維基公關成功 官場失分

維基導演的港視風雲演咗四日有少少降溫，今日尾場上演重遊舊地入亞視，出席《對酒當歌》節目，一度被外界以為佢入亞視談收購，結果發現又是美麗的誤會。

市民希望港視可以啟播，讓觀眾多一個選擇，而家問題係維基自己想唔想用流動電視加互聯網電視方式去播。由本周二維基宣布押後開台開始，他已成功在市民大眾心中把事件定性為「政府唔俾我播」事件，從這個意義上來說，維基的公關十分成功，至於真相如何已不太重要，這也是他想要的公關效果，等如話「件事衰咗唔關我事架」。

但係成件事最令人意外的是專業官員竟然有如此強烈的反應，用200%的超猛火力，反駁維基哥。昨日通訊局官員在吹風會上，簡直金句如雲，例如通訊事務助理總監梁仲賢形容王維基叫政府要求所有大廈天線加裝過濾器，係「 一個人做生意，卻要幾十萬人去配合」。又例如通訊事務副總監劉光祥狠批維基如「只係攞流動小販牌照，但係就想經營私房菜，又唔申請食肆及消防牌照，你仲問點解要拎咁多個牌」。簡直係句句攞命。搞到維基要玩感性，在電台節目中狀似哽咽，話再踩落去恐怕要坐監。

公務員出招咁狠，過往少見，泛民鐘意叫特首做「一男子」，若果你以為是「一男子」指示官員出招，咁你就太睇少官員的自主性啦。若果佢地自己唔慶，同係開個吹風會，都可以講得不慍不火，邊有咁多金句呀。

我去了解一下，發覺官員覺得「好心無好報，被人監生屈」。其實過去明眼人都睇到，在港視發牌事件上，通訊局相當中位，無乜幫政府打王維基，甚至在關鍵時刻有少少同政府唱對台，例如立法會討論緊用唔用特權法查發牌決策時，通訊局仲出聲明話佢哋認為發三個牌對本地廣播業發展有幫助添。而平日對無綫和亞視執法時，主責官員可以話用顯微鏡去睇，令公眾覺得兩個台問題唔少，咁樣客觀上都幫咗港視。至於搞電訊二十幾年的劉光祥，係職業技術官僚，俾人印象政治中立冇咩機心，但今次都動真火。

睇番今次維基出招，在周二的記者會上，口口聲話「sent咗三封信俾通訊局，都答唔到佢用乜技術可以播」。通訊局官員即時反應係「你咁講都得，明明1月24日開會都話晒俾你聽啦，你唔係咁屈我呀嘛?」做高級公務員唔怕俾人鬧，至怕被人屈，覺得「我對你好，你當我草」，其憤怒程度就可想而知了。維基在公務員層面已失晒分。

若果維基真係借機打退堂鼓，唔再搞電視，咁就無乜所謂。若然佢真係會搞電視，將來仲要俾通訊局管，可以想像，佢都唔會有好日子過啦。

盧永雄

特區政府的政改諮詢將於5月初完結，《星島日報》日前引述消息人士透露，中央政府的主流意見認為，特首候選人須獲得提名委員會過半數支持，才能體現提名委員會的「集體意志」。全國人大常委會在八月的會議，將決定提名機制

追查一吓，發現呢單料相當堅，中央的意見就係咁，提委會過半數揀出候選人，可能揀2至4個候選人出賽，意味住泛民主派一直爭取的無篩選提名，唔可能實現啦。

跟住落嚟，就係睇泛民的反應。公民黨立法會議員郭家麒昨日已經出來，指有關方案是「真篩選、假普選」，「如果8月有呢個消息，我地立刻佔中，別無其他辦法」。估計阿爺一旦宣布選特首最終程序，泛民就會發動「佔中」行動。八月「打大交」在所難免。

而家睇番轉頭，政府政改諮詢分兩步，去年開始第一階段諮詢，並無實質，可以話只係一個空諮詢，其實想避過每年一度的7.1遊行。到7.1過後，第二階段政改諮詢開始，先會嚟真料，真命天子的政改方案就會出籠，當中的特首提名程序難免成為焦點。

究竟呢個「亮劍」過程，係由中央出手、還是由特區政府出手? 由中央出手，就係由人大常委會出招; 若由特區出手，就由特區政府在第二階段將屬意的方案當作其中一個方案提出。若由特區政府出手，上街反對的矛頭一定會直指特首CY，若由中央出手，雖然泛民唔會唔鬧CY，但都係主要由中央接招了。睇而家的牌局，係由中央出招，好可能由人大常委會以一個決議形式，羅列中央對政改的意見，當中否定公民提名只是前菜，主菜是講到由提委會過半數揀出特首候選人，意味有篩選的方案會現身。人大常委會在8月和10月都會開會，如今很可能在8月出招。

中央出招後，佔中馬上嚟，亂一亂難免。無怪乎原定9月下旬在香港舉行的亞太區經濟合作組織財長會議突然難產，改在北京舉行。阿爺預咗會有佔中，若然9月照搞 APEC，全世界傳媒集中香港，就更被動啦。我諗無論在攻在守的一方，都唔好預咗今年秋天會好過啦，暑假都唔使放。若然係生意人、投資者，都要預咗有變局呀。

盧永雄