星期一睇股市，都覺得古怪嘞，點解吉利汽車一升，升成6﹪!昨日終於開故，原來在比利時的習近平，參觀咗當地嘅富豪車廠，富豪係瑞典車，但俾大陸民企汽車公司吉利收購咗，呢單新聞香港報紙佬懶寫，但背後其實有隻好故仔。
四年前富豪賣盤時，吉利在各個强手之中突圍，競購成功，做了富豪汽車大股東。簽約時，習近平剛好以國家副主席身份訪問瑞典。由於競購前，三個中央政治局常委，密集去吉利調硏，變相支持吉利競購。於是傳媒都斷估，話老習會出席簽約儀式，不過，佢終於無出現。
呢件事有兩種講法，一係老習避免外界視他想搶功，一係佢唔想同吉利行得太埋，避免日後瓜田李下。
點瓜田李下呢？咁講啦，吉利係內地非常成功嘅汽車公司，之有今日，與老習慧眼有關。話說2003年，老習調任浙江省書記，調硏一大輪，即點名讚吉利車廠做得好。兩年後，更召集全省汽車業老闆到吉利台州車廠參觀，從此吉利成為浙江汽車行業的「龍頭老大」，更把總部從台州市遷到省會杭州，浙江省亦推出鼓勵全省的士用吉利車等9項措施，全力支持吉利發展。
要公道啲講，內地汽車業大把國企，呢啲巨無覇同吉利爭，背後有利益官員群體照顧，吉利要發展得起來，除了得老習慧眼賞識之外，吉利老闆李書福自己腳踏實地，肯幹肯拼，力爭上游，先知最重要。若果唔係，早早被淘汱啦。
香港車主都知，富豪車以安全著名，硬淨㩒撞，大陸車平就平，但安全性唔夠。吉利買富豪，剩係學富豪啲安全技術，改善內地吉利車嘅生產，已經有著數。當然，一間內地車廠，要搞番掂一間經營有困難的歐洲車廠，一啲都唔易。而老習終於參觀富豪車廠，對吉利當然係正面之事，但最後都要靠自己。至於股價，炒咗一炒之後就唔多識睇，要收聲啦。
貝貝
貝貝
** 博客文章文責自負,不代表本公司立場 **
一塲黑雨，記者顧住寫又一城水舞間，SoCo拿拿臨幫露宿者開聲，閙鬼民政署，點解臨時X護中心唔開門，搞到一啲露宿阿叔床濕被濕家當濕，總之乜鬼都淋濕哂！市民打電話去電台，都好同情啲露宿者。
政府自然需要關顧呢啲阿叔境況，之不過貝貝經常都有一個問題，香港經常話請唔到人做嘢，連洗碗都賺萬三蚊個月，點解要去露宿?今朝在街尾食腸粉花生粥，就聽到個老闆娘扯起把聲，話「萬五蚊一個月都請唔到人呀！咁如果露宿者肯做，賺萬三蚊一個月，花五千蚊住個市區劏房，仲有八千蚊，一個人用，都應該生活到有餘，好過瞓街日晒雨淋呀！
早兩年港台有個節目叫《窮富翁大作戰》，有好多名人去體驗露宿者的生活，我就一直就上述疑問：「露宿者真係搵唔到嘢做?」去問參加過那個節目瞓過幾日街的名人，佢話「你行入去露宿者之家，埋去聞聞陣味，睇睇佢地個樣，一睇就知道，絕大部部份人係『老同』，即係長年吸毒者。」佢同露宿者傾到偈，好多人有錢就買白粉食，無錢就食美沙餇頂癮，佢地係選擇寄身街街頭，因為已經無哂人生目標和鬥志，你想幫，鼓勵佢地搵份工、上樓、正正經經做人，好難。
聽到好心酸。我問呢個名人，你呢啲係露宿真體驗，「點解你唔在港台的節目講呢個事實出來?」佢話人地做節目有個主題，想啲有錢人去體驗吓露宿者的苦況，期望得到的sound bite係：「唔試過露宿都唔知窮人咁慘」，如果話佢地好多係吸毒者自我放棄，會唔會被記者隊「你冷血架?」
貝貝記起小時侯嘅隣居張太，個老公吸毒，一個人帶住個仔住公屋做工廠，偶然會見到佢黑黑瘦瘦嘅老公，在暗暗嘅後樓梯等佢，問佢攞錢。貝貝阿媽以此為戒，話「你大個記住帶眼識男人。」
講返落黑雨。大家都知露宿者可憐，但點幫？颱風到扯八號風球，政府一定開庇護中心，因為留在街上危險，兼且一打風就一日、半日。落黑雨，落嗰半個鐘一個鐘，啲公務員跑返去同你安排開門，開得門嚟雨停咗又無人嚟，真係唔係講起嚟咁大用處。
