政事
應否在校園講港獨成為熱點，今早港台找了教協會長馮偉華和津貼中學議會主席林日豐同場討論。 後來新聞標題是「教協指教育局企圖將『打壓』包裝為『提醒』」， 唔知以為馮偉華好撐港獨。
港台主持人其中一條標誌性問題，問有17間學校有學生搞本土組織在校內推動港獨，學校應唔應該俾呢啲組織存在？津貼中學議會主席林日豐回答一直遊花園， 避答俾唔俾支持港獨學生組織在校內活動，只係話要同學生溝通。
馮偉華都係避答架啦， 但係講多句話教協一向反對政治組織進入校園活動，當然學校如何處理這些組織也要和學生溝通。
學生愈來愈激，校長、老師處理學生問題都十分小心，所以唔想正面答如何處理學生成立港獨組織的問題，亦可以理解。但馮偉華答得清楚過林日豐，顯示教協都唔敢向港獨一方傾斜。
所以不要俾「教協指教育局企圖將『打壓』包裝為『提醒』」 的標題誤導咗，馮偉華的確有咁講，亦有鬧吳克儉，但馮偉華話要保護老師之餘，就唔敢撐支持港獨的學生啦。
Ariel
** 博客文章文責自負,不代表本公司立場 **
教育局局長吳克儉最近好活躍，首先開腔指港獨違反《基本法》， 破壞一國兩制，不應在校園出現。繼而連番約見教育界， 召見八大校長， 敦促八間政府資助大學防止有人濫用大學平台推動港獨， 又約見家教會，以及校長和老師的組織，動作不斷。
吳克儉開腔後，最引人注目的是中聯辦法律部部長王振民的回應，王振民話，主張港獨的人不可以進入立法會等政權機構， 亦不可以進入中、小學毒害孩子，這是底線原則問題。
王振民又話，談論港獨本來已是涉嫌觸犯香港本地法律，亦違反《 基本法》，政府一直無採取行動禁止他們談論港獨， 社會已是非常寬容。王振民的立場相當強硬， 絕非求其講兩句和稀泥。
有政界人士話，立法會三個星期後就選舉， 但吳克儉在此時挑起這個話題，會否影響建制派的選情？不過高人分析，阿爺似乎不信這一套。 你看吳克儉講完學園要反港獨，今日已啟程往北京， 進行為期兩天的訪問。如果阿爺怕港獨議題影響選舉， 吳克儉為何要此時上京？
特區政府在選舉前硬打港獨，從取消鼓吹港獨參選人資格， 到明言校園不能鼓吹港獨，頗有「驚死你唔知」的感覺。 阿爺不單不怕影響選情，仲要突出支持和反對港獨的候選人， 等選民有得揀。
