美國總統奧巴馬又再會見西藏流亡精神領袖達賴喇嘛，中國外交部又嘈吓，都係果句，提出「嚴正交涉」，可以預期未來中美關係又會凍一陣。
但係深喉就覺得未必會好大件事，正如中國前外長錢其琛話齋：中美關係好唔會好到邊，壞亦唔會壞到邊。國家關係，講到尾都係利益爭奪同實力較量，外交交涉只係門面的一部份。
點解咁講，猶記得去年十一月中國突然宣布設立東海防空識別區，因為包括釣魚島，日本首先提出強烈抗議，美國亦嚴正表示不會承認，齊齊要求中國撤回劃定識別區，仲鬧中國咁搞係挑機，日本就去到好盡，叫晒啲民航航公司唔好理中方要求，經過呢個識別區都唔使事先向中方通報。
後來美國副總統拜登訪華，講到防空識別區就當然唔對嘴型啦，但就係拜登訪華前，白宮發言人突然降調，只係要求中方不執行識別區的規定，但就冇要求撤銷，而且叫啲美國航空公司要向中方通報飛行計劃，搞到日本鬼咁尷尬。
千祈唔好以為美國係為咗拜登見習主席前，費事搞到氣氛太差，先降溫。記住外交面前就係講實力。
話說呢段期間，其實中美軍事來了一場近年罕有的大對抗，結果係咩，咪就係美國決定緊張關係先降吓溫。可能大家有少少印象，在識別區設定後，出現咗幾次美日戰機闖入中方設定的識別區，中國的戰機又起飛追蹤等等的新聞，呢個就係關鍵喇。
當時報道已提及中美戰機在空中互相監察住對方，美軍出動EP-3偵察機，中國則是出動蘇-30、殲-11等主戰機。
美軍EP-3偵察機
呢次中美戰機其實係進行咗一場超強電子對抗，所謂電子對抗，簡單嚟講係干撓到對方戰機的電子功能，同埋睇吓反干撓能力有幾強。據了解，中方的電子干撓能力，超出咗美軍的評估，至少在半個爭議區域對抗時，美方的頻道被堵塞晒，或者係受到強大的干撓，而半個中國劃設的東海識別區空域，美軍的戰機受到干撓，雖然係較弱，但都令美軍有啲跌眼鏡。
電子系統是否完備同抗干撓能力係現代軍事的核心領域，兩、三年前當中國第一艘航母剛成型時，一直都未有戰機可以升降，其實就過唔到電子能力呢關，聞說要在航母有限的空間，控制多架戰機升降的電子系統，而又唔出現互相干撓，中國軍方的技術一直未能過關。
近期中國航母已完成到南海的遠航演習，應該已有一定的突破，加上呢次同美軍的較量，至少證明中國在電子干撓能力上已有一定實力。
所以話，國與國之間的較量，好多都唔係枱面上睇到的事，更多的係背後的較量。
深喉
** 博客文章文責自負,不代表本公司立場 **
上星期講到美國炸中國駐南斯拉夫，不是誤炸，而是有意追炸一架美方失落的F117隱形戰機殘骸，今期又有一單秘聞同大家分享，主角都係美國隱形戰機，不過，係無人駕駛的偵察機。
美國這個國際「瞥伯」，最喜刺探別國秘密，無人駕駛偵察機全世界起勢咁飛，人人都知道，但「見」唔到，因為飛機有隱形裝置，好難在雷達上偵察到。
不過，上得山得終遇虎，話說2011年12月4日，伊朗軍方宣稱在伊朗境內繳獲一架有「坎達哈野獸」之稱的美軍RQ-170無人偵察機。美國軍部高層當時唔係好信，因為以伊朗低水平的軍事技術，無理由打得低「坎達哈野獸」，查查電腦，派出去的所有飛機信號正常，就當無事發生。不過，到12月7日收到美國通訊社話消息應該係堅，伊朗軍方將在翌日就事件開記者會。美軍半信半疑，即時調回所有偵察機，發現的確少了一架RQ-170。
伊朗擊落美無人戰機 (6)
12月8日，伊朗電視台公開展示境內聲稱墜毀的美軍RQ-170無人機。畫面顯示，該機外觀沒有嚴重外傷，只見機翼有少少踫損，似自行降落多過被轟落。美軍事後當然唔承認RQ-170係派去伊朗收料，只係話機件失靈，誤飛入伊朗境內。可能係覺得尷尬，美軍對戰機被虜，最終都係不了了之。
伊朗擊落美無人戰機 (2)
有外交界知情人士爆料，話美國的RQ-170在絕對的高空偵察，亦有隱形裝置。以伊朗的軍事水準，是無可能虜劫到RQ-170的。伊朗在12月14日公開俘虜RQ-170偵查機的方法，話係使用GPS干擾技術， 令到RQ-170偵查機錯誤判斷坐標，降落到伊朗國土。這種說法只是一個托詞，實情是俄羅斯入侵了那隻RQ-170的電腦系統，把它刧持，發出指令要它降落在伊朗境內，降落後繼續發回誤導訊息予美國，讓美國以為飛機還在天空飛。不過降落時落得不好，把飛機的起落架弄壞了，所以最後展示時用一枝國旗，掩蓋破損的起落架。
至於RQ-170最後「花落誰家」？同上期講到的F117戰機殘骸一樣，落到我們中國人手上，中國用重金買了這部RQ-170回國拆件研究。
2012年的珠海軍事航空展，中國「翼龍」（Wing Loong）無人機首次曝光。美國人見到這部「翼龍」，會唔會覺得熟口熟面呢？隨著「龍之眼-1」和「龍之眼-2」 的新型吊艙的出現，軍事專家憶測中國的無人駕駛飛機重點已從偵察機轉向至攻擊機。
中國近年在無人駕駛戰機發展技術面突飛猛進，肯定要多謝RQ-170的技術。在搶機事件中，伊朗、俄國及中國表現不同的民族強項，伊朗夠膽，俄國夠科技實力，而我們祖國又有錢又有仿造實力，所以敢打美國主意。當然，美國機若不是飛入伊朗上空偵察，也不失陷吧。
伊朗電視台播出美軍RQ-170無人機被繳獲片段：
