轉戰內地五年的傅穎(Theresa)宣告回歸，跟傳聞中包養她的「富婆」Andi合組製作公司，頭炮推出廣東新歌《最好是你》，另外今年再戰書展推出新書《長成自己喜歡的模樣》，Theresa接受《頭條日報》訪問時話「好嘔心瀝血咁寫咗4萬字」，當中提到處於人生谷底時，事業愛情盡失的感受，尤以講到「前度」對她事業發展及人生的影響時更一字一淚。提到舊愛，傅穎不屑重提「前度」名字，更坦言同前度拍拖：「係我人生一個污點。」
Teresa提到現任男友即時笑晒，佢仲話適當時候就會公開。
入行14年，31歲的傅穎長期是非纏身，11年更驚爆被舊愛羅仲謙暴打，「受害人」出聲反被公司放逐到內地發展，羅仲謙則有得留低繼續受重用。「被離開」去北京發展呢段「療傷期」所有經歷是第八本書的好題材，書中也有一篇「關於前任」文章，傅穎用了「分手後不再是朋友」、「不堪回首」、「謝當年不娶之恩」為題抒發情感，坦言是人生最難過的時候。
說到這場「噩夢」，Theresa仍然帶點不忿：「當時由感情引發出其他問題，唔係誤會，係被扭曲！嗰段時間飽受輿論壓力，真係講乜都冇用，最慘係受委屈都要硬撐，呢啲委屈係一世，唔係用時間就可以淡忘，有時出街食飯被人指指點點，佢講嘅嘢依然停留喺誤解入面，我個心仲『梗住梗住』，隔咗咁多年，感情當然係放低咗，但有啲結係唔會解得開嘅。」
傅穎11年自爆被羅仲謙毆打分手，但當時經理人公司為保上位中的羅仲謙不惜將傅穎雪藏，女方由原告慘變被告。
經一事，長一智，Theresa上咗人生寶貴一課，教曉她帶眼識男仔：「每次拍拖都會學精咗，至少前度嘅行為一定唔會發生喺現任身上。」傅穎大讚年紀細他3年的內地男友好到不得了，究竟有幾好？她即甜笑說：「哈！點講呢？真係唔識講喎，不論性格同脾氣佢為我改變咗好多，我諗每個女仔都有少女心，好想做女王，對住男朋友會變得細路女，佢喺各方面都好包容我，好識得o氹我，每次我哋嘈交佢一定係o氹返我嗰個，不過我冇公主病呀。」言下之意，現階段係咪人生最開心嘅時候呢？Theresa繼續笑：「都OK開心嘅，活在當下嘛，人生咁長，喺感情路上遇到挫折係好正常，最重要之後有合適嘅人陪伴自己，暫時我仲未有結婚生B打算。」
網上圖片
