一個街頭騙人買貴煲的故事

若果大家行街，見到有免費派贈品的推廣，大家會去取嗎？我想分享一個朋友的親身經歷，看看大家覺得有沒有呃人的成分。

朋友自稱是無所事事的師奶（其實是有米師奶），有一天她經過一個臨時檔口，門口圍了十多人，人人手持一塊白色的紙抹布。她記得早一天都見過同樣情境，估佢日日擺檔派sample，就停低諸事八掛一番。

主持人叫自己做o靚仔，我朋友一行近，他很迅速送一塊白色抹布俾我朋友。這個o靚仔密密飲水，又話自己喉嚨痛，趕住去睇醫生。所以我朋友起初相信應該好快會派更大份的sample，於是她就企一陣聽他做抹油煙示範。

o靚仔跟住講是公司志在宣傳，今天唔賣嘢，大家用完覺得好用，記得介紹給朋友。自己用過好用的，自己去超市買，o靚再重申「今天唔賣嘢」。

朋友心諗真係唔賣嘢有咁大隻夾乸隨街跳？不過見o靚仔講到似層層，跟住又不斷飲水，話真係趕時間。與此同時，他又拿出一塊黑色的抹布，示範一次如何抹皮具上的霉菌。他一路派又一路講，用過好用，大家記唔記得要做乜嘢。現場有答「介紹朋友」，他就多給答問題的婆婆幾塊抹布。跟住他又問一些問題，現場反應熱烈，氣氛一流。

如是者過了十幾分鐘，o靚仔還未派更重手的sample，跟住又攞出一把陶瓷刀，當然又有示範，又講志在宣傳，重申是冇嘢賣，再之後靚仔拿出一塊不碎砧板，然後有助手在旁邊將黑色、白色抹布、陶瓷刀、砧板放入一個環保袋，一份份非常吸引，o靚仔又再要求現場人士想要的舉手，說是點人數。我朋友話開始覺得事有蹊蹺，她說反正有時間，好想知道什麼葫蘆賣什麼藥，就舉手睇吓有乜事發生。

跟住o靚仔就話：「嗱嗱嗱，我公司志在推廣，每人只限攞一份，我見到有昨天攞過的，嗱，攞過的自己靜靜雞走，唔好咁貪心。」說也奇怪，真的有一個女仕戲劇性的轉頭走了。我朋友話越睇越好奇，不過話已經站了20多分鐘，雖然她是閒人，都巳經想走了。正當她動腳之際，o靚仔攞出一個陶瓷煲。現場即時嘩嘩聲！大家可能都在想：「咁大個煲都免費派？」

下省幾百字關於示範與及那個煲點好點好，朋友話狐狸尾巴終於出來了。o靚仔仔說：「公司只準備了5個，要看看誰有誠意買就襯手。」有一個嬸嬸很快的舉起一張5佰蚊紙，跟住就有十幾人陸續舉手。o靚仔仲話：「大家咁有誠意，我同公司講做埋特價俾大家，$499」他已經不再用「送」字。

朋友見真相大白就離開，臨走時見到大概有十幾人留下來。不買煲的還可否拿到之前話送的贈品，她說不得而知。煲有平有貴，$499個煲，後來見報上賣同樣的煲只是$250。

我就話第一個舉手買的多數係做媒，但假設有10個真客買，半小時執2000、3000元，認真有生意頭腦。呢個世界唔跌啲錢俾你執，怎拿到你口袋的錢呢。

黃毅力

** 博客文章文責自負,不代表本公司立場 **

上星期， 跟朋友飯敍， 朋友剛投身社會的小女兒也一起參與， 平常這位女生都像開籠雀一樣， 喜歡跟我們談笑風生， 但這晚， 就一反常態， 一坐下就鼓眉拋腮， 眉頭皺起來可夾死烏蠅一樣。

看到此狀況， 我與太太， 跟她的父母就眼神交流一下， 但大家都得不出一個所以來。 可能我們大家都突然靜下來望著她， 而她也感受到我們的熱烈注視， 終於給了我們一個反應。

接著她就說: 我冇咩事， 大家唔使緊張， 只不過有些事我想唔通， 所以心情唔好。

她爸爸就說: 你有咩想唔明， 跟我們說說， 我地 4 個， 食鹽多過你食米， 可以幫你分析下。

"爸爸，我自問都是一個和善的人， 做事都是對事不對人， 雖然仲未做到面面俱圓， 但都對得住自己良心， 對得人。 但我突然發現， 有時太過將心比己， 將人情放在職場上，呢個做法係唔岩， 簡直就係挖了一個大窿比自己踩。"

其實事源就是朋友女兒的公司， 跟另外一間公司有合作，接了一個 project 來做， 對方公司是負責 執行， 而朋友女兒公司是負責推廣 的， 但因執行的公司那邊出了點問題， 而且項目的死線已近，客戶那邊已聲明不可以改期， 所以根本等不了那邊給補救方案， 朋友的女兒那邊就立即找了平時做開的承辦商去幫手。 到大家對數的時候， 合作公司就不願意付這間承辦商的支出，原因就是覺得這間承辦商只是少幫忙， 況且他們也不要他們幫忙呀， 覺得要分薄了他們的利潤， 實在不公平。

我聽完她的故事，提出了一個重點，熱誠是重要的，但不代表正確，合約承辦商不能完成任務，根據合約精神，理應賠款，你去幫助人但沒有說清楚，沒有先小人後君子的跟他說，牽涉的部份費用將會由你承擔，如果他不能確認，你就應當按兵不動，待他過了死線之後負全責，每個人都要面對自己的後果，你對工作有熱誠但別人沒有，你真實坦蕩蕩去支援別人，別人卻陰沉沉的計劃拖累你，這件事於職場裡常有發生，稱為「好心做壞事」，幫完人之後還要受氣、還要揹黑鍋，原因是感情用事，你從別人角度處想，但別人卻自私的只顧自己、保護自己，換句話說就是你自己天真、無知而已，做人總要經一事長一智，要揹起這個黑鍋的，一定是朋友女兒的公司，朋友女兒一廂情願以為做每件事都是從心出發，但在商業社會中，每個人都在計數，一涉及金錢，父子都變得沒有情份，何況是別人的公司？大家的項目，今天是合作伙伴，明天可能就是競爭對手，所以任何事情都要先小人後君子，把話說得清清楚楚的，不要放太多感情於工作上。