網傳新城大裁員 營運總裁馬浚偉稱非事實：唔好亂作啦

馬浚偉奉勸大家不要亂信流言，小心別誤墮陷阱！

就近日有網民在社交平台發放假消息，指新城廣播大裁員，新城廣播有限公司首席營運總裁馬浚偉與新城多位管理層、節目主持紛紛在個人社交平台出Po剝花生！馬浚偉留言：「我哋新城廣播並冇裁員，唔好亂作啦。」馬浚偉再稱：「現在科技發達，假訊息、假資訊隨時可以誤導讀者！要進行抹黑或者攻擊行為，網絡實在有太多方法！當然我奉勸大家不要亂信，亦要小心別誤墮陷阱！當然更重要嘅，係繼續留意同支持我哋新城廣播和MBOTV! 哈哈，多謝大家！」

馬浚偉否認新城大裁員。

馬生還奉勸大家不要亂信流言。

MBO TV台長兼創作總監葉文輝（啤梨）亦出Po：「睇到關於新城嘅花生真係得啖笑，連我日日返工都唔知，大家笑完好快啲聽我節目同睇MBO TV嘞。」

知訊台台長程凱欣也出Po：「身體同一間公司一樣，要健康茁壯成長，也不能讓不真嘅消息蔓延。近日收到 有WhatsApp問到關於新城傳出裁員消息，辟谷對身體有很多好處，同樣「辟謠」也重要，不能讓不盡不實，流言蜚語發酵蔓延。」

葉文輝（啤梨）話傳聞「得啖笑」。

財經台台長魏美珍與主持胡孟青在財經台「開市直擊」節目中，也踢這則流料：「網民留言話MBO TV，聽都未聽過，實在太難過喇。咁落力演出竟然無人知？咁就等我再次介紹一下MBO TV，有聲、有畫；可以聽、可以睇！專業分析、貼地演繹！以後記得逢港股交易日上午11時至12時收睇直播，支持我地！
近日太多朋友問到公司裁員消息，無法逐一澄清，請大家準時收聽同收睇「開市直擊」揾答案！」

范振鋒今日與思敏返新城主持《開心大派對》節目，阿范表示一路無聽過新城裁員。

思敏FB

新城廣播藝人經理人及項目總監范振鋒今日與思敏返新城主持《開心大派對》節目，阿范表示一路無聽過新城裁員，反而見到公司（新城）最近請咗好多人：「依家要做假新聞好容易，搵鍵盤戰士打手。反而自從COO馬生入主電台後，電台新景氣，改革好咗好多，新城多咗好多活動及宣傳，生氣好好多，11月其中有一日，連搞三單event，大家嘅士氣好好。」阿范更歡迎發放假消息的人聯絡他：「放假消息朋友，有咩唔明或誤會，可以搵我，我可以安排當面搵馬生傾下。」

思敏反而欣賞：「馬生好肯用錢在科技上。」更在社交平台出Po：「如果新城有吉位多出嚟，我絕對會將我嘅私人物品擺喺公司，慳返啲。可惜！我依家要繼續借迷你倉，因為個個位都有人㗎！」

知訊台台長程凱欣指，不能讓不盡不實流言蜚語蔓延。

胡孟青

歌手尹光到新城廣播接受李有毅與李國煒主持的《Ben同Benson「Chur」到行》訪問，分享由黃偉文（Wyman）為他度身訂造的新歌《你阿爸的無常宇宙》。現年81歲的尹光，在新歌中從出生唱到往生，說的是放下執著，接受上天的安排。然而在拍攝MV時，導演張子丰不讓尹光「死去」。

尹光接受新城《Ben同Benson「Chur」到行》訪問。

尹光談及新歌《你阿爸的無常宇宙》時難掩興奮，他表示歌曲由Wyman操刀：「自從《Dear Myself》之後，佢覺得佢想寫一首歌畀尹光唱。我聽到佢想寫畀我，嘩！開心到。我求都未必求到佢寫畀我，難得佢肯寫畀我，我開心到不得了。」

尹光介紹歌曲內容時滔滔不絕：「呢首歌係講一個人由出世到往生，以前人生幾十年，依家人生可以過百年，我都識幾個九十幾歲，現代人壽命長咗。佢講嘅往生同出生，叫人唔好太執著，每件事上天都安排好。你想健康就運動；你想開心就唔好諗太多，咁你個人就冇問題喇！」

左起：李有毅、尹光、李國煒

新歌MV由張子丰（Fred）執導，拍攝過程甚為有趣，他分享MV中的特別安排：「原本首歌係講我往生，講我死，但Fred話唔好畀尹光死住，我哋仲有排玩。」尹光續說：「MV入面我死咗經過奈何橋，佢話我冇手帶唔走得住。我問佢點解我唔走得？佢話『你未係時候，依家你鍾意去邊就去邊，鍾意做乜就做乜，玩夠再返嚟』。」

談及與兒子的關係，尹光提到自己歌曲《老豆》正正是講述父子關係，他坦承：「年輕時同個仔冇咁密切，長大之後就比較密切。」他解釋：「因為佢細個嘅時候要搵食，個個年輕時都會去拼搏去賺錢，賺錢時就好少顧個仔，多數請工人或者太太照顧，到依家想接觸個仔，佢又識諗嘢，覺得老豆以前冇照顧我咁好，依家想補救，同個仔都OK。」

新城CEO馬浚偉歡迎尹光到訪。

81歲尹光推出新歌《你阿爸的無常宇宙》。

尹光特別感謝影帝張家輝為《老豆》拍攝MV：「我喺呢到借個機會多謝張家輝，佢拍《老豆》個MV真係拍得好好。雖然三兩分鐘，佢個表情真係絕頂，頭髮雖然梳咗兩個鐘，但拍咗兩三秒，轉咗個頭，但嗰吓好有感覺，所以真係影帝。」尹光又透露與兒子的日常溝通：「我個仔冇咁多嘢講，佢同我老婆就講好多嘢，由我老婆講畀我聽。」

另外，尹光將於5月19日舉行《爆笑勁歌晒冷演唱會2026》，他笑言：「曬冷就唔敢講話曬冷，曬冷唱多啲歌畀大家聽，即係有啲歌冇唱過都曬畀你聽。」同時介紹兩位演出嘉賓：「第一個是蝦頭（楊詩敏），佢會同我唱一首好搞笑嘅歌，另一係鄭雅琪，佢喺粵曲界好出名，佢同我會唱幾首廣東小曲。」

唱盡出生到往生。

詳細節目內容，請留意4月25日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/