王維基、陳淑莊俾雷動累咗

王維基大熱倒灶，成為今屆立法會選舉其中一個主要話題。有熟悉港島區選情朋友同Ariel講，王維基墮馬固然令人意外，但王維基本人喺星期一點緊票時，發現竟然同公民黨陳淑莊爭尾席時，佢自己同樣大跌眼鏡。

選前民調一直話，王維基同陳淑莊喺港島區排第二同第三，選情屬於穩定；不過最終王維基出局，陳淑莊亦險象環生，呢位熟悉港島區選情朋友估計，係雷動計劃送咗兩位一程。

睇返王維基得33323票，相對陳淑莊有35404票，兩人相差二千多票，令王維基無緣入局。雷動計劃無將王維基當作泛民，又話陳淑莊選情穩定，叫各方人士將票投返俾民主黨許智峯同埋香港眾志羅冠聰。結果呢？羅冠聰得50818票高票當選，許智峯亦有42499票，比陳淑莊多了七千多票。

朋友認為，雷動計劃令人覺得羅冠聰同許智峯未能當選，鼓動大量泛民選票投向兩人，結果夾死咗王維基。王維基接受記者採訪都話，投票日聽到好多選民話佢夠晒票，最終改投其他人，慨嘆太遲告急救唔返。

朋友話如果無咗雷動搞局，相信王維基同陳淑莊得票，可能會比許智峯同羅冠聰都高，最後一席可能演變成許智峯同民建聯張國鈞鬥，皆因張國鈞最終得票只係41152，唔算好高。如果無咗雷動計劃，而許智峯同羅冠聰又夠票入到局，就好可能擠走張國鈞。

不論係點，雷動計劃決策不透明，但的的確確影響到選情，是否公平值得商榷。

Ariel

** 博客文章文責自負,不代表本公司立場 **

選舉過後，各方都要計計建制同泛民人數，有講法話建制有40人，亦有人話建制取得41席，其中關鍵就是究竟醫學界當選人陳沛然點計數？

以上屆為例，有人將醫學界議員「怪醫」梁家騮歸類為建制，但Ariel觀察咗四年，又覺得好難咁講，因為從未見過梁家騮在重要議題上支持建制派的投票取向。

今次換屆選舉，由公共醫療醫生協會前會長的陳沛然勝出，他的得票有5626票，對手醫學會會董黃以謙只有2249票，陳沛然足足贏成條街。

選舉當中，黃以謙表現得較為建制，一般人都認為陳沛然是泛民，不過佢表明不支持「拉布」，亦不會參加泛民「飯盒會」，好難將他歸入泛民陣營，佢話自己係「中間派」，遲啲會約見其他政黨議員，睇睇大家有無合作空間。

過去泛民比較一致行動，搞出「飯盒會」協調行動部署，但後來有啲泛民已經唔參加「飯盒會」。來屆立法會仲有六位本土獨同港獨派入局，更加唔會同泛民一齊，加上陳沛然表明不會加入泛民團組，所以難以將他歸屬為泛民。至於佢係咪建制？大家就要拭目以待，睇吓佢第日的投票取向啦。