最近一位年近70歲嘅老竇，因為幫個女處理保險單，俾警察拉咗，最終罪成要坐監。呢單唔係普通呃保險嘅case，而係首宗涉及「指明潛逃者」違反《維護國家安全條例》定罪嘅案件，因為案中主角分別係竄逃海外嘅「指明潛逃者」郭鳳儀同佢老竇。
話說呢個郭鳳儀喺過去六年，以反華組織「HK民主委員會」執行總監嘅身份，多次出席美國所謂「聽證會」，企圖撤銷香港駐美經貿辦特殊地位，打擊香港經濟。2023年7月，佢因為涉嫌違反《香港國安法》下的「勾結外國勢力危害國安」罪而被懸紅100萬元通緝。 2024年12月更被列為「指明潛逃者」，當時特區政府已經公布根據《維護國家安全條例》針對有關潛逃者施行嘅措施，包括禁止任何人為「潛逃者」提供或處理資金等。
至於呢單case，原來郭父喺郭鳳儀細細個嘅時候幫佢買咗份「親子升學儲蓄計劃保險」。根據保單條款，當郭鳳儀成年後，就會自動成為保單持有人，而郭父嘅權益就會終止。
喺2025年1月(即係郭鳳儀被列為「指明潛逃者」一個月後)，郭父就以女兒郭鳳儀「不在港」為由，向保險公司要求取消保單，當時保險經紀回覆，保單取消後，會用支票將保單結餘大約8萬港元出俾持有人（即郭鳳儀）。
由於郭鳳儀被通緝而無法回港兌現支票，於是佢就叫老竇喺2025年2月飛去搵佢簽份「更改保單持有人」文件，諗住以為轉咗老竇個名，就可以攞返嗰八萬幾蚊。點知郭父返到香港之後，保險經紀話佢用咗份舊form唔收貨，要重新簽署；郭父可能想快啲搞掂攞返啲錢，於是就冒郭鳳儀簽名去取消保單，將保單結餘轉移。
天網恢恢，警方經過調查後，喺2025年4月30日，以《維護國家安全條例》中「處理屬於潛逃者的資金」罪拘捕郭父。案件經過審訊後，法庭裁定郭父罪名成立，並判處監禁8個月。
根據《維護國家安全條例》，「指明潛逃者」不但會被撤銷特區護照，而且亦禁止任何人(包括親屬、朋友、甚至「唔識嘅人」)向「潛逃者」提供資金、參與不動產相關嘅活動等等，目的係要從根本切斷「潛逃者」獲得資金支援嘅渠道，令佢地喺海外無錢繼續做損害國家抹黑香港嘅惡行!
有人話單案係唔係「連坐」、「集體懲罰」? 其實官老爺喺判刑時已經特別強調，不論意圖，只要直接或間接處理「指明潛逃者」資產，均屬犯罪。郭父係案發時已經知道自己唔係涉案保單持有人，但又繼續協助處理一名「指明潛逃者」被凍結嘅資產；郭父被定罪，係因為佢嘅實質行為，唔係因為「父女關係」，所以唔存在所謂「連坐」。
又有人話會唔會郭父唔知個女係「通緝犯」同埋「指明潛逃者」? 警方喺郭父Youtube帳戶紀錄入邊 ，搵到佢睇過4段片提及郭鳳儀係通緝犯，好明顯佢係知道個女嘅「底」，咁都去處理佢嘅資金，仲唔係知法犯法?
仲又有人話，條法例會唔會好harsh? 其實其他國家早已經有針對協助潛逃者嘅法例。好似郭鳳儀主子嘅《美國法典》第18篇1071條中，就講到明「隱瞞逮捕人員」喺屬於違法。意思即係明知某人被發出逮捕令後，窩藏或隱藏該人，包括透過具體嘅財務援助，好似租房、提供生活物資、協助潛逃者匿藏行蹤等等，呢類「實體協助」足以構成「窩藏或包庇逃犯」罪行，定罪後係會判監或者罰錢㗎。
為咗保護國家安全，英國亦都有法例可以將一啲人列入被制裁名單及凍結佢嘅資產，任何人處置制裁名單人士被凍結嘅資金，或者向其提供資金及經濟資源，都可以構成違反金融制裁嘅刑事罪行，會判處監禁七年並罰款數百萬英鎊。
郭鳳儀為咗區區八萬蚊，要老父「鋌而走險」去改張保單攞錢，相信係佢被列為「指明潛逃者」之後，無咗特區護照，而政治庇護或者難民身份又未有着落，所以佢應該唔可以周遊列國去唱衰中央同特區政府，明顯失去咗Market Value，少咗利用價值就少咗收入，加上佢喺美國應該都唔係「撈」得好掂，所以為咗嗰幾萬蚊，父女情都係咁先！親情都叫做有價，你估手足何價呢？
這邊廂阿爸喺香港坐監，那邊廂阿女就話知你，繼續與不同外國反華組織，以及外國政客勾連，繼續佢各種叛國嘅行為、抹黑香港，令歐美政府打壓香港同國家利益。任何人如果資助佢，都係等同出賣香港，等同合謀叛國，我零零發相信全世界冇一笪地方，會容許呢啲叛國嘅行為囉！
鍾情局•零零發
鍾情局
** 博客文章文責自負,不代表本公司立場 **
上期講到美角執到「生果佬」呢隻千年難得一遇充滿賣國基恩嘅棋子，而家睇吓佢哋幫「生果佬」reset咗個咩人設先！
捍衛新聞自由工作者？
「生果佬」1989年賣民運T恤發咗國難財之後，就搞咗份報紙同周刊。 其實好多香港人都係睇「生果報」大，佢嘅套路主要都係揭人私隱同嘩眾取寵，用狗仔隊去跟蹤名人作故仔，呢啲小報式、簡單而又充滿娛樂性嘅報道手法，好多人都好受落同埋習慣曬；而呢份「生果報」又成日用煽情嘅手法，去報道一啲社會和國家相關嘅議題，制造事端，挑撥民怨民憤，潛移默化地將反政府、反祖家嘅種子，就散落係幾代讀者嘅心裏，目的就係等機會爆發！
咁「生果佬」點解佢會無喇喇去攪報紙、攪雜誌？因為無咩組織嘅影響力同滲透力，會大得過傳媒! 而當「生果報」踩過界嘅時候，本地「毒媒」同美西方就會一唱一和，話香港無新聞自由，話「生果佬」係維護新聞自由嘅犧牲者咁囉！嘩，呢個人設實在太高明了！
虔誠教徒？
話說「生果佬」1997年入教，搵咗美角一家大報高層「麥昆」做教父，點解「生果佬」會搵美角人，又係做傳媒嘅人做教父嘅？唔通崇拜佢後台夠硬凈，定係可以經常交流報業心得呢？
而家啲外媒成日話「生果佬」係虔誠嘅教徒。我唔明「生果佬」做過啲乜嘢會令大家覺得佢好虔誠呢?「虔誠」呢個加持係邊度嚟㗎呢？唔通佢關照「陳大教主」搭飛機坐頭等艙，可以同佢食飯吹水，就可以高級過其他教徒？唔通出咗錢就係虔誠啲？
民主梟雄？
聽聞同「生果佬」共事過嘅人都會用「一言堂」嚟形容佢，一個本質唔民主，對好多嘢都唔覺得重要嘅人，點解會跑在民主最前線嘅，做咗「犯民」icon嘅？無他嘅，佢一直都用張「生果報」去宣揚美式民主，又踩底祖家，加上佢有錢，養咗唔少犯民線人，好似「陳大教主」、「陳四萬」、「袋巾梁」、「長毛賊」等等！咁好自然，佢就成為「犯民」嘅領頭羊啦！
「生果佬」嘅後半生好似好風光，佢不但被神化為一個虔誠天主教徒，一個白手興家嘅企業家，而且係傳媒大亨，可以同大教主、前高官平起平坐，又可以去美西方見吓啲政要……而自從拉咗佢「串謀勾結外國勢力危害國家安全」罪之後，金主仲加多咗戲份俾佢，就係做受政權迫害嘅「囚犯」！係美西方部署下，「生果佬」即刻被360度無死角咁利用，去抹黑香港嘅司法制度同囚權嘅情況；嗰啲無理指控同謬論，真係無日無之，嗡得就嗡， 不過真係有唔少人被誤導咗㗎！
單獨囚禁，剝奪人權 ?
「生果佬」被單獨囚禁呢個安排，由還押嗰日，到今時今日被判刑，一直都被大肆炒作。事實係「生果佬」自己要求單人囚禁，而諗落都覺得正常吖；試問堂堂一個傳媒大亨，點會肯同其他犯一個倉喎！加上佢都係一個「星」級囚犯，點都會自動upgrade 去「獨立倉」啦！仲有，個個囚犯都係「放風」先至可以吸收下陽光同新鮮空氣㗎啦，依家係坐監，你估住酒店咩，日日去曬日光浴呀！
冇適切治療，死於監倉？
「生果佬」個仔叫黎x恩，喺2020年底巳經離開咗香港，咁多年都冇返過香港，冇見過老豆，冇傾過電話，但佢就成日喺外邊講阿爸好慘，有非常嚴重嘅糖尿病，精神又差，又冇得治療，可能會死喺監倉咁話！最近連走咗佬個女黎X，都喺海外同黎X恩一唱一和，講到老竇病到就嚟「si」咁，唔通真係想快啲分身家？
想當年，好多越南人都特登偷渡嚟香港犯案搏拉，目的就係想免費享用一等一嘅醫療，免費醫番好啲奇難雜症，出冊後又一條好漢。另外，一個囚犯要睇病，因為保安風險理由，佢一定唔使好似普通市民咁要等幾粒鐘，所以我零零發夠膽話，囚犯隨時會得到比市民更便捷同更有效率嘅醫療服務呀！
喺2024年11月，「生果佬」自辯去駁斥主控嘅時侯，中氣十足。而喺舊年8月結案陳詞嘅時候，「生果佬」話個心唔舒服，懲教署就即刻安排咗部心臟機去監察住佢嘅健康情況，又日日有救護員standby喺法庭。早兩星期判刑見到「生果佬」，佢確係清減咗啲，但精神好好。好多人用10幾廿萬去美容、健身院，都係想要有呢種「健康瘦」，所以呢啲天花板級頂流嘅醫療服務，喺邊度搵呀！
冇得領聖體？
一班連監都無探過嘅海外律師團隊，就話係代表「生果佬」，成日大大聲同聯合國提出緊急申訴，話特區政府唔尊重宗教自由、懲教署拒絕俾生果佬領聖體等等；而啲外國天主教媒體又冇fact check，就撲出嚟和應，真係亂嗡當秘笈，你話佢哋唔係夾埋都冇人信喇！不過「生果佬」嘅本地律師團隊，一早就話佢哋係唯一代表「生果佬」嘅律師團隊，又澄清係「生果佬」選擇唔使神父為佢做彌撒、領聖體咋！如果咁講，嗰班海外大狀係咪呃人？有冇知法犯法呢？真係要請高人指點迷津喇！
「生果佬」而家被判20年監，外力又用盡所有辦法，大喊話要無條件釋放佢，連冬奧冠軍唔同佢求情都好似欠咗佢咁，你估搵幾個紅鬚綠眼外國官員同議員加持就得咩！香港法庭嘅審訊公開公正，又有上訴機制，而班外國領事又日日去聽審，發生咩事根本一清二楚。所以美西方嘅牌面當然好似「幫緊你、幫緊你」，但實情就係想無限loop 啲謊言，不斷重複「生果佬」嘅人設，去瞞騙所有對單案一知半解嘅人，利用單案去污名化中國。 其實佢哋不知幾開心生果佬判得咁重，因為呢20年都唔使再度新橋，而且佢哋更想「生果佬」可以壯烈犧牲，咁先可以有更多話題去唱衰中央同特區政府。雖然係咁，但「生果佬」都無得say，只可以繼續做鵪鶉，任由宰割。「生果佬」嘅生死，邊到會有人理㗎！
我零零發諗，當初連美西方都估唔到，「生果佬」呢隻蘋果棋可以咁襟玩，唔單止好人好姐嗰時可以利用，而家連衰咗坐緊監都用得，再難聽啲，就算躺平地府，相信都可以繼續無限loop，被消費！
鍾情局●零零發
