星光背後丨肥媽曾「割席」拒給貼士 古淖文靠父母經濟支持追夢

現年38歲的古淖文(Germano Bibi Guilherme)，為少數澳門土生葡人，09年首次來港參戰首屆《亞洲星光大道》失敗，去年捲土重來再參加選秀騷《中年好聲音2》終大熱奪冠成名，之後更於澳門及香港先後舉行4場首次個唱。今年，古淖文終事隔七年再擁有個人派台歌，他為最新推出的《OH YEAH!》接受雷霆881商業一台《星光背後》專訪，憶述當年首次來港比賽的自負，「覺得自己高大靚仔唱歌跳舞都勁，諗住贏硬！」無論當年「星光幫」或是參戰《中年2》以來，古淖文均受盡Haters惡意攻擊，但今天他已見怪不怪，「成日話我人妖呀，肥媽私生子，係得啖笑！」古淖文稱：「只要做好自己，總會有人欣賞你。」

古淖文參加《中年好聲音2》大熱奪冠成名。

作為家中獨子，古淖文幾歲已受梅艷芳影響立志當歌星，求學期間已當上宴會歌手，亦因是少數澳門土生葡人兼讀葡文學校，古淖文2009年已獲安排代表澳門特區，與陳慧琳、張惠妹及孫楠等三地巨星合唱全運會主題曲。故此，他同年獲朋友推薦過江參加《亞洲星光大道》，他坦言最初自視極高，「嗰時自我感覺非常良好，覺得自己高大靚仔唱歌跳舞都勁，震音又夠震，諗住贏硬，點知衰咗！」獲第五名及最佳台風獎後，古淖文簽約亞視留港發展5年，他稱月薪不足以生活，幸有肥媽帶他出埠登台及澳門父母的經濟支持，「月薪得7000蚊，都無辦法，問澳門阿媽攞住先，屋企人佢哋一定幫。」古淖文指幸好沒家庭負擔，父母亦不需他供養才容許他一直追夢，「廿幾歲都問阿爸阿媽攞錢唔羞愧，哈！因為阿爸阿媽係公務員，都有積蓄，亦擔心我呢個獨仔，咁我當時搵唔到吖嘛，我搵到畀返佢哋，都係應份。」

參賽被肥媽割席。

獲父母支持追夢。

2014年古淖文與亞視約滿，適逢有公司邀請他回澳門繼續唱歌，雖然期間推出過一張專輯，但他慨嘆十年間由歌手變成宴會主持，「因為我啲中文葡文都得，好多官方活動就成日做MC，但我心願係唱歌，成日都諗懷才不遇，成日問機會點解唔係我？最終2019年情緒出現問題，但回想無當時嘅遭遇，就唔會變成我而家嘅性格。」

兩年前36歲決心再來港參戰選秀騷《中年好聲音2》，古淖文重申與肥媽無關，「佢無畀任何貼士，仲同我割席添。」當年與今天，古淖文同樣備受Haters 攻擊，「成日話我人妖呀，肥媽契仔兼私生子，係得啖笑！」但今天古淖文EQ已不同，「唔嬲，因為明白無辦法取悅所有人，最緊要了解自己、愛自己，要知道自己係乜嘢人，要做好自己想做嘅嘢，當你做好每一件事，無論唱又好，演唱會都好，自然會有人欣賞你，歌迷同貴人就會出現。你唔去做好，就乜都無。」至於樂壇前輩甄妮都指他「油膩誇張」，古淖文說：「唔介意，反而開心，殿堂級前輩都留意我，就要虛心學習。」

新歌《OH YEAH!》

去年衣錦還鄉於澳門完成兩場首次個唱，古淖文百般滋味，「最初比賽係鍾意唱歌，為自己唱，無諗過贏咗冠軍，澳門所有朋友嘅Facebook都洗晒版，就好似運動員攞金牌咁，我好似為自己嘅城巿做咗啲事。到返澳門開騷，老竇好感動，阿媽都係照舊表面冷淡，但佢一個擁抱，我就知佢好感動。」

今日（10月18日），下午二時至三時於雷霆881商業一台播放的《星光背後》，主持人 梁泰來 邀得古淖文任嘉賓。

入行50年，縱橫歌影視播、幕前幕後公認瓣瓣掂的鄭丹瑞(阿旦)今年踏入人生70之齡，快將成為外公的阿旦永不言休，更揚言活到老學到老。他今年公開拜27歲音樂鬼才陳恩碩為師，並於10月正式於港島西區新劇場推出二人合力監製的全港第二齣長壽音樂劇《小男人周記》。阿旦接受雷霆881商業一台《星光背後》專訪，憶述《小男人周記》由80年代經典廣播劇變身千萬票房電影的傳奇經過。節目中，曾三入三出商台的阿旦，自揭入行50年人生最大遺憾，他說：「人生最大遺憾係《6 PAIR半》呢張碟無我！」

鄭丹瑞入行50年，縱橫歌影視播、幕前幕後。

阿旦1978年由商台轉戰麗的電視，83年再獲邀加盟港台後，憑《小男人周記》廣播劇創出於港台的首個事業高峰，故事除了衍生一系列暢銷小說外，更於89年起被拍成三齣電影及兩齣電視劇。當年首齣《小男人》電影票房賣過千六萬，阿旦於節目披露最初本來是邵氏斟拍，演主角梁寬，亦另有其人，「最初係邵氏先，導演黃泰來話想拍《小男人周記》，到我搞好劇本畀邵氏，就諗搵人演梁寬。第一個係搵許冠傑，佢話好鍾意故仔，但就話：『我八嚿腹肌，一啲都唔小男人！』之後我搵阿倫，阿倫話好想演，但話要忙巡唱，要兩年後；我再搵最神似嘅阿Lam，阿Lam聽完故仔話：『你信我啦阿旦！係你自己做至得！』咁你即係推我啫，我無票房保證，方逸華點會肯？我都試過搵學友，學友又係忙到癲，咁成件事就停咗。」阿旦指《小男人》能拍成電影，一定要感謝當年執掌嘉禾的蔡瀾，「擺低咗件事成年，就係蔡瀾先生有一日同我食飯，話睇咗我本書，話一定要拍戲，仲話：『你做！我話得就得！』」

阿旦憶述《小男人周記》由80年代經典廣播劇變身千萬票房電影的傳奇經過。

當年首齣《小男人》雲集一眾如鄭裕玲、鍾楚紅、胡慧中、李美鳳等當紅女神參演，阿旦說：「老婆阿Ann，我哋從來諗住Do Do嚟寫，蔡生叫我搵佢，但《小男人》擺明係襯你鄭丹瑞，最初都估佢唔肯，我就嘗試喺TVB一齊做司儀嘅時候問佢，佢就話：『有錢咪得囉！哈！』鍾楚紅當時咁紅，都係好多合作過朋友一齊遊說，畀埋劇本佢睇，先至成就咁多女神襯托我呢個無名小子。」

今年阿旦70歲快將成為外公，回望入行50年創出事業多個高峰，原來亦有不少挫敗及遺憾。節目中，他坦言人生最大遺憾是來自三入三出的商業電台，他亦把經過記錄於剛推出的新書《我失敗希望你成功》中，他說：「我人生第一份工就係商台，我本來係第一代元祖『6 PAIR半』，當時就嚟浸會畢業，做緊中午節目《阿旦日記》，我做得好差，但我以為自己做得好好，到畢業麗的搵我過去同林奕華一齊做年青人節目，我就同俞琤(YT)傾想兩邊都做，點知YT話：『你連自己節目都未做好，我唔同意。』當年我年少氣盛，咪拍枱唔做商台囉，做電視喎，覺得自己叻咗喎。」

由鄭丹瑞授權，爆炸戲棚藝術總監陳恩碩包辦作曲、填詞、編劇、導演，並由二人共同監製的音樂劇《小男人周記》，於10月正式於港島西區新劇場推出。

雖然阿旦過檔麗的有份創作《天蠶變》、《天龍訣》、《IQ成熟時》等經典，但他坦承俞琤一答應他請辭已即時後悔，但最後悔還是看到商台於1980推出了一張經典唱片《6 PAIR半》，「麗的我做得好開心，但我人生最大遺憾同挫敗就係，突然之間一張《6 PAIR半》唱片橫空出世，入面點解無我？呢個係我到今日，人生嘅最大遺憾。所以到我88年返商台做二台台長，我第一時間做《叱咤新一代》嘅碟，裡面就有首《留給最愛的說話》，同埋之前喺港台，我亦第一時間做咗首《無可奉告》。呢一批歌，都係我想做返《6 PAIR半》，我要有我份呀！到今日，我仲係耿耿於懷。」三入三出商台的阿旦，最感謝人生伯樂俞琤對他的鞭撻，原來新書《我失敗希望你成功》，俞琤亦義務為他做校對，更為他親筆撰寫書中最後一章。

今日(11月29日)，下午二時至三時於雷霆881商業一台播放的《星光背後》，主持人 梁泰來邀得鄭丹瑞任嘉賓。