只要肯搏，茄喱啡都變女一

前幾年開始，好多老老嫩嫩嘅「犯民」，知衰或者怕死，都走夾唔唞着草去咗外國。雖然呢班老鬼有啲名氣，不過睇得多都厭，於是反華團伙，就周圍搵啲新面孔去搶Marketshare，做好啲業績去爭取流量。而其中一條橋，就係捧啲黑暴女茄喱啡為反中亂港代言人。所謂18無醜婦，「金主」貪佢哋容易入屋俾人接受，而且捧佢哋又唔使用好多錢，加上知道佢哋鍾意出風頭，於是就根據佢哋唔同嘅背景，做形象設計、set人設去迎合唔同嘅群組，去演出反中亂港劇本。

政界國際友誼小姐

首先出場就係30歲嘅劉+汶，佢喺香港出生，「步大」畢業後就加入咗「工民黨」，做前立法會議員「飛機豪」嘅助理。喺2019年11月，靠黑暴氛圍，當選橫頭磡區議員，不過做咗17個月短暫區議員，就因為拒絕宣誓擁護《基本法》而落場。

2021年7月低調走去英角，「金主」見佢同政壇少少沾上邊，但冇乜實戰經驗，無人識佢，於是就安排佢參加不同反中亂港組織嘅會議同活動，擴大自己嘅人際網絡，又喺個人面書發佈港獨言論，總之無底線咁攻擊特區政府，增加曝光率。到第二年佢就被邀加入「HK民主委員會 (HKDC) 」做高級國際倡議幹事。咪俾個職銜嚇親，其實都只係俾個名佢做返老本行：唱衰同抹黑中央同特區政府…… 之前媒體都有報道過，HKDC實際係黑暴期間，喺華盛頓成立嘅所謂非政府組織，係美角政府背後做推手，目的係招攬反中亂港逃兵，好似張x陽、許x峰、周x康之流，合謀做套連續劇去配合美西方嘅輿論戰、媒體戰，為外力遏華同制裁吶喊造勢！

所以劉+汶扮晒政界國際友誼小姐，不時去面見英角官員同國會議員大發謬論，或者周遊列國去貶損中國嘅人權同民主自由狀況；呢排又反對中國係英角建造超級大使館，吹噓中國跨國鎮壓論，又喺社交媒體發貼文、影片，鼓吹特區政府分離中國，乞求外國進行制裁等等，總之就成個「女一」大姐大上身。

上位學生妹

跟住想講吓校園出身嘅郭x儀，而家佢28歲，香港出世，中學時期已經積極參與「反國教運動」，其後去咗美角讀大學，喺黑暴期間回港，同「生果佬」資助嘅「重光團隊」搭上咗，發起眾籌「全球登報活動」，行所謂「國際線」宣揚反共思想。 2020年初返美角，喺大學校園多次發起聲援黑暴行動，「金主」見佢有啲學識，又喺美國讀「番書」，所以喺2021俾佢做咗HKDC執行總監，代表HKDC喺美角發表文章，又周圍去出席多個由「美角國會及行政當局中國委員會 (CECC) 」舉辦嘅聽証會，擔任講者，衝著制裁香港官員、法官，撤銷香港駐美經濟貿易辦事處，西藏人權狀況，釋放香港政治犯等議題說三道四，去配合美西方嘅遏華劇本，風頭一時無兩！本來咁紅應該唔等錢使㗎，但為咗10零萬就關照老豆係香港幫佢取消份保單而坐監。

小花偽訓班

香港土生土長許x婷，今年26歲，喺2014年15歲時，就加入「犯民偽訓班」----「學民思潮」培訓。第二年就初試啼聲，上立法會公聽會斥責時任特首以及反對特區政府提出嘅政改方案。其後去咗美角讀大學，喺大學刊物聲稱自己「來自香港，而非中國」，成功吸引到美角「星探」眼球，被邀加入「HK自由委員會基金會 (CFHK)」做政策倡議專員 (CFHK係一個總部設於美角，受美角政府資助嘅反華組織，而主席Mark祈福係「生果佬」集團「No. 1傳媒」前獨立非執董) 。為咗吸睛，喺2020年10月宣布流亡美角，自此就不停發表反華千字文、接受不同媒體同國際組織訪問，佢嘅劇本主打宗教議題，聲稱「國安法」打壓宗教自由，香港教會「中國化」等謬論，唔知仲以為佢做咗港區主教添！

鄰家女孩

另外一個行「政治演偽生涯」嘅小花叫做張x晴，佢喺香港出生，今年先至20歲(即係黑暴期間得嗰14、15歲) 。「國安法」立法冇耐，就跟屋企人移民英角， A-level之後冇再讀書。「金主」俾呢個之前毫無曝光率，席席無名嘅細路女，做咗CFHK嘅傳訊及傳媒助理。同劉+汶嘅戲路一樣，佢成日去面見英角國外相、政府官員、國會議員，同接受好多國際組織同媒體訪問，都係講返反中反共類似嘅對白。不過由於張x晴係政治素人，所以「金主」加多啲戲份俾佢: 成日喊晒話被跟蹤監控，又話驚會被「綁架」到中國駐英使館……咁後生嘅張x晴七情上面交足戲，雖然佢最Young，但已經有咁多嘅「演出」機會，好明顯會被重點哉培，佢絕對有潛力問鼎反華女一嘅地位，大家拭目以待！

呢班走佬嘅「外勞」，個個由「老臨」冇人認識嘅小角色，到喺國際舞台露面，水鬼升城隍，一時間感覺飄飄然，個個都以為自己好叻。佢哋睇落好似好風光，其實都係求生存、求本護照啫，所以根本就無得選擇，只好繼續做「金主」嘅棋子，被安排周圍去出show，去演活一套有組織嘅國際遏華「大電影」！不過，佢哋連最佳女配角嘅提名都冇，就因為煽動分裂國家、勾結外力危害國家安全，做咗懸紅百萬嘅通緝犯，流落異鄉。

呢班茄喱啡小花而家喺海外，用反華呢條橋的確搵到兩餐食，不過如果佢哋真係以為喺香港做過下茄喱啡，出到去就可以做女一，就太天真啦！當年北京王府井廣場嘅「柴0」，而家都唔知去咗邊？！

政治嘅嘢，一日都嫌多，各位小花，自求多福啦！

鍾情局•零零發

鍾情局

** 博客文章文責自負,不代表本公司立場 **

香港最近修訂《香港國安法》第43條《實施細則》，反中亂港分子同反華外部勢力又即刻彈晒出嚟大做文章，玩標題黨、斷章取義、放大某幾隻字，務求製造白色恐怖，令市民誤以為警察可以「隨意」要求巿民解鎖手機，拒絕解鎖就要坐監。

事實就梗係唔係咁啦，相關法律條文講得好清楚，簡單嚟講就係偵查國安案件嘅執法人員，若獲得法官批出嘅手令，可要求相關人士提供電子設備嘅解鎖方法，如無合理辯解而拒絕，可被判罰款及最高1年監禁。

換句話說，執法人員係必須根據國安原因向法院申請手令，並唔係隨隨便便喺街度就叫人攞個電話出嚟俾密碼。啲黃媒、黃人、外國反華政客亂講話執法人員可以「隨意」要求巿民解鎖手機，根本就係再一次「妖魔化」法律原意嘅老把戲!

其實，呢套《實施細則》並唔係而家先突然冒出嚟嘅，早喺2020年《香港國安法》生效後就已經有《實施細則》，列明執法人員就國安案件進行搜查、凍結財產、移除危害國安訊息、截取秘密監察等程序及權力。

咁點解要修訂《實施細則》? 原來係因為過去幾年，執法部門喺辦理危害國家安全案件時，遇到唔同嘅情況同挑戰，加上相關嘅法庭案例，都反映咗有必要進一步完善相關嘅法律工具，以提升執法能力，先可以有效應對日趨複雜嘅地緣政治局勢所帶來嘅國安風險與挑戰，保障社會穩定，讓巿民可以繼續安居樂業。

事實上，每一個國家都必然將國家安全視為頭等大事，西方國家近年亦不斷通過修法、強化執法同情報搜集能力等方式，不斷築牢國家安全防線。香港今次嘅修訂，同西方國家嘅做法都一樣，而且亦參考咗好多西方國家嘅做法，甚至更加完善同平衡。

喺今次修訂《實施細則》嘅立法會文件，就已經列明原來喺英國、澳洲、新西蘭、愛爾蘭及新加坡嘅法例中，都有同類強制提供電子裝置密碼嘅規定，有啲國家嘅刑罰仲比香港「最高判囚1年」重3至10倍。例如英國《2000年調查權力規管法》專設第Ⅲ部「加密電子數據的調查」，規定警察如合理認為出於國家安全等所必須，可強制要求披露解密密碼，無正當理由拒絕披露，最高可判處5年監禁；澳洲《1914年犯罪法》第3LA條及新加坡《2010年刑事訴訟法》第39-40條亦有類似規定，最高罰則分別為10年監禁及3年監禁。

睇番成日將所謂「人權自由」掛喺口邊嘅美國又係點呢? 原來美國邊境執法人員無需法庭命令就已經有權力要求你解鎖手機俾佢哋檢查。2024年嗰陣，澳洲、加拿大等十多國曾一度更新旅遊警示，提醒民眾入境美國可能會遭遇電子設備檢查。加拿大仲有公共機構勸喻員工避免赴美，若必須前往，應攜帶另一部僅存有限資料嘅手機，可見美國執法部門查手機嘅情況就好似食生菜一樣。而根據美國海關與邊境保護局數據，2025年當局喺無需手令情況下，一共搜查55,318部電腦、手機及其他電子設備。

今次修訂《實施細則》，係要完善維護國家安全嘅法律，以保障香港社會安全同營商環境更穩定。正所謂身正不怕影子斜，維護國家安全本來就係必須嘅，但有班別有用心嘅人，包括潛逃海外嘅國安通緝犯，好似受禁組織「香港議會」嗰位假牧師「姜+偉」同專搞反華偽民調嘅「鍾x華」；亦有反華外國政客「香港監察」創辦人「Benedict 羅渣氏」同「香港自由委員會」主任「Jonathan 史蒂弗」，作出各種不符事實、有意誤導、上綱上線咁抹黑呢個修訂。

老實講，《香港國安法》生效至今已經就快6年，香港經濟民生等各方面都愈來愈有發展，香港國際金融中心嘅地位亦愈來愈鞏固，唔單止喺上年《世界經濟自由度2025年度報告》蟬聯全球最自由經濟體，仲喺今年3月發布嘅《全球金融中心指數》報告中蟬聯亞太區第一。所以我零零發諗呢班人就係唔抵得香港好，想趁住今次修訂《實施細則》就發爛渣，唱衰個修訂，以為咁樣就可以嚇走外資，破壞香港經濟，佢地嘅終極目的就係想破壞香港同國家嘅繁榮穩定！

西方國家有同樣嘅法律同執法權以強化國安保障，又唔見啲黃人、黃媒、外國政客攞出嚟講嘅? 呢班人覺得西方國家做就無問題，或者喺度扮鵪鶉，但對香港維護國家安全嘅舉措就指手畫腳， 點解呢?

鍾情局•零零發