「人生有幾多個十年」，相信大家對呢句經典電視劇對白絕對唔陌生。十年絕對唔係一個短嘅時間，尤其係失而復得的，更加要好好珍惜！
我零零發咁有感觸，係因為最近有報導指「35+顛覆案」嘅主犯趙家賢已經出獄，成為《維護國家安全條例》生效後，第一個獲提早釋放嘅國安罪犯。
趙家賢而家40歲，正值壯年，佢由細到大喺香港讀書，喺學生嘅時候已經立志服務社區，可惜佢遇人不淑，加入咗亂港「白鴿黨」被徹底洗腦，2007年22歲嘅佢就被力捧，成功當選為東區區議員，仲創下成為最年輕議員嘅紀錄。但少年得志大不幸，喺「白鴿黨」吹捧下，佢喺亂港路上愈踩愈深，之後仲認識埋戴妖，搞到泥足深陷。
係「35+顛覆案」嘅審訊，趙家賢選擇做從犯證人。佢係庭上講，當年同意協助搞所謂初選，原意只係想建立一個平台，俾市民透過投票表達意見，改變吓個社會。但同戴妖合作期間，發覺越嚟越唔妥，就好似上咗賊船，當知道戴妖嗰個「攬炒十步曲」之後，更直言感到「心寒」，因為戴妖嘅計劃，完全超出咗佢原本嘅諗法，同時佢亦覺得好嬲，因為呢個「攬炒」顛覆圖謀，絕對唔係佢多年協調「泛民」嘅初心，所以佢覺得係「被騎劫」、「被利用」嚟推冧政府。佢仲話喺《香港國安法》生效前後，都有問過戴妖所謂初選係咪違法，戴妖當然話唔犯法啦，但之後發現錯信咗戴妖，但一切都太遲。戴妖整場「攬炒」同包庇黑暴份子嘅圖謀，真正「攬炒」咗一班「35+顛覆案」參與者，以及俾佢哋煽動而違法嘅年青人同市民，要承受牢獄之災，最終仲害咗成個社會。
趙家賢最後被判「串謀顛覆國家政權罪」罪成，法官當時嘅量刑起點係15年，但因為佢做從犯證人幫控方舉證，所以獲減刑至7年。之後再因為佢坐監嗰陣行為良好、展現出真誠悔意，喺今年10月28日就獲提早放返出嚟。屈指一算，由2021年2月還押到今年10月獲釋，佢實際只係坐咗4年8個月，比起原本15年嘅刑期，足足坐少咗十年有多！如果佢當初無選擇做從犯證人、無好好反省自己嘅錯，佢就會多失去十年，仲要屋企人操心多十年。
犯咗事，要坐監，相信大家都認同係理所當然，而嚴懲國安犯更係國際慣例。不過喺香港，任何囚犯，包括國安犯，都會有提早釋放嘅機會，但呢啲機會從來都唔係必然嘅，而係特區政府特意立法，賦權俾懲教署去酌情處理，希望啲真心悔改嘅囚犯，可以提早重投社會、改過自新！
根據《監管釋囚條例》第6條，任何囚犯坐咗三分之二嘅刑期之後，如果工作勤奮同行為良好，都有機會提早獲釋。但為咗更有效保障到市民同香港社會嘅整體利益，免除國安風險威脅，所以係《維護國家安全條例》下加多咗個條件，就係只有得到懲教署署長信納，呢啲行為良好嘅國安犯唔會「不利於國家安全」，先至可以提早釋放。
法例寫得咁清楚，但都會有囚犯以為提早釋放係老奉嘅，好似因為「煽動分裂國家」罪成判囚5年，被稱為「第二代美角隊長」嘅國安犯馬X文，因為不滿無得提早出獄，所以喺上年提出司法覆核，結果被高院上訴庭駁回。睇番個審訊，當時就揭露咗馬X文喺監獄入面，仍然有接觸黑暴份子……佢咁嘅行為，大家點睇？
我零零發就趙家賢今次提早獲釋一事，歸納到兩個重點。第一，趙家賢可以被判相對較短嘅監禁，主要係因為佢及時覺醒，並充份展現到悔意，並且喺單案審緊嘅時候，選擇咗做從犯證人，挺身而出幫控方頂證戴妖嘅「攬炒」顛覆圖謀。
第二，今次趙家賢呢個活生生嘅實例，就足以證明香港嘅國安法，係恩威並施，唔係鐵板一塊，絕對會俾真心悔改嘅國安囚犯提早獲釋，並唔係好似西方媒體同外部勢力咁，講到《維護國家安全條例》剝削香港囚犯權利，令所有國安犯都唔會有被提早釋放嘅機會。事實係，只有嗰啲死不悔改、冥頑不靈，繼續想威脅國家安全嘅亂港分子，先會被排除在外。
趙家賢選擇做從犯證人，將功補過，協助舉證國安罪行，正如佢喺庭上面講，只係將犯法嘅真相如實咁講俾法庭聽，唔係屈人，又唔係講大話，咁樣先係真正嘅伸張正義。佢而家就可以把握機會盡早展開人生新一頁，爭取返自己嘅青春、前途，同埋冇再多失去人生中重要嘅十年光陰。
希望趙家賢嘅經歷，能夠令更多國安犯反省，回頭是岸啦！
鍾情局‧零零發
鍾情局
** 博客文章文責自負,不代表本公司立場 **
最近「生果佬」終於要為佢多年來嘅惡行「埋單」，俾官老爺重判20年監禁！有人問：「佢衰啲咩要坐咁耐？」不如睇吓喺單案嘅審訊爆咗啲咩出嚟？
鼓吹制裁 摧毀香港
「生果佬」表面上係「生果報」老闆，實質係打住「新聞自由」嘅旗號，長期通過情報系統出身嘅助手Mark Simon穿針引線，游說美國不同政客及官員制裁中港兩地官員。
2019年，「生果佬」親赴美國與時任副總統Pence及國務卿 Pompeo會面，卑躬屈膝乞求對香港及中央實施「制裁」。「生果佬」仲透過 Mark Simon促成美國前副參謀長Jack Keane、美國前國防部副部長Paul Wolfowitz，為台灣蔡英文提供顧問服務。除此之外，為咗討好美國，「生果佬」甚至草擬特區官員嘅制裁名單，全面配合「侵侵」政府打壓香港。試問一個正常搞報紙嘅人，點解無端端同美國權力核心咁「friend」先?
係審訊入面，其中一個控方證人喺庭上指出，「生果報」嘅社論曾呼籲美國及其盟友根據《馬格尼茨基人權法案Magnitsky Act》制裁中國同香港官員。唔單止咁，「生果佬」曾經喺「生果報」自己嘅專欄度發表文章，公開倡議對中國實施科技制裁；而佢更直接指示時任「生果報」高層，協助袁弓夷喺「生果報」平台公開發布制裁中港嘅影片，呢個袁弓夷喺片中敦促時任「侵侵」同國務卿Pompeo駐軍保護香港青少年，呼籲外國投資者從香港撤資，又呼籲英國收回香港主權……
制裁唔係大家想像咁簡單，而係現代經濟戰嘅「核彈」。為咗達成政治目的，美國之前就曾經用「制裁」呢一招去打擊非洲中東多個國家，令到嗰啲國家經濟一蹶不振，破產收場。而「生果佬」仲陰險，策劃所謂「三條戰線」，聯合「街頭、議會、國際」， 搞煽動、推動街頭抗爭、推翻政權，乞求制裁，企圖癱瘓經濟；佢背後又操控反華組織「重光團隊」，出錢出力，日日向外國唱衰香港，誓要拖中國同香港市民去萬劫不復嘅深淵。
散播假新聞 挑動仇恨
除咗搞制裁，「生果佬」仲不斷利用「生果報」搞假新聞，例如：2008用偏頗嘅報道去反高鐵，煽動群眾包圍立法會同衝擊警方，到2019年黑暴已經徹底失控，又不斷散播「爆眼女」、「太子站事件」等假新聞，甚至誣衊警察性侵示威者，煽仇煽暴，將香港推入撕裂與仇恨嘅漩渦。
「生果佬」恃住「新聞第四權」，拎「生果報」嘅謊言當子彈，日日瞄準班後生仔，教佢哋「違法達義」、搞「港獨」，哄騙佢哋以為上街就係改變世界，鋪天蓋地散播謊言同煽動性報道，結果大批後生仔信咗佢啲鬼話，連群結隊上街暴力違法，以為攬炒就係出路。最後呢？唔係坐監就係流亡，搞到自己前途盡毀，無數家庭破碎，社會陷入混亂之中。
睇返2021年7月1號嗰晚，有個叫梁X輝嘅男人喺銅鑼灣百貨公司外，用刀襲警後自殺單case，警方其後喺佢屋企搜到大量「生果報」舊報紙。心理專家喺死因庭上分析話，佢長期俾「生果報」餵「心靈毒湯」，深受極端攬炒思想影響，最終策劃「孤狼式襲擊」，成為「生果報」洗腦工程下嘅犧牲品。
美西盲撐 勾結外國最佳證據
成個公開聆訊歷時156日，有超過2000項證物、8萬頁文件，證據堆到成座山咁高，但外國勢力竟然仲擘大眼亂噏！判刑一出，美西方一眾政客同反華媒體無視鐵證如山，即刻跳出嚟，再次上演雙標醜劇，大肆抹黑特區政府，開口埋口就係港府打壓「新聞自由」，又歪理連篇要求「釋放生果佬」。佢哋呢種顛倒黑白嘅行徑，不僅公然違反國際關係基本準則，更徹底暴露出「生果佬」其實同佢哋係坐埋同一條船，狼狽為奸。
喺審訊期間，西方從未停止過造謠抹黑，又話「生果佬」喺獄中受虐、無醫療，又話佢連宗教權利都冇，甚至話佢身體差到指甲脫落，但事實呢？法庭宣判當日，「生果佬」步履穩健、自行入席，精神狀態良好，完全打咗呢啲謊言嘅臉。就連佢嘅律師都親口承認，「生果佬」喺獄中一直獲完善醫療，亦無任何投訴。呢啲造謠手段，只不過係西方抹黑香港嘅慣用伎倆。
其實每日唔同國家嘅領事、外國媒體都有去聽審，有晒即時傳譯個喎，係咪佢哋聽唔明，抑或係瞌緊眼瞓睇唔到，報錯料俾老闆知啊？
自食其果
除此之外，仲有啲西方組織，例如「無國界記者」，跳出嚟強烈譴責判決，話「生果佬」被判20年監禁，對七十幾歲嘅佢嚟講「幾乎係死刑」，認為判得太重。判得重？咁不如睇下西方嘅國安法判刑情況: 美國國會山騷亂案，「驕傲男孩」主犯重囚22年；英國6個襲警暴徒判124年。自己啲國安法就辣到出汁，但一提香港就鬧到飛起！咁係唔係虛偽雙標？
「生果佬」觸犯國安法，經公正審訊被判刑，係法治體現；相反，美國非法綁架委內瑞拉總統馬杜羅返美受審，先係踐踏國際法。西方政客死撐「生果佬」，卻對馬杜羅隻字不提，呢個係咩邏輯？
上面講「生果佬」嘅惡行只係冰山一角，佢啲所作所為喺官老爺嘅855頁判詞入面詳列得清清楚楚，受審判刑係因為佢罔顧法律，禍害香港，法庭只係根據法律同證據作出裁決。判詞講得好清楚，「生果佬」有持任何政治觀點嘅自由，但問題係，佢選擇去違反《國安法》，繼續鼓吹外國干預同制裁，無視法律底線！
鍾情局•零零發
