「香港學」係乜？咩人會研究「香港學」? 研究「香港學」真係為香港好？

美國係二戰之後，透過收集一啲國家/地區嘅經濟、社會、地理同民眾情況，進行一個跨學科嘅「區域研究」，以制定相關嘅國際戰略決策，亦同時利用所謂學術交流，將美國模式向外輸出，藉此擴大美國對全球社會嘅影響力。

係「區域研究」嘅範疇之下，最近呢7、8年，香港同海外冒起咗一個所謂新學科：「香港學」/「香港研究」。

喺2017年，「沙田大學」教授李X君(亦係反華組織，香港民主委員會成員) 同埋一啲學者，包括佢學生李XX，成立咗「香江學會」，去研究「香港學」。聽聞個學會成立嘅時候，已經招攬到200幾個國際同埋本地學者為會員； 而近幾年，呢個學會同一啲研究「香港學」嘅海外組織關係非常密切，經常舉辦各種活動，定期發佈研究成果，不斷喺國際社會，推動「香港學」嘅發展。佢哋表面係以研究香港歷史、民主發展，政策討論，探討學術、新聞自由，以及凝聚所謂「離散港人」及探索香港未來發展為題，但實際上，潛台詞都離不開抹黑一國兩制、國安法……高人話「香江學會」執委成員，由創會到而家，都係由黃絲學者主導，一啲咁有「立場」嘅執委會，會點樣展開「香港學」嘅研究呢？喺咁嘅前設之下，研究「香港學」嘅動機，就好難以單純學術嘅角度去睇喇！

至於係台灣島，「中央研究院」就係主要推動「香港學」嘅組織。呢個在台嘅「中研院」由台灣當局出資營運，曾接受過一個美角基金嘅資助，並且係一間以政治掛帥、有反共仇中立場嘅所謂學術機構，亦有民進黨「白手套」之稱。聽聞佢哋都招攬咗好多香港反政府嘅學者，包括「佔中3妖」之一陳X民，反政府KOL沈X暉，同埋李XX做台柱。2019年，「中研院」邀請咗「香江學會」，參加台灣島「社會學會」嘅年會，當時李X君已經帶住李XX出出入入。由2023年開始，「中研院」更每年舉辦「香港研究」研討會，並透過訪問學人計劃、座談會等等交流活動，召集世界各地反中亂港人士，齊齊抹黑一國兩制。

英角都唔執輸，2023年係「Suxxey」大學，就成立咗首間喺歐洲推行「香港學」嘅「香港研究所」。佢嘅創辦人「Malte馬寶X」喺呢間大學嘅國際政治高級講師，亦都係反華組織「香港監察」嘅創辦人。佢2007年曾經喺「香江大學堂」做過一年嘅交換生，跟著喺香港讀博士，所以同香港一啲反對派好friend，包括有粗口大王黃X民、港獨分子梁X琦……2017年佢又同「陳四萬」一齊去英角，出席反華智庫搞嘅研究會添。而著咗草嘅亂港KOL鍾X華、黎欣X，就係佢核心團隊嘅成員。睇嚟呢個組織都好有反中亂港嘅色彩。

「香港學」呢幾年受到力捧其實好吊詭！一個「豆膶」咁細嘅地方，點解令到咁多海外學者，趨之若鶩咁去研究香港嘅？高人警告我零零發，相信「香港學」絕非單純嘅學術研究，可能以研究香港為名，積極連結本地同海外反華學者，逐步構建亂港嘅論述，並且通過凝聚海外港人社群，進行反中亂港嘅政治操控，以影響西方國家對香港嘅政策。

另外，高人又話，「香江學會」創辦人李X君近年退居幕後，並且有意交棒俾佢得意門生李XX。李某50歲，已婚，佢早年都係「沙田大學」新聞系畢業，之後喺美國攞到博士學位，就返母校任教。江湖傳聞話李某一家黃到爆，好似二細佬咁，佢面書icon分別係黃絲帶/黑色紫荊花，又多次發表反政府言論……而做老師嘅三妹、同埋四弟都有樣學樣，唔知大哥李某係咪又係咁㗎呢？ 如果係就大件事喇，佢而家喺大學教書……喎！

聽聞李某近年不避嫌到世界各地，參與「有既定立場」嘅會議同研討會，包括2023同2025年出席「中研院」搞有關香港主題研究嘅研討會，仲擔任主講嘉賓。「中研院」喺今年12月會繼續舉辦第三屆「香港研究」研討會，除咗李某，仲邀請咗好多海外學者，包括50幾位香港九間大學嘅教職員出席。 高人話，好多香港學者，以為呢個「中研院」係正當教學機構，所以報名參加。但睇返「中研院」成立嘅理念，過去活動嘅議題、出席人士反華嘅政治背景，我零零發覺得，除非香港嘅學者打算做「無間道」啦，否則同咁多反中亂港嘅人同框，參與議題有鮮明價值預設嘅活動，係咪要三思先出席呢？不過，啲反對派又會拎「學術自由」嚟做護身符……咁去唔去就閣下自己決定啦！

如果各位學者出席，我零零發想問：
1.佢哋係用工作定係私人時間出席？學校係咪當呢啲係公幹呢？
2.佢哋嘅機票、酒店使費，究竟係自己出？抑或係用我哋嘅公帑呢？

各大院校嘅管理層，唔知有咩諗法？

鍾情局●零零發

鍾情局

** 博客文章文責自負,不代表本公司立場 **

「人生有幾多個十年」，相信大家對呢句經典電視劇對白絕對唔陌生。十年絕對唔係一個短嘅時間，尤其係失而復得的，更加要好好珍惜！

我零零發咁有感觸，係因為最近有報導指「35+顛覆案」嘅主犯趙家賢已經出獄，成為《維護國家安全條例》生效後，第一個獲提早釋放嘅國安罪犯。

趙家賢而家40歲，正值壯年，佢由細到大喺香港讀書，喺學生嘅時候已經立志服務社區，可惜佢遇人不淑，加入咗亂港「白鴿黨」被徹底洗腦，2007年22歲嘅佢就被力捧，成功當選為東區區議員，仲創下成為最年輕議員嘅紀錄。但少年得志大不幸，喺「白鴿黨」吹捧下，佢喺亂港路上愈踩愈深，之後仲認識埋戴妖，搞到泥足深陷。

係「35+顛覆案」嘅審訊，趙家賢選擇做從犯證人。佢係庭上講，當年同意協助搞所謂初選，原意只係想建立一個平台，俾市民透過投票表達意見，改變吓個社會。但同戴妖合作期間，發覺越嚟越唔妥，就好似上咗賊船，當知道戴妖嗰個「攬炒十步曲」之後，更直言感到「心寒」，因為戴妖嘅計劃，完全超出咗佢原本嘅諗法，同時佢亦覺得好嬲，因為呢個「攬炒」顛覆圖謀，絕對唔係佢多年協調「泛民」嘅初心，所以佢覺得係「被騎劫」、「被利用」嚟推冧政府。佢仲話喺《香港國安法》生效前後，都有問過戴妖所謂初選係咪違法，戴妖當然話唔犯法啦，但之後發現錯信咗戴妖，但一切都太遲。戴妖整場「攬炒」同包庇黑暴份子嘅圖謀，真正「攬炒」咗一班「35+顛覆案」參與者，以及俾佢哋煽動而違法嘅年青人同市民，要承受牢獄之災，最終仲害咗成個社會。

趙家賢最後被判「串謀顛覆國家政權罪」罪成，法官當時嘅量刑起點係15年，但因為佢做從犯證人幫控方舉證，所以獲減刑至7年。之後再因為佢坐監嗰陣行為良好、展現出真誠悔意，喺今年10月28日就獲提早放返出嚟。屈指一算，由2021年2月還押到今年10月獲釋，佢實際只係坐咗4年8個月，比起原本15年嘅刑期，足足坐少咗十年有多！如果佢當初無選擇做從犯證人、無好好反省自己嘅錯，佢就會多失去十年，仲要屋企人操心多十年。

犯咗事，要坐監，相信大家都認同係理所當然，而嚴懲國安犯更係國際慣例。不過喺香港，任何囚犯，包括國安犯，都會有提早釋放嘅機會，但呢啲機會從來都唔係必然嘅，而係特區政府特意立法，賦權俾懲教署去酌情處理，希望啲真心悔改嘅囚犯，可以提早重投社會、改過自新！

根據《監管釋囚條例》第6條，任何囚犯坐咗三分之二嘅刑期之後，如果工作勤奮同行為良好，都有機會提早獲釋。但為咗更有效保障到市民同香港社會嘅整體利益，免除國安風險威脅，所以係《維護國家安全條例》下加多咗個條件，就係只有得到懲教署署長信納，呢啲行為良好嘅國安犯唔會「不利於國家安全」，先至可以提早釋放。

法例寫得咁清楚，但都會有囚犯以為提早釋放係老奉嘅，好似因為「煽動分裂國家」罪成判囚5年，被稱為「第二代美角隊長」嘅國安犯馬X文，因為不滿無得提早出獄，所以喺上年提出司法覆核，結果被高院上訴庭駁回。睇番個審訊，當時就揭露咗馬X文喺監獄入面，仍然有接觸黑暴份子……佢咁嘅行為，大家點睇？

我零零發就趙家賢今次提早獲釋一事，歸納到兩個重點。第一，趙家賢可以被判相對較短嘅監禁，主要係因為佢及時覺醒，並充份展現到悔意，並且喺單案審緊嘅時候，選擇咗做從犯證人，挺身而出幫控方頂證戴妖嘅「攬炒」顛覆圖謀。

第二，今次趙家賢呢個活生生嘅實例，就足以證明香港嘅國安法，係恩威並施，唔係鐵板一塊，絕對會俾真心悔改嘅國安囚犯提早獲釋，並唔係好似西方媒體同外部勢力咁，講到《維護國家安全條例》剝削香港囚犯權利，令所有國安犯都唔會有被提早釋放嘅機會。事實係，只有嗰啲死不悔改、冥頑不靈，繼續想威脅國家安全嘅亂港分子，先會被排除在外。

趙家賢選擇做從犯證人，將功補過，協助舉證國安罪行，正如佢喺庭上面講，只係將犯法嘅真相如實咁講俾法庭聽，唔係屈人，又唔係講大話，咁樣先係真正嘅伸張正義。佢而家就可以把握機會盡早展開人生新一頁，爭取返自己嘅青春、前途，同埋冇再多失去人生中重要嘅十年光陰。
希望趙家賢嘅經歷，能夠令更多國安犯反省，回頭是岸啦！

鍾情局‧零零發