羅力威坦承簽約英皇十年不似預期 被勸參加《中年好聲音》

今年39歲的羅力威，於2009年參加亞視《亞洲星光大道》奪得冠軍入行，是香港選秀界代表兼始祖。2010年還未出碟，他已經入圍當年《叱咤頒獎禮》「我最喜愛男歌手」及「我最喜愛歌曲」五強，人氣一時無兩。2018年羅力威迎娶太太雨僑後，家庭美滿兼育有一對子女。不過在音樂上，他三年前約滿英皇後，已消失於樂壇五年。近日，羅力威為相隔五年轉做獨立歌手後自資推出的新歌《悠揚一曲》接受雷霆881商業一台《星光背後》專訪，剖白暫別樂壇五年因由。節目中，羅力威還談及當年同屆戰友陳蕾及古淖文，近年成績突飛猛進的感受。不過對於坊間力勸他參加來屆《中年好聲音》再創事業高峰，羅力威自有一套看法。

今日（7月26日），下午二時至三時於雷霆881商業一台播放的《星光背後》，主持人梁泰來邀得羅力威任嘉賓。

羅力威集曲詞編監一身的新歌《悠揚一曲》談的是傳承，MV於長洲學校拍攝。翻查資料顯示，雨僑母親曾任長洲學校教師，其IG亦曾透露媽媽於2023年因癌病辭世。問羅力威新歌是否與至親有關，他首度披露五年來家庭經歷多重巨變，至今才有空重投音樂創作，「呢首歌我一直無講明，無乜人知阿僑媽咪係教師。兩年前阿僑媽咪過生，對我哋影響好大，因為我哋無經歷過親人離世。」原來，羅力威及雨僑誕下大女Harper的初期，外母同時發現患癌，再加上囡囡患有「高敏症」，令一對新手父母由喜變悲、措手不及，「BB女出世本來好開心，阿僑媽咪點發現有病？就係幫手湊外孫嘅時候突然好辛苦，再去做身體檢查發現有病。所以嗰個階段，原本諗住三代同堂好開心，但突然成件事反轉晒。因為我要做好照顧者兼安慰者，睇見太太係好心痛。」及至大女三歲高敏症改善及開始入學，羅力威坦言多了空間才創作《悠揚一曲》，他亦披露太太首聽時感動痛哭，「當時只係得電子琴，我叫佢過嚟坐響我側邊，由頭到尾唱畀佢聽啱啱填好嘅詞，佢都好感動都有喊。」

羅力威轉做獨立歌手自資推出的新歌《悠揚一曲》。

羅力威指夫妻收入主要來自雨僑的網店。

神隱五年，更於三年前約滿簽了十年約的英皇唱片，羅力威指夫妻收入主要來自雨僑的網店，「我幫咗手已經成七、八年，好感恩，生意係OK。」他坦承當年簽英皇十年，合作並非暢順，「十年都係一個試用期，坦白講一定係唔夾。但好老實，我同好多人都唔會夾。唔單止係對一間公司，真係好難要求對方諗法同我一樣。」至於選擇自資出歌不再簽公司，羅力威亦說：「好老實，我唔抗拒。但係比較難傾得成，因為我係羅力威，我會假設同我相處嘅人都係羅力威，唔想有溝通上唔順暢。」這回自資出歌因為要計錢，羅力威坦言未知下一首計劃，「希望有唔同渠道嘅支持，support到我下一首。因為我從來都唔想將創意同金錢掛鉤，我唔想金錢影響我創意發揮。」

羅力威被勸參加來屆《中年好聲音》。

羅力威重投樂壇，他指不擔心樂迷善忘，至於五年來見證同屆戰友陳蕾及古淖文先後冒起，羅力威由衷地說：「首先我戥佢哋開心，我知道佢哋堅持追求呢件事好耐！古淖文係天生屬於舞台，每一個識佢嘅朋友都知。就算去茶餐廳，都登台咁嘅款，哈！會好王者姿態咁叫餐蛋治。而我，我好清楚自己要啲乜嘢、鍾意啲乜嘢。譬如如果有人叫我參加《中年好聲音》，我唔會答佢我去定唔去，我只可以回應，呢個人並唔了解我。」

1985年15歲參加《歡樂今宵》模仿葉蒨文大賽入行的陳松伶(松松)，91年憑《天涯歌女》一劇飾演金嗓子周璇爆紅全港，唱片更大賣六白金。惟松松的半生儼如周璇般坎坷，因堅持學業與家人爆出誤會，導致不相往來20年。之後又與長期工作夥伴反目，最終身無分文離港。慶幸松松於05年在上海拍劇認識比她少9歲的內地演員張鐸，令這位天涯歌女定居北京不再漂泊。陳松伶為40周年企劃推出新歌《松伶》，並接受雷霆881商業一台《星光背後》專訪。節目中，松松憶述半生受盡打擊，曾跌入情緒低谷，慶幸認識老公重整人生，明白人生的苦難都是花開有時。

陳松伶憑《天涯歌女》爆紅，卻因學業與家人誤會決裂，更曾與工作夥伴反目，一度身無分文離港。

松松直認由陳少琪填詞的《松伶》如同她的自傳，當中一句「人未長高，已看懂人生」就像當年在家貧的情況下要邊讀書邊拍劇以幫補家計。松松與家人之間產生誤會多年，有指與她當年拒絕放棄學業有關，問她年輕時為何如此堅持讀書，她說：「唱歌拍戲都係被人安排，唔係由我控制。但讀書我可以主導，努力讀就考得好。」與家人誤會多年後，松松再與合作多年的工作夥伴反目，爆出是非，促使她心淡離港。「二零零幾年出咗啲事，我係心灰意冷，成個人失去重心，總之我想離開呢個是非地，當時好混亂，覺得自己嘅無能，但我都要生活，就去上海拍劇，亦喺上海認識我先生。」未認識老公及未與家人和好如初前，松松感謝今天的經理人陳淑芬於05年最黑暗期間向她伸出援手，給予她工作機會。「爸爸同外公先後在05、06年去世，嗰時我最崩潰。好彩《雪狼湖》喺國內巡演，陳太叫我幫手，期間我無返過香港，唔需要接觸傳媒可以休息。陳太的確係扶起我嘅人，佢其實知道我發生咗咩事，但從未問過，我亦一句都無講。總之發生了一啲事，佢一直俾咗一個空間我，令我仲可以有收入支撐自己，我唔會喺佢面前講，但佢呢40年來一直係我嘅恩人，我哋心知肚明。」

陳松伶將於2月28日在伊利沙伯體育館舉行演唱會。

陳松伶婚前檢查發現無法生育，曾主動退讓，老公卻堅定選擇共度餘生，令她感動稱幸遇良伴。

當年松松跟不少還未爆紅的男神，包括黎明、鄭伊健、古天樂、張智霖等合作，之後他們個個彈起，問她為何不曾仰慕過對手，她回答：「當時佢哋個個都有女朋友嘛。」至於06年能在上海與老公張鐸合作內地劇《血未冷》修成正果，松松說：「最重要係佢單身。擦出火花係套劇快拍完時，我一直以為佢年紀比我大，當我知佢細我九年，基本上我就話算啦，唔好啦，反正又未真正有深感情，但佢鍥而不捨地跟我話：『未試過，點知？』當我哋相處幾年後，係OK，佢用行動證明佢所講，佢比我更冷靜，可以梳理我情緒，講出我嘅問題。我亦唔係要對方完全聽我話嗰種人，而佢亦需要我呢種女朋友。」

松松指二人於07年開始拍拖，她用了4年時間觀察及磨合這段文化差異很大的關係是否適合更進一步結婚。「佢極北方，我係印尼華僑極南，譬如佢成日講『胡說』我都以為佢鬧我，但只不過係口頭禪。」至於夫妻二人曾否計劃生下一代，她說：「有呀！梗係想啦！但當我哋準備結婚做婚前檢查，就發現我係唔可以生小朋友。」松松直認這亦是她作為人妻的一個遺憾，「會係一個遺憾，當時一知結果，我已經同佢講，你仲有好多選擇。係！我又第二次落閘，因為都要為佢著想，但佢話：『我就係要我哋結婚。』之後甚至話：『我都可以唔鍾意小朋友！』哈！其實佢都鍾意小朋友，我真係覺得我識到一個好好嘅伴侶。」

陳松伶接受《星光背後》節目主持梁泰來訪問。