西九點解走數？

金牌經理人陳淑芬擒日出現，又講香港需要大型表演塲地。其實呢個問題，董伯伯時代已經話要解決，所以搞西九文化區，但從最初構思到最後拍板，規劃圖裡面，都有個大型表演塲地，點解走咗數？

計計西九管理局條數，大家就會明白。發展西九，政府一筆過撥款216億，呢筆錢，建造營運管理保養人工全包，指定要興建17項核心設施，當中15項係表演塲地，兩項係博物館同展覽中心。有萬五個座位嘅大型表演塲地，就放係第一期建造項目名單上。

西九點駛錢法呢？曝光率最高嘅M＋博物館，單係建築費已經要49億，藏品開支以08年估算係12億，剩係呢兩條數，M＋單一設施，就駛成61億，係整筆撥款嘅三成。

呢種駛錢法，唔可以講句建築成本上升就算數。背後流傳嘅故事，係管理局成立冇耐，有人問過一位主事人，大型表演塲係地標，幾時會起，主事人答得好直接，「錢要用嚟起博物館，大型表演塲地，冇錢起。」

點解M＋博物館咁重要，可以駛咁大筆錢？點解西九地標係博物館，唔係大型表演塲地？仲有，點解唔駛睇餸食飯，有幾多錢做齊幾多嘢？揀嚟做嘅標準又係乜？呢個問題，從最政治最基本的角度想，大家諗到乜？

表演場地，西九管理局唔係完全唔做，而係揀嚟做，用25 億起個戲曲中心，兩千幾座位，起到富麗堂煌，用嚟塞住最嘈嘅粵劇界把口，有個台造大戲，利益落袋，各位大老倌即刻唔再閙。至於大型表演塲地，就咁變成廢紙一張。

貝貝

貝貝

** 博客文章文責自負,不代表本公司立場 **

星期一睇股市，都覺得古怪嘞，點解吉利汽車一升，升成6﹪!昨日終於開故，原來在比利時的習近平，參觀咗當地嘅富豪車廠，富豪係瑞典車，但俾大陸民企汽車公司吉利收購咗，呢單新聞香港報紙佬懶寫，但背後其實有隻好故仔。

四年前富豪賣盤時，吉利在各個强手之中突圍，競購成功，做了富豪汽車大股東。簽約時，習近平剛好以國家副主席身份訪問瑞典。由於競購前，三個中央政治局常委，密集去吉利調硏，變相支持吉利競購。於是傳媒都斷估，話老習會出席簽約儀式，不過，佢終於無出現。

呢件事有兩種講法，一係老習避免外界視他想搶功，一係佢唔想同吉利行得太埋，避免日後瓜田李下。

點瓜田李下呢？咁講啦，吉利係內地非常成功嘅汽車公司，之有今日，與老習慧眼有關。話說2003年，老習調任浙江省書記，調硏一大輪，即點名讚吉利車廠做得好。兩年後，更召集全省汽車業老闆到吉利台州車廠參觀，從此吉利成為浙江汽車行業的「龍頭老大」，更把總部從台州市遷到省會杭州，浙江省亦推出鼓勵全省的士用吉利車等9項措施，全力支持吉利發展。

要公道啲講，內地汽車業大把國企，呢啲巨無覇同吉利爭，背後有利益官員群體照顧，吉利要發展得起來，除了得老習慧眼賞識之外，吉利老闆李書福自己腳踏實地，肯幹肯拼，力爭上游，先知最重要。若果唔係，早早被淘汱啦。

香港車主都知，富豪車以安全著名，硬淨㩒撞，大陸車平就平，但安全性唔夠。吉利買富豪，剩係學富豪啲安全技術，改善內地吉利車嘅生產，已經有著數。當然，一間內地車廠，要搞番掂一間經營有困難的歐洲車廠，一啲都唔易。而老習終於參觀富豪車廠，對吉利當然係正面之事，但最後都要靠自己。至於股價，炒咗一炒之後就唔多識睇，要收聲啦。

貝貝