我哋啲大人好無聊，成日問小朋友「你大個想做乜嘢呀?」這一類「我的志願」問題，小朋友、大朋友通常都無甚諗法，都是求求其其答。但我有個老友個仔真係精警，這個10歲的小朋友有個好明確的答案，話:「我要做個二世祖」。
唔係講笑，真人真事，是10年前的事。我呢個老友是成功的專業人士，是幾百萬年薪的黃金打工仔，大公司CEO，但佢距離做富豪仲有好遠，自己未算富豪，但個仔想做二世祖，CEO老友理解當時十歲左右的阿仔諗法是這樣:「老豆，你唔好對我有咁多要求啦，不如要求吓你自己，你努力啲，做咗富豪，我咪唔使做囉!」我當時反應是啼笑皆非，笑稱「你個仔的志願都幾宏大喎。」
10年一晃眼就過去了，小朋友去了加拿大多倫多唸大學，早前放假回港，爸爸和他來見我一面，嘩，小朋友真是長大了，變成大朋友，而且是貨真價實的，300磅的大朋友。
我見他的狀態，就話「大朋友你咁款點樣溝女呀?」點知他這樣答:「Uncle你唔使同我擔心，我溝死女架!」我心諗你300磅一隻豬咁款都溝死女，對他說「願聞其詳喎?」他說:「我同所有人講我爸是大陸富豪，我是二世祖，去親飲食都搶住找數，啲女就自動埋嚟架啦!」
聽完我眼都突埋，也為那個CEO老友難過，10年過去他沒有變富豪，當然佢仍然收緊幾百萬年薪，可以過好好的生活，但個仔咁點算呢? CEO老友有退休的一天，佢個仔呢個大朋友都有讀完書的一天，咁呢個「二世祖」夢幾時完呢?
談完天食完飯，到尾段我同大朋友講，「你咁肥唔健康，溝女都唔方便啦，點解唔減肥?」大朋友好輕挑咁騎騎笑:「唓我唔減啫，要減半年減100磅都得啦!」我見大朋友信口開河，就話:「如果你半年後返來，減肥減到坐得落我架蓮花跑車，我免費俾架跑車你揸一年，不過如果你減唔到，就要成個暑假去我那裏做暑期義工，你制唔制?」大朋友諗咗一諗，拜拜走人，無心接受挑戰。
佢爸爸我老友50幾歲，鋼條身型，日日運動，自律甚嚴，點解個仔會搞成咁，會想做二世祖? 最後只能講句，二世祖是爸媽練成的!
黃毅力
黃毅力
** 博客文章文責自負,不代表本公司立場 **
3日前，我在馬來西亞一級方程式的賽道上練習，為了試車及準備月尾來臨的比賽。整個過程尚算順利，當然亦有不少瑣碎的困難，但總算一一迎刃而解。
就如在回港前的一個晚上，我計劃將部分的汽車配件帶回香港，當所有行李都包好之後，竟發現我的負重量超標20kg！計計數，20kg即等如二千元港幣，唯有在酒店內左包右砌，左挑右選，希望減少負重，也減低成本，好等自己可以輕身回港，這是一種概念。最終，一執就是兩個小時，行李輕不了多少之餘，更因此而擔憂得整晚睡不安寧，心在想：真係大鑊！咁就花多咗二千蚊！因為這些概念，變成了一種困擾，是很影響心情的。
等二天的清晨，我拖著超重的行李與疲倦的身軀去到機場的櫃面辦理登機手續，拿了銀包出來，打算慷慨解囊，準備乖乖付上額外二千大元的行李超重費用。這時，友善的地勤男職員望一望我，看到了我手上的頭盔，便問：「你是不是來賽車的？」
我點頭一笑，接著，將重重的行李放到輸送帶上量重。低頭一看，已經是48kg。正當我從銀包掏出更多「罰款」之際，那位男職員竟向我遞上登機證與行李標籤帶，並再送上一句：「好好享受旅程！」
我呆了一呆，問：「我的行李超重了，不用付錢嗎？」
他説：「你已被upgrade了到『Premium Economy』，不用額外付錢了。」
就是遇上這位人員與環境的改變，我簡直覺得行了個大運，白白慳回了二千多元！
心在想：原來有時人太多計劃與準備，可能反而矯枉過正；太多計算、太多計較，變成擁有更多的負累，甚至焦慮所產生出來的概念，其實就是雜念。既然要做的事始終都要做，要準備的工作還是要準備，不能逃避，也不能偷工減料，有時活在當下，去到最後，只需隨遇而安，既然任何結果都會決定你的腳步，那麼焦慮過多也無補於事。
現在回頭看看，左搬右搬打算讓行李輕一點點，不想付太多的附加費，現在結果卻是一毛錢也不用多付，得到的啟示就是：人，特別是能幹的人，在很多事情上都喜歡自尋煩惱。那是種種雜念，牽引我們的情緒，心境就不能安靜、安心。其實只要盡了自己的責任，做好了該做的準備，就放鬆心情，一切交由時間與環境去決定結果吧！這樣，人才會活得快樂，也活得自在。
為了慶祝慳回二千多元，我在機場吃了一份馬來西亞地道的咖咉與咖啡當早餐，並邊吃邊寫下這篇文章，以作今次事件的總結，感謝這次所遇上的好人好事。
黃毅力
