立會主席首要條件：識揸剪刀

立法會選舉結束，下一個關注焦點是誰做立法會主席。民主黨涂謹申今早在港台節目表示，做主席要著重於願意商量，阿涂話主席人選的「心水是謝偉俊」。

阿涂認為謝偉俊「講嘢中肯啲」，反而不看好被視為下屆主席人選的經民聯梁君彥，「除非梁君彥改到好似曾鈺成」。

有高人話，未來立法會主席有幾個人選，包括新民黨主席葉劉淑儀、經民聯梁君彥、商界議員廖長江和保險界議員陳健波。如今可以加埋謝偉俊個名。

葉劉個人夠決斷，做議員資歷也夠深，本來是最合適人選，但估計佢「大雞唔食細米」，對立法會主席呢個全港第5號人物位置興趣不濃。

經民聯梁君彥是上屆立法會內務委員會主席，議會經驗豐富，問題是經民聯是有7個議席的大黨，來屆黨派糾紛很多，梁君彥要照顧經民聯的利益，就未必適合做主席。

廖長江是大狀，專業背景很強，但個性比較溫和，來屆立法會衝突很多，拉布不斷，做主席的首要條件可能不是善於溝通，而是見到拉布下剪時出手夠硬，廖長江未必能夠狠下心。謝偉俊的情況也接受，願意和不同黨派商量，但商量完大家還是企硬時，要他下剪怕他手軟。

保險界議員陳健波就不同了。上屆吳亮星做財委會主席時出了事，陳健波頂上，剪布手法利落，令人刮目相看，在這方面佔了優勢。

高人話，最後找誰做立法會主席，就要判斷未來氣氛如何，若假設氣氛不太緊張，溝通派就佔優，若假設都係劍拔弩張，就由剪刀派上場。

Ariel

** 博客文章文責自負,不代表本公司立場 **

王維基大熱倒灶，成為今屆立法會選舉其中一個主要話題。有熟悉港島區選情朋友同Ariel講，王維基墮馬固然令人意外，但王維基本人喺星期一點緊票時，發現竟然同公民黨陳淑莊爭尾席時，佢自己同樣大跌眼鏡。

選前民調一直話，王維基同陳淑莊喺港島區排第二同第三，選情屬於穩定；不過最終王維基出局，陳淑莊亦險象環生，呢位熟悉港島區選情朋友估計，係雷動計劃送咗兩位一程。

睇返王維基得33323票，相對陳淑莊有35404票，兩人相差二千多票，令王維基無緣入局。雷動計劃無將王維基當作泛民，又話陳淑莊選情穩定，叫各方人士將票投返俾民主黨許智峯同埋香港眾志羅冠聰。結果呢？羅冠聰得50818票高票當選，許智峯亦有42499票，比陳淑莊多了七千多票。

朋友認為，雷動計劃令人覺得羅冠聰同許智峯未能當選，鼓動大量泛民選票投向兩人，結果夾死咗王維基。王維基接受記者採訪都話，投票日聽到好多選民話佢夠晒票，最終改投其他人，慨嘆太遲告急救唔返。

朋友話如果無咗雷動搞局，相信王維基同陳淑莊得票，可能會比許智峯同羅冠聰都高，最後一席可能演變成許智峯同民建聯張國鈞鬥，皆因張國鈞最終得票只係41152，唔算好高。如果無咗雷動計劃，而許智峯同羅冠聰又夠票入到局，就好可能擠走張國鈞。

不論係點，雷動計劃決策不透明，但的的確確影響到選情，是否公平值得商榷。