黎瑞剛無意介入TVB日常運作 更想做好盤生意

有「中國梅鐸」之稱的黎瑞剛入股TVB 後，還做副主席，難免令有政治傾向人士，猜疑係咪有要染紅無記。

黎瑞剛聯同TVB主席陳國強、行政總裁李寶安與傳媒茶聚，劈頭第一句就話，唔會參與TVB日常營運，亦唔會介入編輯方針、業務等，佢話TVB現有專業團隊，做得好好，佢會多諗如何拓展未來路向。

佢多次盛讚TVB專業管理團隊，話而家政治環境複雜，經濟亦唔係咁好景，TVB已做得好好，但亦承認挑戰都唔少。

雖然剛做副主席，之前都好留意TVB，好似網上有人彈TVB，或者攞TVB開玩笑，佢都知道好多，都幾接地氣。

佢又舉例話自己內地公司拍的劇集「瑯琊榜」，在內地非常收得，但在香港TVB播就唔係好得，佢都有思考點解會咁，亦問咗唔少朋友，朋友話「瑯玡榜」無香港演員，所以香港觀眾睇落無親切感，黎瑞剛話受到啓示，將開拍的「瑯琊榜2」，係咪可以考慮加入TVB的演員呢。

唔講唔知，已有一家內地網上平台，以800萬人民幣一集買入「瑯琊榜2」版權，拍40集就袋數以億元。所以，黎瑞剛覺得網上平台發展空間大，TVB向內地發展，亦應循此方向。

講到市場環境，佢忍唔住「小抦」港府，話全世界對電視節目植入式廣告都好寬鬆，但港府就管得甚緊，希望政開放思想，「讓媒體鬆鬆綁。」

整個茶聚，黎瑞剛講好多對TVB發展方向的睇法，俾人感覺係想搞好呢盤生意，唔係有乜嘢政治任務。

Ariel

** 博客文章文責自負,不代表本公司立場 **

特首賽進入一個低氣壓階段，前一陣子好活躍的雙曾：即曾俊華和曾鈺成，都變得比較靜，林鄭月娥就簡直唔出聲，相當低調。

今日係一年一度的籌款活動「鼠戰中環」舉行日，林鄭月娥出席活動致辭時話，今次是她第5次、 也是最後一次以政務司司長身分擔任活動主禮，希望下年可放下公職人員身分，自己組隊參與活動。

林鄭話，自己十分喜歡這項活動，認為中環是香港獨一無二的地區，雖是金融中心，但這裏除了是個賺錢地方外，也是個有靈魂的地方，當中有著不少歷史建築，而她自己因而在09年，提出及開展保育中環計畫，包括改建前中區警署及元創坊等。

林鄭講到明年變成平民咁款，相信令佢的支持者有少少失望。不過政壇八卦友話，阿爺未就特首人選拍板，但不等如有意參賽者可以夾硬上，如果監粗嚟，即使阿爺不支持CY 連任，都不想被「逼宮者」得逞，林鄭呢種態度就聰明啦，講明唔去爭，你有興趣先搵我啦。