進入關鍵時期，呼籲港人要一齊努力，抵制任何違反基本法的行為、抵制搞亂香港的行為。
阿爺除了立場強硬，亦開始對建制派提出要求，政協主席俞正聲話，政協要提升「履職能力」。中聯辦副主任殷曉靜講得更白，話最近叫200個香港政協委員去珠海開會，結果只有50幾人出席，言下之意係話「你班逃學威龍都唔係路!」正如有內地官員私下話，好多人香港人做人大、政協，又要威水，又要抽水，會又唔想開，嘢又唔想做，咁樣點得架?
老實講，過去建制派一盤散沙，即使一年一度去北京開兩會大會，開會當聚會，隨時夜晚的活動仲精彩過日間的會議。更加唔好講建制派經常鬼打鬼，搶位爭功，你插我，我插你。如今反對派擺明車馬要佔中，雖然話民調話市民支持佔中的只有25%，反對的有57%(明報民調)，支持佔中者未算太多，但阿爺仍然視之為主要挑戰，擔心反對派一發動佔中後，局面就不受控制，所以要大力提高回應規格，全力反撲。
阿爺擺出一個姿態，要捉番走散咗的建制派團隊，將啲逃學威龍捉番埋嚟，叫佢地一齊打硬仗。
盧永雄
