烏克蘭局勢慢慢回復平靜，美國同俄國兩大佬已埋枱傾掂。烏克蘭宣佈計劃將駐守克里米亞的軍隊及其家屬撤回烏克蘭，變相承認克里米亞獨立，交換條件係俄羅斯軍隊亦要撤離克里米亞，以及俄國唔好再搞烏克蘭其他地區。
烏克蘭變天，但局勢更形複雜。新政權內部分歧重重，仍然十分脆弱，烏克蘭新政府想加入歐盟，但俄羅斯又豈容北約組織在旁邊虎視眈眈？烏克蘭政治不穩，經濟又低迷不振，要西方國家大量揼水支持，往後局勢充滿暗湧，唔知幾時又再爆鑊。各國在烏克蘭問題上，都抱持謹慎態度。
人民日報的社論日前批評歐美西方至今冷戰思維作祟，與俄羅斯爭奪烏克蘭。使人覺得中國對於烏克蘭事件很不高興，表面看這是親俄表現，但深喉聽聞內幕是烏克蘭變天，對中國的國防工業有重大影響，中國不滿自不待言。
咪睇烏克蘭經濟非常唔掂，但軍火生意卻做得有聲有色，係世界第六大軍火出口商，每年軍火出口額達到了5億5千萬美元。烏克蘭在蘇聯解體時繼承了超過三成的軍火工業裝備，一直以來繼續與俄羅斯合作生產製造軍火，生產技術同俄羅斯差唔多。
此前，中國主要的軍火進口國係俄羅斯。但俄羅斯十分注重保護本國軍工產業的研發能力和智識產權，見中國買咗蘇-27、蘇-30和蘇-33戰鬥機，回國後就照抄可也，大量生產自己嘅J-10、J-11、J-15戰機，俄羅斯自然好唔高興。更重要嘅係俄國唔缺錢，所以做生意好「大鼻」，唔輕易接訂單，中國好多時都買唔到想買的軍火。烏克蘭因為經濟唔掂，人窮志短，有生意做都來者不拒，大小通吃，就此攞到中國唔少訂單，近幾年的中烏軍火貿易關係愈來愈密切。近十幾年，中國每年都幫襯烏克蘭近1億美元的軍火，近年已經成為排在俄羅斯之後的第二大買主。賣俾中國的軍火種類超過30種。中國惟一的破冰船「雪龍號」、「青海湖號」綜合補給艦及航母「遼寧艦」，都係烏克蘭製造。
好多軍事情報都指出，中國在戰機、戰艦及坦克的開發上，仍然未做到百份百中國製造，尤其係製造引擎技術，更係特別落後，要依賴外來供應，烏克蘭係主要的供應國。知情人士話，無咗烏克蘭引擎，中國新型坦克、戰機開唔郁。
今次烏克蘭落入歐美國家之手，預計中國與烏克蘭的軍事協作，以至簡單的軍火貿易，都會受到極大影響，威脅到中國軍工的發展前景，中國可謂無眼睇烏克蘭的局勢咯。
深喉
** 博客文章文責自負,不代表本公司立場 **
美國總統奧巴馬又再會見西藏流亡精神領袖達賴喇嘛，中國外交部又嘈吓，都係果句，提出「嚴正交涉」，可以預期未來中美關係又會凍一陣。
但係深喉就覺得未必會好大件事，正如中國前外長錢其琛話齋：中美關係好唔會好到邊，壞亦唔會壞到邊。國家關係，講到尾都係利益爭奪同實力較量，外交交涉只係門面的一部份。
點解咁講，猶記得去年十一月中國突然宣布設立東海防空識別區，因為包括釣魚島，日本首先提出強烈抗議，美國亦嚴正表示不會承認，齊齊要求中國撤回劃定識別區，仲鬧中國咁搞係挑機，日本就去到好盡，叫晒啲民航航公司唔好理中方要求，經過呢個識別區都唔使事先向中方通報。
後來美國副總統拜登訪華，講到防空識別區就當然唔對嘴型啦，但就係拜登訪華前，白宮發言人突然降調，只係要求中方不執行識別區的規定，但就冇要求撤銷，而且叫啲美國航空公司要向中方通報飛行計劃，搞到日本鬼咁尷尬。
千祈唔好以為美國係為咗拜登見習主席前，費事搞到氣氛太差，先降溫。記住外交面前就係講實力。
話說呢段期間，其實中美軍事來了一場近年罕有的大對抗，結果係咩，咪就係美國決定緊張關係先降吓溫。可能大家有少少印象，在識別區設定後，出現咗幾次美日戰機闖入中方設定的識別區，中國的戰機又起飛追蹤等等的新聞，呢個就係關鍵喇。
當時報道已提及中美戰機在空中互相監察住對方，美軍出動EP-3偵察機，中國則是出動蘇-30、殲-11等主戰機。
美軍EP-3偵察機
呢次中美戰機其實係進行咗一場超強電子對抗，所謂電子對抗，簡單嚟講係干撓到對方戰機的電子功能，同埋睇吓反干撓能力有幾強。據了解，中方的電子干撓能力，超出咗美軍的評估，至少在半個爭議區域對抗時，美方的頻道被堵塞晒，或者係受到強大的干撓，而半個中國劃設的東海識別區空域，美軍的戰機受到干撓，雖然係較弱，但都令美軍有啲跌眼鏡。
電子系統是否完備同抗干撓能力係現代軍事的核心領域，兩、三年前當中國第一艘航母剛成型時，一直都未有戰機可以升降，其實就過唔到電子能力呢關，聞說要在航母有限的空間，控制多架戰機升降的電子系統，而又唔出現互相干撓，中國軍方的技術一直未能過關。
近期中國航母已完成到南海的遠航演習，應該已有一定的突破，加上呢次同美軍的較量，至少證明中國在電子干撓能力上已有一定實力。
所以話，國與國之間的較量，好多都唔係枱面上睇到的事，更多的係背後的較量。
