「熊」出沒注意!!!

最近日本啲熊周圍出沒咬人，2025年就起碼有14人死，過百人傷。聽聞香港呢個石屎森林，呢排都出現咗隻熊「J-son The Pooh」，喺度不斷搗亂吼叫，蠱惑人心！

究竟「呢隻熊」係邊度走出嚟㗎？

「呢隻熊」50幾歲，好似有工程同法律學位，以前係「XX興業」工程公司老闆，而家就成日以政治人物、 時事評論員自居。 點解轉咗跑道嘅？

「沙中線短鋼筋事件」

咁就要從「沙中線短鋼筋事件」講起，當時「XX興業」係沙中線其中一個工程二判商，「呢隻熊」當年被指係呢單嘢嘅吹哨人。不過睇返政府嘅調查報告，發現其實佢喺2015年7月，已經發現啲鋼筋有問題，但一路唔出聲，繼續收錢做佢嘅工程。 到2017年1月，佢就忽然電郵俾總承建商，指出鋼筋有問題。喺9月，「呢隻熊」就再發投訴電郵俾總承建商同埋政府，不過過咗幾日又通知政府，話自己已經同總承建商到現場視察同埋開咗會，解決咗件事。但係總承建商唔承認有咁嘅安排，仲指出「呢隻熊」聲稱一齊喺現場堪察同開會嘅總承建商職員，當時根本唔喺香港！

當發現有危險嘅情況，一般人都會盡快報告，以防事態加劇。點解事發隔咗兩年後先講？如果真係為公眾利益著想，唔係應該即刻講嘅咩？ 江湖傳聞話鋼筋醜聞有可能係「呢隻熊」同總承建商金錢糾紛嘅籌碼。「

XX興業」變「XX監察」？

2019年9月，「XX興業」被債權人入稟清盤。同年11月，「XX興業」成立咗一個叫做「XX監察」嘅民間組織。係2020年9月，高院就頒令清盤，「XX興業」結束營業。

「XX監察」聲稱係一個由工程界人士主導，去監察工程質量同關注公共利益嘅組織。不過我零零發上網搵咗好耐，成個「XX監察」，除咗話「呢隻熊」係主席之外，其實乜嘢資料都冇，有咩專業人士喺度亦都冇。

而唔知係咩原因，「呢隻熊」分別喺2011年參選區議會選舉，2021年參加「選舉委員會天主教香港教區代表」同埋立法會選舉，好似好有「戰績」咁，不過其實次次都選唔到！ 可能冇辦法入到政圈，所以唯有係民間突圍，係2022年開始，「呢隻熊」以「XX監察」主席身份，開始喺社交媒體，對好多大型工程發表所謂「專業評論」。

「東涌100區」

2022年，「XX監察」聲稱正向「東涌100區」工程進行調查監察，希望有關工程人員提供相關資料……有部份負責工程嘅公司指「呢隻熊」嘅貼文有誹謗之嫌，於是入稟高等法院，要求禁制佢言論，並要求賠償。

香港大學西高山校園

2023年6月，「XX監察」又聲稱香港大學西高山校園重建計劃出現石屎結構、鋼筋外露等問題。但其實校方喺4月已經發現有問題，並且同承建商作出修正。於是，「呢隻熊」又俾承建商入稟高等法院，告佢誹謗!

穗禾苑大維修

2024年，佢透過 YouTube 頻道，影射穗禾苑大維修圍標，工程公司與業主立案法團黑箱操作，搞到班業主要負擔唔合理嘅維修費用，又話有議員同建築業界同流合污，詐騙業主金錢等等。所以穗禾苑業主立案法團入稟咗法院告佢誹謗，法庭再度頒令，禁止佢於任何渠道發佈誹謗性言論。

大火災

香港係一個言論自由嘅地方，大家發表意見絕對係冇問題，不過識嘢嘅老友，就睇到「呢隻熊」別有用心。好似11月尾大火災之後，佢不停喺度高調煽風點火，喺社交媒體洗版式出帖抽水，先針對救火不力，跟住就點名批判官員，以至成個政府，跟住又「燒埋」人哋業主立案法團，究竟咩居心？而佢又對外牆工程與用料規格大做文章，不過喺12月14日，佢自稱研發咗阻燃棚網，又話已經同「生意夥伴」喺內地構建供應鏈，時間真係「啱啱」好!

元朗花園水喉漏水

近日，聽聞「呢隻熊」出沒到元朗花園。事緣花園嘅水喉多年嚟出現漏水問題，管理處曾提出近億元大維修方案，但至今仍然爭拗不斷。喺呢個時候，唔係住戶、業主、區議員嘅佢，突然喺Facebook、屋苑群組狂出post，針對呢個屋苑大做文章。唔知佢會唔會又研製到一條唔會漏水嘅喉，去「幫助」花園苦主呢？

亂噏當秘笈

另外，「呢隻熊」2024年又喺社交媒體，唱佢個前助手偷玉佛及盜竊口罩。於是前助手即刻入稟控告佢誹謗，高院頒令禁止佢發表相關誹謗言論、要移除帖文及影片。但「呢隻熊」理都唔理，最後因藐視法庭而被判囚21日，雖獲准暫緩執行監禁令，但仍須支付懲罰性訟費。

財困？

「呢隻熊」除咗「誹謗」纏身之外，佢嘅財務狀況亦都好值得留意。2020年，佢創辦「XX興業」因拖欠＄400萬元被清盤。2021年，佢亦因向前助手借咗40萬無還，而被入稟法院追討。2023年先後被多家財務機構追討逾＄2,000萬元巨債。 2025年，佢又被大埔區區議員入稟申請破產。

「呢隻熊」嘅公司被清盤、債務纏身、賣車賣樓嚟填債、戶口又俾銀行懷疑洗黑錢凍結咗、更有一筆筆因為誹謗而需支付嘅律師費和賠償費……香港地咁多工程，點解佢剩係會關心「億億聲」嘅大工程? 以「工程界英雄」自居，以「監察」為名，肆意「抹黑」，究竟真正目的係乜? 一個經常因「誹謗」受法律制裁，但又無視法庭命令，加上欠債累累，「借錢唔還」嘅人，成日好似幫緊你、幫緊你，為民請命咁，但實際呢? 「呢隻熊」嘅足跡都幾吊詭、巧合喎!

大家𧫴記引「熊」入室，後患無窮，小心！

鍾情局●零零發

鍾情局

** 博客文章文責自負,不代表本公司立場 **

上期講咗有個自稱牧師嘅「姜+偉」，係兩個被保安局局長列為「受禁組織」，「香港議會」同「香港民主建國聯盟」(都係以推翻中央，鼓吹「港獨」嘅組織)嘅骨幹分子。究竟呢個「姜+偉」係乜水？

「姜+偉」今年34歲，自幼喺屯門蒲，但係問返屯門大嘅老友，冇人識佢。原來佢細個嘅時候叫「顧x宇」，六歲時父母離異後，改跟母親姓蔡之餘，又改埋名叫「+偉」，後來再跟繼父姓姜。

佢大個之後呃阿爸阿媽讀大學，收咗兩老俾嘅佢學費就冇去返學，跟住就無端端喺一個基督教會受洗成為基督徒，但佢自把自為，擅自係教會組織一個學生制服團體。喺2012年佢索性離開教會，以「牧師」自居，自立門戶，創辦一個所謂「儲聖會以太堂」教會，吸納屯門學生做信徒。表面上佢幫同學仔補習同舉辦活動，但卻多次傳出對啲女學生行為不檢。所以當年屯門基督教聯會亦發過信比區內教會，要小心此人！

圖片來源：大公報

喺2019年黑暴期間，「姜+偉」除咗身穿牧師衫高調現身之外，更經常以所謂「急救員」及「網媒記者」身份攪事，一度備受「手足」吹捧。不過當時已有媒體篤爆姜某所展示嘅急救證書，並非由聖約翰救護或紅十字會等相關機構頒發，而係由自己所創辦嘅制服團體自行簽發，而佢更製造一大堆所謂急救員證件，無差別派發比暴徒，混餚視聽去制造混亂。佢又經常進行直播，與其他所謂記者喺現場「採訪」，針對警方執法同煽動群眾，唯恐天下不亂。姜某黑暴時接受外媒訪問，自稱已經做咗7年牧師，咁講法，姜某即係20歲已經成為牧師?! 據我零零發了解，要成為一位牧師，九年係基本盤，因為除咗要喺認可神學院修讀為期4年嘅神學學士課程，畢業後仲需要係教會擔任5-10年嘅傳道工作，再經過專業牧師團隊評估，同埋教會嘅推薦，先至可以成為牧師。所以，就算姜某係「神童」，都冇可能做到啦！

圖片來源：文龨報

其實喺黑暴至2021年新冠肺炎疫情期間，「姜+偉」曾經多次被警方拘捕「阻差辦工」或「煽動或參與非法集結」等罪行，但都好彩俾佢走得甩。直到2022年初，佢因為其中一宗案件返屯門警署報到時，醉酒鬧事襲警，被判監2個月。放監之後又因為喺旺角市集賣有煽動內容嘅書籍，被控「串謀煽動罪」，判囚8個月。

2023年尾「姜+偉」出獄後，即刻竄走去台灣省，喺一間香港人經營嘅餐廳做非法勞工。 之後又整咗個鼓吹「港獨」嘅「香港民主建國聯盟 (建國聯) 」去搵政治油水，大言不慚話要推動所謂「香港憲法」、建立臨時國旗、國歌等，及接受軍訓去從事日後顛覆分裂活動咁話。據媒體報道，姜某又聲稱與台灣省政府官員有計傾，只要加入「建國聯」，就可以移居台灣省……真係信佢一成，雙目都失明！

2024年初，姜某報案聲稱自己喺台北被「不明人士」襲擊，背部被捅兩刀受傷送院；跟住就急不及待喺社交平台玩直播賣慘，制造被迫害嘅假象。不過台北警方就踢爆，姜某其實喺夜總會飲醉酒，同人發生爭執被人打先真! 聽聞台北當局認為「姜+偉」不但「自製遭受政治威脅」，無乜利用價值之餘，又被揭發打黑工，絕對係麻煩友一個，所以拒絕佢留台嘅申請，仲將佢驅逐出境添！
冇得留低，唯有諗計。江湖傳聞姜某經過台灣省失敗嘅經驗，為咗鋪排出走楓葉角尋求政治庇護，所以喺佢2025年3月竄逃去楓葉角冇耐，就有4個「建國聯」嘅成員喺香港被警方以「串謀分裂國家」罪名拘捕。有媒體篤灰話係姜某爆料「出賣手足」，咁就可以包裝自己成為「受迫害人士」。而佢又高調參加通緝犯「袁x夷」、「何x懋」、「龔x夏」喺海外成立嘅反中亂港組織-「香港議會」嘅選舉。係2025年6月「姜+偉」不但順利當選，仲做埋會議長! 佢以為咁樣做，就可以為自己累積申請政治庇護嘅哩數，距離成功留底又近一步……真係妙想天開，開心得太早了！

通緝人士

到2025年7月尾，姜某真係如願以償，香港警方懸紅20萬通緝佢「顛覆國家政權」罪；不過姜某並冇收斂，仲懶得戚咁多謝政府幫佢宣傳「香港議會」。而佢近期又叫人唔好喺立法會選舉投票，於是再被廉署通緝；但佢咁做就累死手足，因為有啲儍仔儍更更轉貼佢發文，俾人拉咗! 佢嘅惡行，就連生母同繼父都頂唔順，登報聲明同佢割蓆，脫離親人關係！

「姜+偉」可以話係竄走海外黃人嘅一個縮影。一個名不經傳嘅小人物，無學歷、無財力，無能力，除咗土生土長嘅老家可以包容佢之外，根本冇可能循正途移民任何地方。所以佢就故意喺香港境外觸犯法例，高調反政府，唱「港獨」，到處營造「被逼害」嘅假象，但自己就永遠身處一個以為「安全」嘅地方，靠「離岸愛港、隔岸觀火」，煽動其他人做踩界犯法嘅事，令自己反中亂港嘅CV勁啲，搏外力加持：

人不為己真係好難嘅，但海外實在太多「姜+偉」之流，周圍呃呃騙騙，搏一鋪執返個難民身份或者居留權。不過小黃人都唔好咁蠢吖，人哋話要整豉油雞啫，你就「豬」到又出雞、又出豉油；佢哋狺狺腳等運到，你哋就戇居居等坐監！

原來呢個神棍大騙子「姜+偉」，就係一直聞名中外嘅「姜毒」！

鍾情局●零零發