立法會選舉剛落幕，特首選戰就埋牙，民主黨元老李永達(阿達)最近接受網台「香港花生」訪問，引述佢同香港01老細于品海的一番對話，在政圈引起關注。
阿達在訪問中話自己同于品海識咗好耐，選完立法會後有一次聚會，就直問于品海：「你香港01係咪習辦？」，佢引述于品海「騎騎笑」望住佢。跟住阿達又話：「你的多維(網站)呢排勁揪喎，寫咗兩篇文窒中聯辦同CY，一直無落架喎！」
阿達引述于品海回應：「阿達，你有冇搞錯呀，我哋唔係寫兩篇，寫咗廿幾篇。」阿達又話自己繼續追住于品海問係咪習辦的人，佢引述于品海咁答：「我哋就唔係咁講，應該咁講，我哋多維同埋香港01寫的觀點，習辦的同事係應該唔會反對的，應該觀點相近的。」
阿達又指于品海同習主席識咗好耐，習主席之前在福建做省委書記時候，15、16年前的事，之後習主席調咗法浙江做書記，于品海對阿達話有兩次機會同習主席單獨傾咗好耐，由食飯傾到深夜，單對單見，阿達認為「咁即係唔簡單啦」，仲話于品海同習主席的家姐好熟，之前有合作添。
阿達仲引述于品海話，現任特首CY有機會下屆特首候選人都無得做。阿達話自己即時覺得呢個預測好勁，而于品海就叫佢睇多幾個月就知道，好快睇到架喇。
政壇八卦友就話，在特首選舉前夕，好多代言人傳來傳去，又話中央官員講什麼什麼的，但講到同習辦咁熟，佢都算獨家啦，係咪咁堅，未來睇睇就知啦。
有關李永達的訪問，可以前往「香港花生」網頁：
http://news.hkpeanut.com/archives/20875
Ariel
** 博客文章文責自負,不代表本公司立場 **
港台老牌節目《城市論壇》由周日起不再由無綫轉播放，而《頭條新聞》、《議事論事》等則改為TVB周一至五，傍晚6時播放。港台節目與TVB分途廣播的大勢，不可逆轉。
無綫播《城市論壇》，本無規定，不是發牌條件之一，只是某年某月政府高層和無綫傾好，就一直播到如今。但今天港台已有自己獨立的電視頻道，無綫唔播俾番港台自己播，好順理成章。
有廣播業人士話，《城市論壇》1980年播出時好震憾，但如今這些嗌交論壇，比比皆是，話無綫為政治專門不播《城市論壇》，似乎偏離了事實。如今每一個電視台都面臨收入下跌的壓力要諗方法搵錢，所以無綫攞番《城市論壇》的時段自己搞，及將其他港台節目推前到6點播，明顯有搵水的考慮。無綫一改播娛樂性的節目，收視和廣告收入都會上升。
講起《城市論壇》，原來在當年的封閉社會，係一個敏感節目。廣播處前處長張敏儀當年一手搞《城市論壇》，她當時任職港台電視部，眼見香港經濟起飛，社會漸趨成熟，建議定期在維園舉行《城市論壇》，讓市民發表意見，但遭當時的警務處處長極力反對，「話涉及非法集會，一定會暴動」。她據理力爭，《城市論壇》終於1980年4月13日在滂沱大雨中首播。
張大姐話，節目首5年最難捱，經常有冷場，「要搵中學生做觀眾，偶然先至有一、兩名市民」。
前港台大佬話，港英政府由唔贊成搞《城市論壇》，變做贊成，主要和97回歸有關。話說1979年，當時的港督麥理浩爵士到北京，同中共領導人鄧小平見面，想傾1997年香港續約的問題，點知鄧小平一口拒絕，話中國一定會在97年收回香港主權，又叫麥理浩香港投資者傳話，叫「投資者放心」。
前港台大佬話，麥理浩回港後公開引述鄧小平話「叫香港投資者放心」，但係冇講鄧小平要收回香港主權。港英政府跟住密密手做野，先在1980年首次引入區議會選舉，再搞城市論壇，在殖民地時代唔想搞嘅嘢，馬上快快手手搞。
但佢話，如今鬧政府成風，傳媒批評政府相當激烈，城市論壇的歷史角色，已經逐步減退。
