聽聞嗰個所謂香江才子「淘X」個電台節目「光頭頂」今晚Bye Bye，實在係可喜可賀！
我零零發以前都聽過佢主持嘅「風煙」節目，不過佢嘅評論手法扮曬高深，將簡單論點複雜化，又鍾意表現自己「博學多才」，成日懶得戚咁show所謂與眾不同嘅觀點，好似好幽默，其實幾突兀，聽得多就覺得佢造作，而佢嘅言論又經常盲撐西方文化；咁既然道不同，所以就無再follow 佢。
最近全世界都講緊「超級大角」喺1月初派軍機去委內瑞拉，殺害40多個平民同軍人，強行綁架總統馬杜羅同夫人呢單嘢。其實睇返自2025年9月開始，「超級大角」嘅水兵已經喺加勒比海或東太平洋國際水域，炸毀20多艘聲稱喺委內瑞拉販毒集團嘅快艇，殺害咗超過100人，以及無理扣押多艘運油輪，強搶船上數以萬桶屬於委內瑞拉嘅石油……「超級大角」話佢哋犯咗「串謀販毒恐佈活動」罪，危害到「超級大角」國家安全咁話，不過「超級大角」從來冇任何證據show過俾人睇。「侵侵大帝」公然違反國際秩序規則，去侵犯一個國家嘅主權，去強搶人哋國家嘅財產，活生生演譯「誰大誰惡誰正確」嘅叢林法則，赤裸裸進行暴力橫行嘅掠奪行為！
當全世界「媽聲四起」，唯獨是「才子」另有「高見」。佢喺社交媒體話呢個係神級工程，一take過，冇NG，比湯告魯斯嘅「職業特工隊」任務更艱險，讚「侵侵大帝」有震攝力、中央情報局同美軍夠專業，佢仲神化「侵侵大帝」解放咗委內瑞拉人民，令人精神大振咁話！「才子」英雄化呢個霸凌強盜嘅行為，講到好似睇荷里活大片咁，呢啲咁冇人性、冇道德底線嘅評論，真係沒有最荒謬，只有更荒謬！
唔單止咁，「才子」引述「侵侵大帝」話委內瑞拉係外國恐佈組織，而委內瑞拉總統馬杜羅有中國同俄羅斯做靠山，所以佢話今次「超級大角」嘅行動，係大大力摑咗中國一巴，剃中國眼眉咁話！「才子」見機不可失，又懶幽默咁提議中國應該用「生果佬」去交換馬杜羅，咁等馬杜羅可以用「高才通」身份定居香港，將販毒得益喺香港成立家族辦公室，咁香港就必定可以提升國際地位咁話喎！
我零零發認為政治上可以各有立場，冇絕對嘅對錯，不過係大事大非嘅事上，道德界綫唔應該含糊囉！
睇返「才子」當年10幾歲去咗英倫讀high school、大學，做咗幾年嘢之後，就變得崇洋、高高在上。回歸香港之後，分別係媒體做過編輯工作、出書同埋寫專欄。佢寫嘅嘢，經常都有爭議性，例如，佢形容菲律賓係一個「僕人國家」，涉嫌種族歧視同埋侮辱菲律賓人，引發起菲律賓民間同政界嘅不滿，不過佢聲稱「僕人國家」係指菲律賓信奉天主教，而耶穌鼓勵人要當世人嘅僕人喎！喂，係咪解得有啲牽強呢？「才子」亦都寫過一啲專欄，描繪大學生性生活嘅文章，被淫褻物品審裁處評定內容不雅；另外，佢又不斷眨低自己嘅中華民族、中國文化……吓，咁即係踩埋自己？咪儍喇，唔好以為自己去咗外國，人哋會當你係同胞先得㗎！
喺黑暴期間，「才子」接受訪問時，話年輕人講「港獨」，都只不過係玩吓啫，係中央反應過敏要打壓，攪到一發不可收拾。佢仲提醒年青人，前階段「Be Water」抗爭策略，已經成功令香港警察惡名遠播，之後要「Be Smart」喇，乜兩樣嘢有關連咩？而佢亦曾經喺「風煙」節目中，形容觀塘一個屋苑掛滿國旗，氣氛陰深，適合拍恐佈片，又話紅色國旗可以辟邪咁話！佢呢類口水評論嘅事例，實在多不勝數，睇得多、聽得多都會腦麻痹！
坦白講，我零零發比較old school，咁多年嚟都真係唔識欣賞「才子」嘅文章。我覺得佢只係用「關鍵詞潛意識植入法」，令一啲政治色盲、諗埋一邊嘅人，一睇到、一聽到啲keywords，就會自動串連自己嘅諗法！ 唉，真正嘅才子唔係應該有道德修養㗎咩？絕對唔應該係一個迎合市場需要去玩弄文字，出咗事又諸多解釋囉！冇辦法啦，大家之前個幾十年，都活在民粹、媚外嘅黃色風暴圈中，根本睇唔清、聽唔楚！
「才子」應該知道自己嘅評論過咗界、行緊鋼線，所以喺2021年9月，竄走去英倫，但就同人講話放個長假喎！唓，咪又係「又要威、又要戴頭盔」囉！但係我零零發唔明白，點解「才子」仲可以越洋，喺大氣電波嗰度，肆無忌彈繼續喺度亂噏，日日荼毒香港市民嘅？ 矮化他人抬高自己，傲慢不堪嘅人，都可以叫做才子？一啲匪夷所思嘅評論，毫無邏輯嘅分析，真係叫言論自由咩？
不過今次「才子」被out，係一個完美嘅示範，希望可以為其他負責任嘅媒體帶來反思，係咪仲要比呢類人喺度噏三噏四，寫東寫西呢？
至於「才子」，當然要搵個下台階，佢話做咗主持20幾年都攰，而家喺半退休狀態咁話。嗱，你自己話㗎，記住攰就唔好再亂嗡喇，收聲唞吓啦！
鍾情局.零零發
鍾情局
** 博客文章文責自負,不代表本公司立場 **
最近「生果佬」終於要為佢多年來嘅惡行「埋單」，俾官老爺重判20年監禁！有人問：「佢衰啲咩要坐咁耐？」不如睇吓喺單案嘅審訊爆咗啲咩出嚟？
鼓吹制裁 摧毀香港
「生果佬」表面上係「生果報」老闆，實質係打住「新聞自由」嘅旗號，長期通過情報系統出身嘅助手Mark Simon穿針引線，游說美國不同政客及官員制裁中港兩地官員。
2019年，「生果佬」親赴美國與時任副總統Pence及國務卿 Pompeo會面，卑躬屈膝乞求對香港及中央實施「制裁」。「生果佬」仲透過 Mark Simon促成美國前副參謀長Jack Keane、美國前國防部副部長Paul Wolfowitz，為台灣蔡英文提供顧問服務。除此之外，為咗討好美國，「生果佬」甚至草擬特區官員嘅制裁名單，全面配合「侵侵」政府打壓香港。試問一個正常搞報紙嘅人，點解無端端同美國權力核心咁「friend」先?
係審訊入面，其中一個控方證人喺庭上指出，「生果報」嘅社論曾呼籲美國及其盟友根據《馬格尼茨基人權法案Magnitsky Act》制裁中國同香港官員。唔單止咁，「生果佬」曾經喺「生果報」自己嘅專欄度發表文章，公開倡議對中國實施科技制裁；而佢更直接指示時任「生果報」高層，協助袁弓夷喺「生果報」平台公開發布制裁中港嘅影片，呢個袁弓夷喺片中敦促時任「侵侵」同國務卿Pompeo駐軍保護香港青少年，呼籲外國投資者從香港撤資，又呼籲英國收回香港主權……
制裁唔係大家想像咁簡單，而係現代經濟戰嘅「核彈」。為咗達成政治目的，美國之前就曾經用「制裁」呢一招去打擊非洲中東多個國家，令到嗰啲國家經濟一蹶不振，破產收場。而「生果佬」仲陰險，策劃所謂「三條戰線」，聯合「街頭、議會、國際」， 搞煽動、推動街頭抗爭、推翻政權，乞求制裁，企圖癱瘓經濟；佢背後又操控反華組織「重光團隊」，出錢出力，日日向外國唱衰香港，誓要拖中國同香港市民去萬劫不復嘅深淵。
散播假新聞 挑動仇恨
除咗搞制裁，「生果佬」仲不斷利用「生果報」搞假新聞，例如：2008用偏頗嘅報道去反高鐵，煽動群眾包圍立法會同衝擊警方，到2019年黑暴已經徹底失控，又不斷散播「爆眼女」、「太子站事件」等假新聞，甚至誣衊警察性侵示威者，煽仇煽暴，將香港推入撕裂與仇恨嘅漩渦。
「生果佬」恃住「新聞第四權」，拎「生果報」嘅謊言當子彈，日日瞄準班後生仔，教佢哋「違法達義」、搞「港獨」，哄騙佢哋以為上街就係改變世界，鋪天蓋地散播謊言同煽動性報道，結果大批後生仔信咗佢啲鬼話，連群結隊上街暴力違法，以為攬炒就係出路。最後呢？唔係坐監就係流亡，搞到自己前途盡毀，無數家庭破碎，社會陷入混亂之中。
睇返2021年7月1號嗰晚，有個叫梁X輝嘅男人喺銅鑼灣百貨公司外，用刀襲警後自殺單case，警方其後喺佢屋企搜到大量「生果報」舊報紙。心理專家喺死因庭上分析話，佢長期俾「生果報」餵「心靈毒湯」，深受極端攬炒思想影響，最終策劃「孤狼式襲擊」，成為「生果報」洗腦工程下嘅犧牲品。
美西盲撐 勾結外國最佳證據
成個公開聆訊歷時156日，有超過2000項證物、8萬頁文件，證據堆到成座山咁高，但外國勢力竟然仲擘大眼亂噏！判刑一出，美西方一眾政客同反華媒體無視鐵證如山，即刻跳出嚟，再次上演雙標醜劇，大肆抹黑特區政府，開口埋口就係港府打壓「新聞自由」，又歪理連篇要求「釋放生果佬」。佢哋呢種顛倒黑白嘅行徑，不僅公然違反國際關係基本準則，更徹底暴露出「生果佬」其實同佢哋係坐埋同一條船，狼狽為奸。
喺審訊期間，西方從未停止過造謠抹黑，又話「生果佬」喺獄中受虐、無醫療，又話佢連宗教權利都冇，甚至話佢身體差到指甲脫落，但事實呢？法庭宣判當日，「生果佬」步履穩健、自行入席，精神狀態良好，完全打咗呢啲謊言嘅臉。就連佢嘅律師都親口承認，「生果佬」喺獄中一直獲完善醫療，亦無任何投訴。呢啲造謠手段，只不過係西方抹黑香港嘅慣用伎倆。
其實每日唔同國家嘅領事、外國媒體都有去聽審，有晒即時傳譯個喎，係咪佢哋聽唔明，抑或係瞌緊眼瞓睇唔到，報錯料俾老闆知啊？
自食其果
除此之外，仲有啲西方組織，例如「無國界記者」，跳出嚟強烈譴責判決，話「生果佬」被判20年監禁，對七十幾歲嘅佢嚟講「幾乎係死刑」，認為判得太重。判得重？咁不如睇下西方嘅國安法判刑情況: 美國國會山騷亂案，「驕傲男孩」主犯重囚22年；英國6個襲警暴徒判124年。自己啲國安法就辣到出汁，但一提香港就鬧到飛起！咁係唔係虛偽雙標？
「生果佬」觸犯國安法，經公正審訊被判刑，係法治體現；相反，美國非法綁架委內瑞拉總統馬杜羅返美受審，先係踐踏國際法。西方政客死撐「生果佬」，卻對馬杜羅隻字不提，呢個係咩邏輯？
上面講「生果佬」嘅惡行只係冰山一角，佢啲所作所為喺官老爺嘅855頁判詞入面詳列得清清楚楚，受審判刑係因為佢罔顧法律，禍害香港，法庭只係根據法律同證據作出裁決。判詞講得好清楚，「生果佬」有持任何政治觀點嘅自由，但問題係，佢選擇去違反《國安法》，繼續鼓吹外國干預同制裁，無視法律底線！
鍾情局•零零發
