香港最近修訂《香港國安法》第43條《實施細則》，反中亂港分子同反華外部勢力又即刻彈晒出嚟大做文章，玩標題黨、斷章取義、放大某幾隻字，務求製造白色恐怖，令市民誤以為警察可以「隨意」要求巿民解鎖手機，拒絕解鎖就要坐監。
事實就梗係唔係咁啦，相關法律條文講得好清楚，簡單嚟講就係偵查國安案件嘅執法人員，若獲得法官批出嘅手令，可要求相關人士提供電子設備嘅解鎖方法，如無合理辯解而拒絕，可被判罰款及最高1年監禁。
換句話說，執法人員係必須根據國安原因向法院申請手令，並唔係隨隨便便喺街度就叫人攞個電話出嚟俾密碼。啲黃媒、黃人、外國反華政客亂講話執法人員可以「隨意」要求巿民解鎖手機，根本就係再一次「妖魔化」法律原意嘅老把戲!
其實，呢套《實施細則》並唔係而家先突然冒出嚟嘅，早喺2020年《香港國安法》生效後就已經有《實施細則》，列明執法人員就國安案件進行搜查、凍結財產、移除危害國安訊息、截取秘密監察等程序及權力。
咁點解要修訂《實施細則》? 原來係因為過去幾年，執法部門喺辦理危害國家安全案件時，遇到唔同嘅情況同挑戰，加上相關嘅法庭案例，都反映咗有必要進一步完善相關嘅法律工具，以提升執法能力，先可以有效應對日趨複雜嘅地緣政治局勢所帶來嘅國安風險與挑戰，保障社會穩定，讓巿民可以繼續安居樂業。
事實上，每一個國家都必然將國家安全視為頭等大事，西方國家近年亦不斷通過修法、強化執法同情報搜集能力等方式，不斷築牢國家安全防線。香港今次嘅修訂，同西方國家嘅做法都一樣，而且亦參考咗好多西方國家嘅做法，甚至更加完善同平衡。
喺今次修訂《實施細則》嘅立法會文件，就已經列明原來喺英國、澳洲、新西蘭、愛爾蘭及新加坡嘅法例中，都有同類強制提供電子裝置密碼嘅規定，有啲國家嘅刑罰仲比香港「最高判囚1年」重3至10倍。例如英國《2000年調查權力規管法》專設第Ⅲ部「加密電子數據的調查」，規定警察如合理認為出於國家安全等所必須，可強制要求披露解密密碼，無正當理由拒絕披露，最高可判處5年監禁；澳洲《1914年犯罪法》第3LA條及新加坡《2010年刑事訴訟法》第39-40條亦有類似規定，最高罰則分別為10年監禁及3年監禁。
睇番成日將所謂「人權自由」掛喺口邊嘅美國又係點呢? 原來美國邊境執法人員無需法庭命令就已經有權力要求你解鎖手機俾佢哋檢查。2024年嗰陣，澳洲、加拿大等十多國曾一度更新旅遊警示，提醒民眾入境美國可能會遭遇電子設備檢查。加拿大仲有公共機構勸喻員工避免赴美，若必須前往，應攜帶另一部僅存有限資料嘅手機，可見美國執法部門查手機嘅情況就好似食生菜一樣。而根據美國海關與邊境保護局數據，2025年當局喺無需手令情況下，一共搜查55,318部電腦、手機及其他電子設備。
今次修訂《實施細則》，係要完善維護國家安全嘅法律，以保障香港社會安全同營商環境更穩定。正所謂身正不怕影子斜，維護國家安全本來就係必須嘅，但有班別有用心嘅人，包括潛逃海外嘅國安通緝犯，好似受禁組織「香港議會」嗰位假牧師「姜+偉」同專搞反華偽民調嘅「鍾x華」；亦有反華外國政客「香港監察」創辦人「Benedict 羅渣氏」同「香港自由委員會」主任「Jonathan 史蒂弗」，作出各種不符事實、有意誤導、上綱上線咁抹黑呢個修訂。
老實講，《香港國安法》生效至今已經就快6年，香港經濟民生等各方面都愈來愈有發展，香港國際金融中心嘅地位亦愈來愈鞏固，唔單止喺上年《世界經濟自由度2025年度報告》蟬聯全球最自由經濟體，仲喺今年3月發布嘅《全球金融中心指數》報告中蟬聯亞太區第一。所以我零零發諗呢班人就係唔抵得香港好，想趁住今次修訂《實施細則》就發爛渣，唱衰個修訂，以為咁樣就可以嚇走外資，破壞香港經濟，佢地嘅終極目的就係想破壞香港同國家嘅繁榮穩定！
西方國家有同樣嘅法律同執法權以強化國安保障，又唔見啲黃人、黃媒、外國政客攞出嚟講嘅? 呢班人覺得西方國家做就無問題，或者喺度扮鵪鶉，但對香港維護國家安全嘅舉措就指手畫腳， 點解呢?
鍾情局•零零發
鍾情局
** 博客文章文責自負,不代表本公司立場 **
人稱「六呎四」嘅既林x廷，由區議員變身成為立法會議員，後又做埋「白鴿黨」副主席，本來社會地位超然，但可惜佢吓吓亂咁嚟，終於搞到鋃鐺入獄。 性格影響命運，睇返「六呎四」上半場嘅「修為」，就明白點解佢而家有咁嘅下場！
「六呎四」48歲，係土生土長香港人，中大政治與行政學系畢業後，就加入「白鴿黨」做研究主任，雖然好早學會咗「犯民」嘅伎倆，樣樣反政府，用民生議題去激發民怨民憤，抽政治油水，但係以佢當時嘅CV同背景，根本好難彈得起，於是佢把心一橫，喺2007年辭職，去做「反貪署」初級調查員，等自己有別於其他「乳鴿」。到2011年，佢終於等到機會，去接替因為嫖妓而要落場嘅「白鴿黨」黨員做總幹事，自始就掹住當時嘅主席劉大姐衫尾，正式開啟佢嘅亂港事業。
「六呎四」多年嚟利用佢前「反貪署」調查員呢個特殊身份，扮晒「大偵探」或者「正義男神」上身，不過你睇返佢做嘅嘢，就知道真係冇料到，得啖笑。不如等我零零發揀佢最近幾單嘢同大家剝下花生！
2017年8月，「白鴿黨」召開咗一個緊急記者招待會，話肥仔黨友「釘書健」懷疑被內地強力部門嘅人擄走同埋禁錮，期間仲俾釘書釘拮落佢兩邊大脾虐待咁話。係完全冇任何可靠證據支持下，單靠呢個「釘書健」一面之詞，「六呎四」就即刻低級調查員上身，斷言話「今次虐待性質係香港歷來首次咁嚴重，內地強力部門人員喺香港濫用私刑，恐嚇港人同損害港人自由咁話！」總之嗡得就嗡。不過後來有CCTV拍到，「釘書健」所謂被擄帶走嘅地點，全程都係一個人周圍自由行……最後成件事證實係「釘書健」自編、自導、自演嘅鬧劇，「釘書健」亦因此被判監5個月。之前就言之鑿鑿，但CCTV一曝光之後，「六呎四」同「白鴿黨」，就玩失蹤、玩龜縮，冇澄清、冇道歉，佢哋就厚顏無恥做抽水皇，但呢件事對社會嘅傷害就大啦，因為一般冇跟進案件嘅市民就會信以為真，以為香港真係變到咁恐佈！
喺2019年，「六呎四」又被揭發係立法會原定審議逃犯條例修訂草案的前一天，喺Facebook個人專頁上載咗立法會綜合大樓走火路線圖。其後7月1日發生暴徒闖入立法會大樓並打砸立法會嘅暴行，有傳聞話可能因為暴徒事前取得圖則去計劃，所以可以大肆破壞。「六呎四」點解無端端要upload張圖?!
另外係2019年7月21日，當暴徒響港島搞到峰煙四起嘅時候，「六呎四」喺「面書」吹雞叫人入元朗，講明係去攪人家園、玩直播……佢喺暴亂現場扮晒總指揮咁，又喺雙方對峙嘅時候「挑機」、叫啲自己人唔好退，又用粗口鬧對方:「警察嚟緊，你班x街，拉曬你班x街，你夠膽唔好走！」呢啲好明顯就係火上加油嘅撥火行為啦，於是有人開始打市民及記者，我零零發覺得佢要為市民受傷負上一定責任囉！後來當「六呎四」知道網上直播嘅片唔係得佢嗰個角度之後，就深知要為暴亂負上責任，於是佢突然變成了「祥林嫂」，喋喋不休咁講自己如何挨打，如何無辜……如果佢唔係高調宣佈將「親征」元朗，喺暴亂現場指手畫腳，件事會唔會發展到咁呢？最後，佢呢單暴動罪喺區域法院被判監37個月，官老爺判刑嘅時候講，「六呎四」真正目的係為抽政治油水，佢嘅留低，完全冇可能係為咗緩和衝突囉！ 唉，佢以為自己冇份打，就冇犯法，真係連一個低級調查員嘅思維都冇。
跟住佢又涉嫌喺2019年12月30日、2020年1月21日及7月16日，係3次記者會上向公眾披露721事件被「反貪署」調查嘅人物。根據《防止賄賂條例》，任何人係唔可以披露「反貪署」調查嘅消息，目的係為了避免走漏風聲，讓受調查人知悉調查而銷毀證據，影響調查。
係2020年，「六呎四」被「反貪署」上門拉佢涉嫌公開721受查人身份嘅時侯，佢就低級調查員上身，扮哂熟悉相關防止賄賂條例，好囂張咁對住昔日同袍不停說教，又一路叫屋企人錄影，好似好有型咁。無論佢真係學藝未精，定故意踩紅線，搏出位都好，佢最後被判監4個月。雖然上訴得值開心咗一陣，但最後律政司終極上訴成功，終審庭喺2025年4月恢復佢嘅定罪同判刑。
「六呎四」應該係「白鴿黨」有史以來最短命嘅副主席，因為佢做咗冇幾耐就學人參加戴妖嘅非法初選，終於輪到警察上門拉佢「35+顛覆國家政權」罪，呢次佢就全程合作，不但聽警察話停止錄影，又乖乖低頭被扣上手扣，唔通佢今次真係知衰？！最終喺「35+顛覆國家政權案」，「六呎四」又被判監6年9個月，而上訴又被駁回。
計計埋埋，「六呎四」要坐成10年監，正所謂「出得嚟行，就預咗要還」！但佢似乎死不悔改，覺得自己永遠都無錯，單單案件都唔認罪，定罪後又無差別地提出上訴！佢咁玩，多多錢都唔夠比律師費啦，所以佢要賣樓去籌律師費，雖然帳面賺咗成700幾萬，不過而家唔知剩返幾多呢？
唉，「犯民」老鬼一定無教「六呎四」要學「袋巾梁」咁，高調出現，低調鬼竄行事，剩係玩「擦邊球」，凡事唔去到咁盡，就可以有排玩囉! 希望「六呎四」經歷多咗，能夠體悟人生，好似佢最近嘅一封家書咁，話自己喺倉裏面，食得好，住得好，仲升埋級做熨衫添，又多咗時間睇書同做運動……不過點都好，佢咁短暫同「精彩」嘅政治生涯，都好值得後人借鑒嘅！
鍾情局•零零發
