政事
9月立法會選舉臨近，各方爭住出位，港島區直選戰情競爭，港視主席王維基日前打住「踢走689」的旗號宣佈參選，但佢踢唔踢得特首走就唔知，肯定好有機會搶走新民黨葉劉淑儀、 公民黨陳淑莊同民主黨的票。
公民黨陳淑莊今日正式宣佈參選，鬧的不是建制派，而是不點名向王維基發炮，佢問台下支持者，「 一個同意訂立廿三條、支持葉劉做特首、認為踢走689便足夠、更支持袋住先政改方案的候選人，係咪我哋民主派嘅人？」
陳淑莊呼籲選民要看清楚一個人的政綱、過去和品性，不要讓人混淆視聽。佢又指難以定奪王維基屬於建制還是泛民，相信選民不會滿足於只是換走梁振英，而是希望建立民主制度。
政壇高人話，選舉就係如此殘酷，泛民和建制派各有基本捧場客，打風都唔走。所以選舉時泛民同泛民爭，建制同建制爭。好似魔童王維基打住「反對689」的旗號，有少少似泛民， 背景又唔基層，都可能搶走公民黨的客，無怪乎陳淑莊打魔童落力過打建制派了。.
Ariel
** 博客文章文責自負,不代表本公司立場 **
立法會主席曾鈺成日日在報紙專欄出謎語，諷刺特首CY，佢今日仲話「自己性格適合做特首」，睇嚟都到亮劍搶位的時候。
曾主席接受now新聞台訪問，被問及外界傳聞他與特首CY不和，佢強調自己是「百分之百支持行政長官同特區政府施政」。 講到在專欄諷刺抽水，佢笑言「最緊要好玩」， 又說能抽水的都抽了，亦會「自己嘅水都會抽下」。
就下屆特首選舉，曾鈺成相信會有多名參選人競逐，被問到他否參選，曾主席笑着重申「拭目以待」，但指自己性格適合當特首，因為特首必定要與各方面，包括中央政府及香港社會不同背景、不同主張的人，都有相當好的溝通途徑，自己亦做到以上條件。
政壇八卦友話，過去曾主席面對這類問題，多數笑往講唔選，又話「 答乜你都唔信」，如今變成「拭目以待」，又話「 自己性格適合當特首」，都算新鮮啦。
八卦友話，曾主席早前引述不知名的「京官」話下屆特首不再欽點， 呢個講法好出位。八卦友話唔信無欽點，但曾主席咁講，北京好難否認，唔通跳出來話自己有欽點咩。 如今曾主席又話自己適合做特首，難道佢想一等立法會休會，就瞓身出戰？
