謝寧嘆與岑建勳是「父親式婚姻」 大爆主動結識現任丈夫經過

1985年香港小姐冠軍謝寧，日前到新城廣播接受李有毅（Ben）和兒子李國煒（Benson）主持的《Ben同Benson「chur」到行》錄音訪問，謝寧當年參選香港小姐，Ben亦剛加入《香港早晨》擔任主持，並訪問過對方，謝寧笑言：「都成40年前，所以超過50歲嘅朋友先認得我。」

謝寧接受新城廣播《Ben同Benson「chur」到行》錄音訪問。

謝寧參選港姐前，曾在一間音樂學校教琴，然而當時她對人生感到迷茫，於是決定參選香港小姐，最後順利奪得冠軍。Ben憶述當晚的問答環節，謝寧給出的答案令人印象深刻，Benson即場問多次當晚的問題：「謝寧小姐，依家有一個病叫做愛滋病，大家都知道係唔好嘅病，如果畀你一個機會將愛滋病改一個名，你會改咩名呢？」謝寧回答：「我會改一個恐嚇性嘅名，叫game over，即係玩完喇，你唔驚呀？」後來外界對她的回答反應熱烈，令她始料不及。

不過謝寧亦爆料，指大會事前曾給她們35條題目，然後所有女生便圍在一起想答案，她表示：「唔係我叻，只能夠講我好好運，揀咗條好有趣嘅問題，同埋好有趣嘅答案，但個答案係邊個改，我就唔知喇，因為係30幾個女仔一齊諗嘅。」

謝寧選完港姐難抵壓力致抑鬱。

最怕被當動物咁睇！

雖然謝寧當選後人氣急升，但她坦言當時心情十分低落，「我發覺我唔可以承受咁大壓力，我唔係一個幕前嘅人，身高又唔係高，啲人覺得我係香港小姐最矮一個，自己唔識得處理外間對我嘅評價，我就好封閉自己，好唔開心，然後我覺得我係有抑鬱。」謝寧續指：「我唔鍾意畀人指指點點，一夜之間每個人都識得自己，嗰種感覺好唔舒服，好似睇動物咁睇你，有啲人荒死人哋唔識你，會好享受，但我唔鍾意，我好怕人哋識得我，到依家都有呢種感覺，可能個人自信心唔夠，或者太細個，所以嗰一年我覺得好慘。」

直至踏入人生第二個階段，Ben形容當時外界得知謝寧與岑建勳拍拖都大吃一驚，謝寧笑稱：「絕對係美女與野獸！」她透露二人拍拖是跟信仰有關，因自己期望要有一位基督徒男友和丈夫，於是帶對方返教會，「點知佢真係決志，咁我咪覺得係佢喇！」然而，兩人因性格不合，於2005年結束結婚14年婚姻，「佢係一個好成熟、好老積嘅人，佢係一個大人，我係小朋友，我哋有好大段距離，我唔可以有一個父親式婚姻，好似我咩都要聽佢講，我冇自己諗法，我要生活喺佢陰影下，我冇咗自己；其實佢冇變，變嘅係我。」

謝寧大爆主動結識現任丈夫經過。

離婚後，謝寧在教會遇上現任丈夫王德偉，「當時我唔識佢，只係覺得佢好靚仔，有一次我同朋友講起呢件事，佢話同我一齊返教會，睇吓撞唔撞到呢個人，點知一泊低架車，擰轉身就見到佢，我好無恥上去同佢講『我覺得你好熟面口，我唔想排隊，可唔可以打尖呀』，佢話隨便啦，跟住一齊排隊入教會。」之後眾人互相介紹，原來男方是TVB的舊同事，更曾為謝寧拍照，謝寧表示：「然後我就諗點樣攞佢電話，咁啱就嚟中秋節，我要幫曲奇店影中秋節產品，我就搵佢做freelance，咁就交換咗電話；喺做嘢過程去了解呢個人，覺得佢好單純同溫柔，發覺佢好啱我，就開始拍拖，經歷十堂婚姻輔導就步入婚姻，好開心。」Ben看到謝寧春風滿臉的樣子即笑言：「嘩，見到你雙眼閃閃發光，好甜蜜。」

詳細節目內容，請留意7月7日，晚上11時–凌晨1時，新城知訊台《Ben同Benson『Chur』到行》，網址：https://www.metroradio.com.hk/MetroInfo/

前港姐陸詩韻（Sharon）日前到新城廣播接受由范振鋒（阿范）及婥絲（香港）美容儀器有限公司香港研發儀器創辦人Nicole Lam「高力豆沙」主持的《「鋒」繼續吹》環節「靚靚陪審團」訪問，一同探討美容行業的點滴。Sharon在節目中分享自己創立護膚品牌的過程，坦言當初選擇從護膚品入手，同時覺得美容院業務牽涉層面太廣，需要管理大量人手及醫生團隊，對當時的她而言門檻過高。

陸詩韻（Sharon）接受新城廣播《靚靚陪審團》訪問。

Sharon回憶道：「我比較穩陣，覺得不如搵一啲容易入手，就用護膚品開始。」但她直言入門並不如想像中簡單，當年親赴日本尋找廠商時，因訂單量不足，即使頂着「港姐」名銜，也未必獲得廠商青睞。「要去到日本工業區搵廠，佢都未必歡迎你，因為我哋咁細，又要話畀佢聽我係港姐。」

作為品牌創辦人，Sharon對產品成分的把關極為嚴謹。由於自己擁有港姐的知名度，產品一旦出現問題，輿論反應將會被放大十倍。「有權利必有義務，如果你有啲成分或者各樣嘢，有少少差池，你可能會得到嘅反應會更大。」因此她對產品成分的監管非常嚴格，避免任何錯失。

左起：范振鋒、陸詩韻、婥絲（香港）美容儀器有限公司香港研發儀器創辦人的Nicole Lam「高力豆沙」

Sharon分享創業路與美容血淚史。

Sharon分享了一次眼皮敏感的難忘經歷：「我曾經試過眼皮敏感，一邊紅咗一邊冇，好彩冇腫得好厲害，兩邊都搽上粉紅色眼影遮擋，整勻佢，出嚟喺鼻影打勁啲，睇落就冇咁覺眼。」

談及美容市道，Sharon指疫情期間雖然美容院無法營業，但家用護膚品需求反而大增，生意表現理想。「美容院開唔到，每個人都去唔到美容院，兩個星期唔去美容院，個樣係完全唔同晒嘅。」她透露當時每日收到大量查詢，訂單多至倉庫缺貨。

赴日洽談生意遭嫌棄訂單少。

Sharon又自爆年輕時曾因「進取型」心態，在使用高能量美容儀器時要求美容師將度數調至8（最高為10），結果導致面部出現「貓鬚」般的紅印及腫脹。「我打完之後係有『貓鬚』，一行一行，好似刮痧咁。第二日又要工作，遮都遮唔到。」她坦言自此之後不敢再過度進取，並提醒消費者應按自身皮膚狀況選擇合適療程。

提到業界常有微整形失敗個案，Sharon分享曾聽聞有人進行雙眼皮手術後效果不自然，眼皮吊得太高，導致眼睛看起來大了三分之一，乾眼症等問題隨之而來。她又笑言，若見到朋友整容效果過於突兀，會尷尬得不懂如何回應，通常只能以「近來精神咗」輕輕帶過。阿范亦分享自身經驗，指曾因朋友整容後容貌變化太大，一時未能認出，場面尷尬。

Sharon自爆做機太進取出事。

詳細節目內容，請重溫：
３月26日，晚上11:00 – 00:00，新城知訊台《「鋒」繼續吹》節目，網址：https://www.metroradio.com.hk/MetroInfo/

３月27日，晚上８:00 – 9:00，新城MBO TV《「鋒」繼續吹》節目，網址：https://mbo.metro.hk/