壹傳媒日前話要節省成本5%，工會早前按4000員工推算，可能大裁員200人。蘋果老總張劍虹今日在他的專欄澄清，5%係成本支出，唔係裁員比例，佢透露計劃裁員的人數佔集團比例只係2%，加埋自然流失同凍結一些未補齊的人員名額，整年人手大約減少4至5%。另外，佢話會減紙(減少每份的頁數)去額外降低成本，估計省錢大計可以超額完成員，表現好的員工仲可能有人工加咁話。
而家仲講加薪，虹哥真係好話說盡，不如睇吓蘋果究竟會裁幾多人實際啲。壹工會之所以得出裁員人數200人，係根據壹傳媒集團年報話有4000員工、由此計減5%而得出，而沙膽虹之前已經提過，台灣壹電視已經賣咗，壹電視總員工990人，所以集團員工無咁多，只有約3000人，現在佢話裁員2%，即係大約裁60人，如果剩計香港，裁員人數會更少，可能只是30人左右，聽落無咁震撼。
不過香港現時四圍仲係人逼逼，食餐飯都要排隊，好耐無聽到裁員呢兩隻字，我估傳媒都係第一個大行業，開始要動刀殺人。不過全世界傳統媒體都不景氣，美加報紙去年廣告收入都係10幾、20%咁插，香港已經叫做好少少，但係都唔慌好景，小鯊都有啲為傳媒朋友擔心。
今次蘋果大鑼大鼓話裁員，老實就夠老實啦，不過就令到報業人心惶惶，蘋果開咗第一刀，唔知邊張報紙要開第二刀啦。
小鯊
** 博客文章文責自負,不代表本公司立場 **
小鯊未瞓醒俾記者朋友叫醒，話壹傳媒要裁員200人呀! 咁大劑，乜唔係早前話加人工3%，做乜突然又話裁員?
佢射咗段《蘋果》新聞俾我睇，裡面講到壹傳媒行政總裁張嘉聲昨日在內部宣佈，因紙媒業績欠佳及遭企業抽廣告，集團即時縮減開支5%，涉及集團的報紙、雜誌及網上媒體，縮減開支方法包括減版面及減人手開支。壹傳媒的工會壹工會就話，以年報資料推算，一旦裁員5%，受影響員工人數或達200人，集團早前宣佈整體平均加薪3%，已低絕全行，復縮減開支，對員工是雙重打擊。
記者朋友計一計，兩萬蚊人工，加3%等如6舊，加咗唔夠食餐飯，但加完6舊之後，20個人就要數一個人頭出來交俾老細，有無咁荒謬呀?
小鯊都答唔到點解壹傳媒會咁搞，不過後來搵份報紙睇睇，睇埋《蘋果》老總張劍虹個專欄，又好似多啲眉目，沙膽虹話「目前是大家忙於做2014/15年度預算的日子，肥佬黎一句『唔收貨』，大家就疲於奔命，再要想辦法開源節流。」睇嚟係壹傳媒高層之前將嗰個包括3%人工加幅的預算俾肥佬黎，肥佬黎一句唔收貨，就搞出如今要減5%開支的決定。
紙媒面對挑戰係真，但係唔係啲老闆講到咁差就唔知。而家肥佬黎突然醉心網上世界，不止紙媒記者做乜都要先為網服務，等如一個人做兩份工出一份糧，老細仲要自己唱衰自己，話《蘋果》銷量要跌喇，動新聞點掂點掂呀；若然動新聞咁掂搵咁多，又使乜減開支裁員呢? 動新聞係咁撻《蘋果》啲料去出，好報紙都俾佢撻料撻死啦!
既然紙媒記者要搵埋料俾網媒，點解紙媒編採人工開支，唔計一半入網媒嗰度? 而家等如紙媒記者白做送俾網媒，讀者睇完網煤又唔買紙媒，跟住老細又嚟同我講紙媒唔掂，講到好似紙媒記者好廢，所以起唔到紙，咁樣啱唔啱數呀?
我估若然《蘋果》紙媒將編採開支計一半，收番網媒當提供內容費用，咁《蘋果》紙媒馬上賺多1億幾，紙媒使鬼裁員減開支呀?
你可能話咁樣壹傳媒網媒開支大增咪有排賺唔到錢? 唓，若然要計荷包就唔好咁大聲話網媒咁掂啦，全世界網媒都係咁架啦，要計數就唔好學人做啦，或者將來「動新聞」好似Whatsapp咁賣到190億美金呢，鬼知咩，老細要博大霧，仲乜叫我陪佢博啫?
小鯊
