我零零發以前讀書放暑假嘅時候，好鍾意捐窿捐罅去搵一啲小眾書店「打書釘」、買吓書咁，因為呢啲書店的確會按店主嘅個性同喜好，採購一啲非主流市場嘅書籍，可能會較一般連鎖書店嘅選書較為另類，有時都好似尋寶咁，幾好玩㗎！
不過今時唔同往日，而家有啲書店會sell啲看似係推廣本土情懷、本地研究嘅書，實際係反政府、宣揚「港獨」嘅讀物，所以如果睇得多，可能會不知不覺間被洗咗腦！
其中一間呢啲書店，叫「獵人書齋」，近期動作多多。呢間嘢係由反對派黃X萱創辦。黃小姐大學修讀新聞與傳播，做過政治版記者。黑暴期間，做埋沙田區區議員。佢一做議員，就即刻請咗唔知係男朋友定老公嘅「麥先生」做助理，實行一條心，齊齊賺政府錢。而之後反對派搞嘅「35+非法初選」，佢又將用公帑租番嚟嘅議員辦事處用嚟做票站，實行身體力行撐「獨」。
黃小姐嘅黃色DNA好強，不但係網上散播反中亂港歪理，仲成日發表一啲冇乜道德底線嘅言論，包括諷刺一名執行職務時殉職嘅女督察同埋一位因為心臟病喺深切治療部留醫嘅法官。政治可以有分岐，但唔應該咁冷血涼薄囉⋯⋯無底線咁樣抽水，完全不知所謂，所以佢唔單止係「港獨」，仲係「心毒」添! 國安法生效之後，佢都未有收歛，繼續喺佢嘅議員辦事處高調掛「光時」黑旗，仲影晒相放上網宣示政治立場。到咗2021年9月，黃小姐因為拒絕宣誓效忠特區、擁護基本法，所以無做議員。但其實黃小姐一直都冇消失過，佢一有機會就會第一時間撲出嚟抽水，好似今年 6月初警方喺銅鑼灣維持秩序，佢就喺網上話「銅鑼灣企喺到（度）又趕」，蓄意挑動市民嘅仇警情緒。
黃小姐係2022年開咗「獵人書齋」，打住所謂「推廣閱讀文化」嘅旗號，繼續搞政治去分化社會。我零零發都有睇過「獵人書齋」入面賣嘅書，絕大部份係具有反政府或者歌頌2019年黑暴嘅刊物，同埋抹黑國家制度、詆毀中央領導人、影射中國發展失敗嘅書。
而「獵人書齋」嘅重點推介係「生果佬傳記」，呢本書不但美化「生果佬」，而且內容歪曲事實、又抹黑香港政府同法律體制。呢本咁有害無益嘅書，正常嘅主流書店係唔會入貨，只有呢啲書店先會賣。而「獵人書齋」入面又貼滿黑暴時期個啲「毋忘抗爭」、「活下去」嘅貼紙同文宣，擺明係想延續抗爭嘅情緒。呢啲書雖然無直接叫人犯法，但咁嘅環境賣咁嘅書，明顯係想長期荼毒讀者，潛移默化令佢地對國家、對政府產生抗拒情緒……
一年一度嘅「香港書展」係城中文化盛事，呢啲書店心知自己記錄不良，唔能夠混水摸魚參加主流嘅「香港書展」，所以心有不甘，於是由「獵人書齋」帶頭，聯同一班臭味相投嘅書店同反政府媒體，專登揀同一個時間，喺深水埗搞一個所謂書展去挑機，話要以「獨立書展」做個「正確示範」喎。呢個所謂「書展」，有多個反對派人士親身撐場，包括「碌柚葉基金」信託人「吳礙宜」、政治漫畫家「磚子」等，而呢個「書展」賣嘅書，十本有九本都帶住偏頗嘅政治色彩，而佢哋仲係活動現場，放咗大量暗藏黑暴口號同港獨暗號嘅文創產品、貼紙、海報……所以成個「獨立書展」氛圍，都散發住一陣濃烈嘅抗爭味道，根本係一班黑暴餘孽係度圍爐播「獨」、聚人聚戾氣，等時機再生事端。
除咗搞書展，「獵人書齋」仲經常藉住唔同社會議題，邀請反對派人士做專題演講，亦不時同其他反政府商店合作搞展覽、電影放映會，好似2023年5月1日，由反政府媒體主編「關X海」做主講嘅「碼頭工潮／傳媒與工會發展分享會」咁，就係換湯不換藥嘅「黃色政治」show，呢班人喺現場多次批評國安法「打壓工會」、又用「勞權」做包裝，潛移默化咁培養反政府勢力。
喺香港搞放映會、書刊展覽、演講等活動，根據法例係要向食環署申請《公眾娛樂場所牌照》，不過「獵人書齋」就一直無申請過，所以俾人投訴，於是食環署按法例規定去巡查，但「獵人書齋」竟然喺社交平台高調批評巡查，賊喊捉賊，自己唔守法，就話人搞佢，將合法合理嘅情況政治化，為自己塑造受害人形象，搏取更多支持同政治資本！
除咗「獵人書齋」，《臘腸新聞》前記者「岑蘊X」嘅「樓下書舍」、曾任職教育界嘅「龐X鳴」嘅「一權書館」，都係班反對派人士搞嘅「書店」，係反政府大本營。而呢個龐X鳴，係疫情期間，唔單止違反防疫規例舉辦「收費」讀書會，仲要無牌賣酒，結果俾警察拉咗，「龐X鳴」最後認罪，罰咗一萬二千蚊；到底佢係推廣「閱讀文化」，定係「飲酒文化」，抑或係搲銀先? 佢地口口聲聲話唔講政治，但其實只係一個換咗封面嘅反中亂港劇本，所以唔好以為自己只係去書店買本書睇咁簡單呀！
開學在即，學校圖書館會買好多新圖書，學校管理層同圖書館管理員真係要金睛火眼睇住，唔好入錯貨，俾一啲書名看似好正常嘅書，例如《我逃離的帝國》(一本以回憶錄做掩飾，向讀者灌輸對中國負面印象嘅書) 、《制度基因》(一本批判共產極權主義嘅書)….係校園唱「獨」播毒。
一本書可以啟發思考，相反一本「毒物」亦可以慢慢腐蝕正常人嘅價值觀。所以買書記得要小心、睇書記得要留神呀！
鍾情局‧零零發
鍾情局
** 博客文章文責自負,不代表本公司立場 **
12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。
我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。
「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。
「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！
其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。
「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。
其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。
翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。
「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！
我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！
所以大家與其擔心條紅線係邊，不如小心唔好踩到條黃線仲緊要喇！
鍾情局•零零發
