關心妍內地舉行巡唱 酬勞撥作慈善基金經費

歌手關心妍（Jade）接受新城李有毅（Ben）及兒子李國煒（Benson）主持的《Ben同Benson「chur」到行》節目訪問，最近鮮有公開露面的Jade，透露忙於在內地舉行巡迴演唱會，實現多年的夢想，她說：「近排一路做緊上年嘅2024巡迴演唱會，做咗廣州、佛山、東莞、江門、澳門、天津，嚟緊再去佛山南海，去我家鄉，真係好感動同開心。」Jade早前亦跟北京一間唱片公司簽約，日前推出第3首新歌《指尖的蝶》。

關心妍（Jade）接受《Ben同Benson「chur」到行》節目訪問。

早年，Jade設立「妍亮生命慈善基金」，並在銅鑼灣開設中心幫助基層人士，致力以音樂治療心身靈健康，由於每年需要五、六十萬元資金作營運，所以Jade將巡迴演唱的部份收入，捐作慈善基金的運作用途，她表示：「所以點解我一路做巡演，我近年喺香港唔係做好多活動，因為身份唔同咗，有基金，又要教小朋友，搵錢方面我係少咗好多，咁所以因為呢個基金，我真係要好努力去搵錢，同埋我唔係好識籌款，唔係好識去打劫人哋荷包，我又好怕，不過一個人去做，已經做咗十年，好感恩，會一路做，幫得幾多得幾多。」

Jade有空閒便會前往懲教署或某些戒毒機構作探訪，她認為藝人親身去支持這些在囚或更生人士，他們會有說不出的感動，Jade表示：「佢哋會覺得，我以前聽你唱歌，但你今日竟然會來搵我，原來我哋嘅影響力係你同佢講一句加油，嗰句加油嘅重量會好大，其實我除咗做呢啲，我一有時間就會去做其他支線服務，我覺得好有意思，所以我會繼續做多少少、唱多少少，去發放呢個光。」而「妍亮生命慈善基金」今年踏入10周年，Jade希望可以舉行慶祝活動。

左起：李有毅、關心妍、李國煒

Jade設立「妍亮生命慈善基金」幫助基層人士。

Jade於2016年為老公楊長智誕下女兒楊榮心（Jovia），一家三口樂也融融。Jade形容家庭生活十分有規律，每天會5點前回家煮飯，所以她和老公都會推掉很多應酬，Jade表示：「工人姐姐會幫我切好晒啲餸，我返去煮，因為我個女會帶午飯返學校，想佢食好啲，所以我會諗好晒一星期嘅菜，如果阿女做功課快，我哋會玩遊戲，臨瞓前會一齊祈禱；而星期日就一大家人食飯，包括我媽咪、奶奶、姑奶，係家庭日。」

最著重女兒品德教育的Jade，直言不用女兒名列前茅或十八般武藝，縱然女兒偶有犯錯，例如弄壞了一些東西，她總是循循善誘，但若果女兒說謊、不尊重人、沒有禮貌，她便會很嚴厲，Jade稱:「我覺得你讀書好叻、好成功，但你唔識得做人，你對人唔好、冇愛，其實係冇意思。」

關心妍內地舉行巡唱 酬勞撥作慈善基金經費

前港姐陸詩韻（Sharon）日前到新城廣播接受由范振鋒（阿范）及婥絲（香港）美容儀器有限公司香港研發儀器創辦人Nicole Lam「高力豆沙」主持的《「鋒」繼續吹》環節「靚靚陪審團」訪問，一同探討美容行業的點滴。Sharon在節目中分享自己創立護膚品牌的過程，坦言當初選擇從護膚品入手，同時覺得美容院業務牽涉層面太廣，需要管理大量人手及醫生團隊，對當時的她而言門檻過高。

陸詩韻（Sharon）接受新城廣播《靚靚陪審團》訪問。

Sharon回憶道：「我比較穩陣，覺得不如搵一啲容易入手，就用護膚品開始。」但她直言入門並不如想像中簡單，當年親赴日本尋找廠商時，因訂單量不足，即使頂着「港姐」名銜，也未必獲得廠商青睞。「要去到日本工業區搵廠，佢都未必歡迎你，因為我哋咁細，又要話畀佢聽我係港姐。」

作為品牌創辦人，Sharon對產品成分的把關極為嚴謹。由於自己擁有港姐的知名度，產品一旦出現問題，輿論反應將會被放大十倍。「有權利必有義務，如果你有啲成分或者各樣嘢，有少少差池，你可能會得到嘅反應會更大。」因此她對產品成分的監管非常嚴格，避免任何錯失。

左起：范振鋒、陸詩韻、婥絲（香港）美容儀器有限公司香港研發儀器創辦人的Nicole Lam「高力豆沙」

Sharon分享創業路與美容血淚史。

Sharon分享了一次眼皮敏感的難忘經歷：「我曾經試過眼皮敏感，一邊紅咗一邊冇，好彩冇腫得好厲害，兩邊都搽上粉紅色眼影遮擋，整勻佢，出嚟喺鼻影打勁啲，睇落就冇咁覺眼。」

談及美容市道，Sharon指疫情期間雖然美容院無法營業，但家用護膚品需求反而大增，生意表現理想。「美容院開唔到，每個人都去唔到美容院，兩個星期唔去美容院，個樣係完全唔同晒嘅。」她透露當時每日收到大量查詢，訂單多至倉庫缺貨。

赴日洽談生意遭嫌棄訂單少。

Sharon又自爆年輕時曾因「進取型」心態，在使用高能量美容儀器時要求美容師將度數調至8（最高為10），結果導致面部出現「貓鬚」般的紅印及腫脹。「我打完之後係有『貓鬚』，一行一行，好似刮痧咁。第二日又要工作，遮都遮唔到。」她坦言自此之後不敢再過度進取，並提醒消費者應按自身皮膚狀況選擇合適療程。

提到業界常有微整形失敗個案，Sharon分享曾聽聞有人進行雙眼皮手術後效果不自然，眼皮吊得太高，導致眼睛看起來大了三分之一，乾眼症等問題隨之而來。她又笑言，若見到朋友整容效果過於突兀，會尷尬得不懂如何回應，通常只能以「近來精神咗」輕輕帶過。阿范亦分享自身經驗，指曾因朋友整容後容貌變化太大，一時未能認出，場面尷尬。

Sharon自爆做機太進取出事。

詳細節目內容，請重溫：
３月26日，晚上11:00 – 00:00，新城知訊台《「鋒」繼續吹》節目，網址：https://www.metroradio.com.hk/MetroInfo/

３月27日，晚上８:00 – 9:00，新城MBO TV《「鋒」繼續吹》節目，網址：https://mbo.metro.hk/