大埔宏福苑大火之後嘅呢兩個月，約四千名災民已經安排入住到酒店、青年宿舍、過渡房屋，亦有為期兩年嘅應急租金補助、醫療費用豁免、學生特別支援，以及「一戶一社工」照顧居民情緒。而警察同廉政公署就即刻展開調查，並分別拘捕咗22名負責屋苑維修工程嘅公司董事、項目經理、工程顧問及消防裝置承辦商。另外，獨立委員會亦都立即展開工作，包括去咗現場視察，務求喺9個月內提交事故原因、調查結果同防範建議報告。
而家另一個迫切嘅議題，就係居民嘅長遠安置。居民喺經歷完生離死別，心情稍為平復，而家又要再做一個長遠嘅決定，談何容易？ 我零零發聽到坊間有好多講法，又留意到有不少吊詭嘅言論:有人話政府會收咗宏福苑塊地，賣俾發展商去起豪宅賺大錢；又有人搞匿名網上聯署要求「原址重建」，喺短短幾個鐘就有800幾個人響應；好似又有人話住咗三十年，回憶、根、情感全部都喺度……於是我想嚐試解讀唔同安置選項嘅利與弊。
總括嚟講，選項可以歸納為四大類:（1）攞現金買現樓、（2）樓換樓、（3）原區安置同（4）原址重建。
攞現金買現樓
呢個選項即係政府俾錢買返業主手上嘅單位。按香港測量師學會根據火災前單位嘅市場成交價估算，未補地價單位嘅回購價約 $270 萬，補地價單位約 $360 萬。如果居民揀呢個選項，好處係即時有一嚿現金，選擇彈性大，鍾意可以買私樓、或者買政府樓都得。
樓換樓
「樓換樓」，即係直接換一個價值相若嘅新居屋或綠置居(綠表置居計劃)單位，差價由政府代佢哋向房委會支付。好處係唔需要處理大量現金同埋買樓嘅法律程序。居民更可以優先揀五個興建中嘅新居屋屋苑，單位各有特色。例如將軍澳影輝苑有海景，東涌裕豐苑近機場，屏山朗風苑單位大，九龍灣盛緻苑交通方便，啟德啟陽苑仲屬於「34校網」有不少名校。但係呢啲新樓，就可能要一至三年（約2026年底至2028年）先陸續落成。
原區安置
政府喺大埔揀咗兩塊地考慮用作「原區安置」，分別係頌雅路西同廣福公園。兩個地方嘅配套都齊全，交通方便，5至10分鐘車程就去到大埔墟地鐵站。不過因為啲地都仲係生地，所以就要等四至七年（約2029至2033年）。 就住選項（1）至（3），選址其實遍佈香港，九龍同新界，包括大埔； 新樓或者現樓都可以揀，而且時間快，喺最短半年之內就可以另覓新居。好處相信係可以令居民，無論對小朋友讀書、返工、退休嘅都可以盡快復常，而且每家每戶都可以按自己情況選擇，彈性更大。好似2010年馬頭圍冧樓事件，受災居民喺一星期內已經揀埋公屋長遠安置好。
原址重建
「原址重建」同其他選項最大分別係，佢多咗「拆卸舊址」呢一個關鍵嘅步驟，而呢個係最費時同最多不確定因素。根據香港法例，要拆卸大廈需要處理好所有業權先可以進行(原意係要保障啲小業主)。現時，部分單位進入遺產程序、有業主失聯，有啲業權根本未必搵到人處理，需要交由法庭跟進。要處理二千個業權，相信應該要唔少時間先搞得掂。所以有專業消息估算，「原址重建」需要至少十年（2035年後），先可以完成收購業權、清拆、設計、審批、投標、施工等等嘅程序。
早前，「嗰隻熊J-son The Pooh」話「原址重建」三年半就搞得掂，佢話只要引用「市區重建局條例」申請收地，刊憲3個月後作出補償就可以收回業權，再用超高性能混凝土與組裝合成技術去重建就得，講到好似玩 Minecraft咁。其實，邊到有佢講得咁簡單，剩係收購2,000幾戶業權呢個第一步，就好似我之前咁講，有好多法律程序要處理，好有機會引起好多爭拗或者法律訴訟，如果收唔齊全部業權，就乜都做唔到。所以唔好講就天下無敵，求其噏當秘笈囉！
重建項目需時越長，對居民嘅經濟同心理壓力就越大。如果用10年時間先可以「原址重建」，而家政府提供兩年租金補助，咁之後嗰8年就可能要全數自行負責，單係租金起碼都成過百萬。睇返當年喺2013年東京街/福榮街重建項目，有苦主反映喺等待重建期間，佢哋居無定所，用緊嘅傢俬電器壞咗又唔敢換，租樓嘅又俾業主加租，中途想買樓又無彎轉，因為唔知幾時先搬，經常忐忑不安，度日如年。
「原址重建」呢個選項可能適合啲等到十幾年，而財政又比較充裕嘅居民，不過，呢個係咪一個最好、最適合，又係個個家庭都啱嘅選項呢？ 長遠安置呢個決定，就好似要買一對要着10幾年嘅鞋，無論係款式、size 、價錢都要適合自己先至得。無可能全部人都着同一款，同一個size嘅鞋。
「原址重建」有可能要捆綁晒宏福苑4000幾人一齊等成10年，但係每個家庭嘅男女老幼組合，返學、返工、退休，以及經濟情況都唔一樣，只有各家各戶先最清楚自己同家人嘅需要，所以真係要好好衡量，理性去認識同了解各選項嘅特點，去揀最啱自己嘅方案先好，呢個唔係少數服從多數一個咁簡單嘅決定，係要負擔得到、承受得到先得囉!
鍾情局‧零零發
鍾情局
** 博客文章文責自負,不代表本公司立場 **
