一塲黑雨，記者顧住寫又一城水舞間，SoCo拿拿臨幫露宿者開聲，閙鬼民政署，點解臨時X護中心唔開門，搞到一啲露宿阿叔床濕被濕家當濕，總之乜鬼都淋濕哂！市民打電話去電台，都好同情啲露宿者。
政府自然需要關顧呢啲阿叔境況，之不過貝貝經常都有一個問題，香港經常話請唔到人做嘢，連洗碗都賺萬三蚊個月，點解要去露宿?今朝在街尾食腸粉花生粥，就聽到個老闆娘扯起把聲，話「萬五蚊一個月都請唔到人呀！咁如果露宿者肯做，賺萬三蚊一個月，花五千蚊住個市區劏房，仲有八千蚊，一個人用，都應該生活到有餘，好過瞓街日晒雨淋呀！
早兩年港台有個節目叫《窮富翁大作戰》，有好多名人去體驗露宿者的生活，我就一直就上述疑問：「露宿者真係搵唔到嘢做?」去問參加過那個節目瞓過幾日街的名人，佢話「你行入去露宿者之家，埋去聞聞陣味，睇睇佢地個樣，一睇就知道，絕大部部份人係『老同』，即係長年吸毒者。」佢同露宿者傾到偈，好多人有錢就買白粉食，無錢就食美沙餇頂癮，佢地係選擇寄身街街頭，因為已經無哂人生目標和鬥志，你想幫，鼓勵佢地搵份工、上樓、正正經經做人，好難。
聽到好心酸。我問呢個名人，你呢啲係露宿真體驗，「點解你唔在港台的節目講呢個事實出來?」佢話人地做節目有個主題，想啲有錢人去體驗吓露宿者的苦況，期望得到的sound bite係：「唔試過露宿都唔知窮人咁慘」，如果話佢地好多係吸毒者自我放棄，會唔會被記者隊「你冷血架?」
貝貝記起小時侯嘅隣居張太，個老公吸毒，一個人帶住個仔住公屋做工廠，偶然會見到佢黑黑瘦瘦嘅老公，在暗暗嘅後樓梯等佢，問佢攞錢。貝貝阿媽以此為戒，話「你大個記住帶眼識男人。」
講返落黑雨。大家都知露宿者可憐，但點幫？颱風到扯八號風球，政府一定開庇護中心，因為留在街上危險，兼且一打風就一日、半日。落黑雨，落嗰半個鐘一個鐘，啲公務員跑返去同你安排開門，開得門嚟雨停咗又無人嚟，真係唔係講起嚟咁大用處。
貝貝
** 博客文章文責自負,不代表本公司立場 **
香港市民真係慘，分明地鐵準備加價加成三個percent，全香港中下階層都受影响。記者見到個特首，都應該幫手問問佢，你唔會俾地鐵咁加法係嗎？點都要問係咪？
點知，今晚電台電視，見個特首行出泥，剩係識講「我冇搞連任辦，任期只過咗三分一，點講連任呢」。咁地鐵呢？記者冇問佢地鐵加價呀？定係問咗唔出呀？睇怕無啦，如果有，電台電視台點解唔見報道吓。
睇到好鬼嬲，啲記者咁樣水平做嘢，「特首你係咪已經搞連任辦公室？係咪想連任？」吓！梁振英想連任，係問題泥㗎？你哋啲細路記者有冇睇佢個政綱，啲政策點寫㗎？寫五年呀？乜鬼都講十年規劃，有冇睇真㗎？從佢決定參選個日，思歪都係冧住做十年啦，邊個做特首，只想做一屆㗎？你以為倒梁份子講Plan B，個CY就會舉手投降離塲呀？
所謂連任辦公室，唉！個特首辦唔係做緊咩？CY由朝到晚係嗰度，啲政策係咁派錢，駛唔駛係出面搞多個辦公室，專做連任呀？仲有，家陣佢出面冇另一個私家智襄團咩？乜你以為冇，仲要再搞一個呀？整個權威人士放風，如果馬拉松唔係係咁吹，田少放冷槍，你估梁粉駛唔駛咁吹？人哋做勢，自己粒聲唔出，等人以為CY 下一屆absent，你以為梁粉傻㗎係嘛？但咁早搞連任辦，駛唔駛計競選經費先？有競選經費呢樣嘢㗎，各位記者，用吓個腦，有啲常識得唔得。
