9月立法會選舉臨近，不止直選熱鬧，連功能團體都有戲睇，不少過去無競爭的界別都有人爭，例如自2004年以來的都是自動當選的「地產及建造界」，該界別議員石禮謙一直坐定粒六，但今屆可能遇上挑戰。
政圈盛傳華光航業集團董事長趙世光之子、酷愛武術的趙式慶，將會參選。石禮謙接受《星島》查詢時笑指，自己已是老人家，可能要退下來讓路給年輕人。但他指趙式慶是他世侄，自己也認識對方，並大讚︰「這個後生仔好好」。不過他着記者不要相信謠言，「到佢真係交表先算」。
趙式慶高大威猛，但為人向來低調無從政，過往接受訪問，都係講武術居多。反而他的堂兄弟趙式浩，即趙世曾的兒子，早前就加入了自由黨。但自由黨主席鍾國斌就指，趙式慶不是他們黨員，即使他有意參選，都是對方自發，與他們無關。
不過傳聞石禮謙所屬的經民聯，卻認定趙式慶若然參選，背後有自由黨支持。趙式慶幕後支持者是誰，又係另一單羅生門故事。
無論如何，自由黨唔妥經民聯，人所共知，因為當日在「煲呔曾」當特首的年代，經民聯的核心班底，就是從自由黨分裂出去。
自由黨已擺明車馬炮要搶商界一議席，佢會派山頂區議員陳浩濂出戰呢個總商會界別，直撼經民聯現任議員林健鋒。今次選舉即使是功能組別，都會鬥得相當激烈。
Ariel
** 博客文章文責自負,不代表本公司立場 **
前金融服務界立法會議員詹培忠，今日正式宣布參加9月立法會直選 ，佢選了港島區參賽，話參選的主要原因， 是政府與議會都未有監督好梁振英在特首任內收取UGL5000萬 元酬金的事。
政壇八卦友話，早前魔童王維基宣布參選(好大機會也在港島出賽) ，亦都係以換特首為政綱，如今又來多一個金勞詹，呢個 ABC 集團(Anybody But CY)又添一員，都好人強馬壯喎。
對於 ABC集團咁人頭湧湧，政圈有兩種理論，第一個理論複雜啲， 是認為有倒CY勢力在幕後發功，四圍人鼓勵人以「倒CY」 的名義參加立法會直選，借此在阿爺對未來特首拍板前，壯大「倒 CY」的聲勢。
第二個理論簡單一點，而家「倒CY」有市場， 所以一眾有野心想選但地區實力不足者，就以「倒CY」做政綱， 企圖博大霧入局。
講番金勞詹參選都豪過人，佢為咗表明自己本次參與直選「 不為名利、並無私心」，就展示上星期五在澳門賭場贏得977萬元 的信件，以證明自己大把水，參選不為搵錢。 他認為如果出選功能組別，肯定會贏，不過自己住在港島， 想與市民更多地接觸，所以在港島參選。
金勞詹自認親中，話目前港島區預料將有20張名單爭6席， 佢相信不支持建制派和泛民的選民會支持自己， 對票源和勝算有信心，不會考慮與其他候選人的選票重疊， 亦不認為會拉走他人的票源。
至於是否擔心會被人勸退，金勞詹話，目前身體狀況良好， 可以承受任何壓力，又話自己「坐監、cancer(癌症)、 政治中毒」呢三樣男人最衰的事情都試過， 而且已經不是第一次做議員，所以不怕被爆黑材料抹黑咁話。
