上星期我零零發講咗有啲人「災不可失」，想利用大埔宏福苑大火搞事，好多人都覺得我杞人憂天，點知嗰日啱啱post完篇文，下晝國安處就拉咗8個人「非法操練」，同埋搵到啲爆炸品材料，仿製刀、槍，3D打印機，而其中一個被捕人仲話接受訓練係為咗將來喺暴亂中對抗警察！我聽完之後背脊都涼咗一大截！有高人話黑暴2.0，唔係無可能，於是我對比咗黑暴時候同而家嘅情況，發覺有好多嘢熟口熟面，不過如有雷同，實屬巧合！
首先，好多人都唔知維護國家安全條例嘅「非法操練」係乜嘢罪行，所以我零零發同大家解讀下: 呢條法例係指任何人，未經保安局局長或警務處處長准許， 提供或者出席「指明操練」(即係使用攻擊性武器、進行軍事練習等等)，都係違法嘅 。不過大家唔使擔心，如果係教育機構或者以康樂目的而進行嘅活動，好似打war game咁，根本就唔會觸犯呢條罪行。呢條法例立法嘅目的，係防止有人喺冇合理情況之下，藉接受軍事訓練，破壞社會安寧，危害國家安全。
而家不如講番宏福苑火災之後發生過啲咩事?
假消息
係短短一兩日，網上已經有海量嘅「訊息」，去挑動市民情緒搞分化。例如：抹黑「關愛隊」搶物資、報警驅趕派物資嘅義工。消防員嘅救火及保護裝備唔夠，無飯食。警方出動6000防暴警、配備步槍及裝甲車，鎮壓清場民間物資站。政府未有為災民提供免費住宿，佢哋要自費入住每晚高達$8000嘅酒店。有大量非火災災民(大媽/有普通話口音嘅人)盜取救援物資。我零零發仲聽過坊間誇張到有人傳，宏福苑有千幾戶，得百幾人死一定有隱瞞；咁樣講，同當年831太子站死咗好多人嘅謠言，係咪好相似呢？
文宣
嗰幾日喺社交媒體出現好多口號、貼圖，例如「支持民建聯，火燒你家園」、「香港人加油」、「真正要取代的從來不是竹棚」、「竹棚無罪」等等，企圖將批評嘅矛頭指向政府或者親政府組織、人士。另外，又有人喺網上搞聯署，提出所謂「四大訴求」，包括要求成立獨立調查委員會 (黑暴嘅時侯又係要成立調查委員會查警察)；及後喺災場附近，更有戴黑口罩人士，向途人展示有關標語。調查火災成因同責任梗係要做啦，但唔係喺火都未救熄，幾多死傷都未能確定嘅時候，喺度呱呱嘈，查東查西㗎，好似如果唔即刻做，就係政府唔啱咁。其實火災發生之後，警察同廉政公署已經即刻展開調查啦！所以我零零發覺得，其實有人利用災情圖謀作亂，將扭曲嘅「訴求」合理化，疑似關心，實質挑撥。
而自從大火之後，無論本地定海外嘅黃人都不停出post帶風向，好似我零零發以前提及過嘅大小黃人，包括許至瘋、衣冠聰、楊x宇、袁x夷、許x婷、鍾x華……都好熱烈地發嗡風，一唱一和，點解佢哋咁關注？大家諗吓啦！
動員義工學生
喺火災發生後嗰晚開始，已經有好多義工落去幫手，盡顯香港人真善美嘅一面。但唔知點解有部份義工，喺嗰度唔係做緊義工嘅嘢，反而同政府人員同埋「關愛隊」為敵，處處挑機，而嗰幾日亦見到唔少着住校服嘅中學生落場， 情節似曾相識……
疏導情緒變成捆綁情感
今次有人係大埔整咗個「心意牆」，俾市民貼上心意便條，對災民表達關懷；另外，有人喺災場附近派黑絲帶去悼念災民，呢啲都係好正常疏導情緒嘅方法。但係同當年立會「連儂牆」，佔中派「黃絲帶」、黑暴派「香港加油」貼紙手法好近似，我零零發總係覺得成個鋪排，好似將個人情感同某啲嘢捆綁埋一齊咁，個feel跟2019年好相似囉。
勇武Stand by
上星期因「非法操練」拉咗嗰班人，有組織，有武器，佢哋打算做乜？係咪同黑暴時期嗰班勇武分子好相似？ 根據警方講，佢哋仲追查緊有幾多人曾經接受過呢個「非法操練」? 究竟有幾多參加過「非法操練」嘅人，潛伏喺我哋之間？有幾多呢啲炸藥收埋喺我哋屋企或者寫字樓附近？
我零零發本來以為天下橋段一大抄，係有咁啱得咁蹺啫，但當我睇埋呢班「非法操練」嘅人，同埋黃友一面倒嘅貼文、假訊息嘅種種跡象，似乎我嘅擔憂，唔係冇道理、唔係冇可能囉！
2019年黑暴發生嘅時候，道路周圍俾黑暴份子縱火、設路障截查車輛；阻住搭地鐵嘅乘客出入，搭地鐵跳閘唔俾錢，又開水喉、擲汽油彈去破壞地鐵站，「裝修」唔同背景嘅商鋪，「私了」唔同政見嘅市民。仲記唔記得紅磡隧道口火光紅紅，多間大學變咗黑暴基地，喺泳池練習擲汽油彈，喺天橋度同警方對峙，搞到新界吐露港公路交通癱瘓咗好多日……
2019年激進黑暴分子破壞社會安寜，當時已經起碼令到兩名無辜市民一死一重傷(被磚頭掟死嘅羅伯，被燒傷嘅李伯)，仲有好多市民同埋執法人員受傷。呢幾年難得可以回復平靜，大家係咪想重新經歷2019年嘅香港？ 而最近澳洲，同埋美國都分別發生槍擊事件，死傷無數，人心惶惶……
天下太平係來之不易，唔係垂手可得，真係要好好珍惜！
鍾情局●零零發
鍾情局
** 博客文章文責自負,不代表本公司立場 **
2021:
8月6號，政壇術士「高達」，鬼鬼鼠鼠飛咗去倫敦……
8月6號之前兩日，「高達」呼籲「白鴿黨」黨員堅持做好地區工作……
8月6號之前一星期，「高達」同「白鴿黨」成員一齊食飯，討論香港前途……
6月20號，「高達」再出任「白鴿黨」副主席，以穩定黨內士氣 ……
政壇號稱「高達」嘅李x達，年近70，喺香港讀完大學，教咗幾年中學，之後就從政。睇返佢過去幾十年喺政壇，資質平庸，點解會彈得起有人識？我零零發綜合咗各路江湖傳聞，佢有今日，皆因有三多。
「所謂貴人」多
「高達」當時嘅第一名貴人，就係吳X欽。據說兩人曾經喺屯門大興邨佛教沈香林中學任教，吳X欽在政治上較受歡迎，力撐「高達」。「高達」喺1985年當選葵青區區議員，佢嗰時靠黐住其他「犯民」，成為葵青七子之一。喺1991年埋咗「白頭李」、司x華、劉x石等人成立嘅「港X盟」，(「白鴿黨」前身」)，成功進入立法局。回歸後，就斷斷續續做議員，直到2012年落敗後就冇再參選。
「高達」好擅長借力打力，做議員嗰段時間，佢又搵到第二個貴人，「白鴿黨」第2任主席楊X。「老楊」除咗同啲「犯民」大佬係老best之外，仲要係「生果佬」襟兄弟。其實識人好過識字，2004年「老楊」放棄連任，就直接推咗 「高達」上去做「白鴿黨」黨主席。雖然「高達」做過「白鴿黨」正/副主席，但冇乜能力，不過佢心頭高，又不自量力，所以佢喺2005年嘅時候，仲學人參選行政長官，但係最後連提名都攞唔到!
「高達」雖然所有議席都輸晒，但一直霸住「白鴿黨」中常委有真正話事權一職，打死都唔走，原來佢黐到第3個貴人「生果佬」，所以要留喺度幫佢操盤。唔好以為有貴人就掂晒，聽聞「高達」要全天候服侍「生果佬」，要隨傳隨到，仲頻頻被召去佢何文田屋企接order。
喺佔中期間，「高達」多次被影到同禍港「犯民」老鬼「白頭李」、「AV仁」同「陳四萬」去「生果佬」屋企密會，雖然「佔中運動」最後失敗收場，但「高達」就成功表忠搏出位，喺中環、金鐘示威，結果被控煽感他人非法阻礙行車路，判監8個月，緩刑兩年。
2014年12月，「高達」喺一個網台節目，公開暗示「生果佬」係「白鴿黨」嘅金主。佢又自爆喺佔中期間，「生果佬」一個鐘頭打13次電話俾佢，主僕嘅關係都幾明顯囉! 到咗2019年6月，「生果佬」由台灣返香港後，就急召「白頭李」、「AV仁」同「高達」去屋企密會兩個多小時，冇耐大家都知發生咩事啦！「高達」同「生果佬」關係咁深，所以佢點會唔驚俾人拉、點會唔着草啊!
出賣人多
「高達」出咗名思維同人都無乜高度，所以喺1987年時任英國外相賀維訪問香港，出席晚宴宣佈1988年香港立法局會取消直選嘅時候，「高達」就搏一鋪，拉條banner出嚟，大大聲用英文鬧賀維「Bullshit! Shame on you」! 原來為咗搏出位、搏上鏡，開條路畀佢哋去選舉嘅主子都要出賣!
喺35+案認罪嘅被告區X軒，佢岳母原來就係「高達」前妻「萍姐」個妹(下一段再講)，可能愛屋及烏，所以「高達」積極向「戴妖」、李X人推薦區X軒出任「非法初選」嘅籌劃者，又欽點為接班人，去幫「戴妖」推銷「非法初選」俾「犯民」各派別，達到推翻政府嘅終極目的！如果唔係有「高達」嘅加持，愛佢變成害佢，區X軒可能唔會行上呢條路!
不過「高達」就醒喇，冇直接參與「非法初選」，但眼見其他骨斡成員同參選人相繼落網，佢「心中有鬼」，擔心自己幕後推動「非法初選」嘅角色被揭發要找數，所以急急腳咁走。佢外逃嘅消息傳出後，引起「白鴿黨」內不少反彈，有黨員喺社交平台形容「高達」：「不負責任，不知所謂」。 早兩日先至拍哂心口，呼籲啲黨員努力做好地區工作，自己轉頭就靜靜雞走佬，完美演繹「叫人衝，自己鬆」!
桃花多
咪睇「高達」咁嘅款，佢最後一多，就係狗血三角戀。做中學老師嘅時候，認識咗同行「英妹」，並於1984年結婚。剛做立法會議員冇耐，喺1992年就搭上女助手「萍姐」，搞婚外情，拋棄糟糠同「小三」結婚。幾年後，呢個「多情矮仔」，又暪住現任太太「萍姐」，翻撻前妻「英妹」，「前正印」竟然淪為「小三」，真係混亂到冇人有。最後再次離婚，2001年再次同前妻結婚。呢啲背叛再背叛嘅男女三角關係，我零零發真係唔識囉！ 而在「犯民」內部，好多人為「英妹」、「萍姐」不值，認為兩個都係好好嘅人，只係畀衰人害咗。
敗走海外後，「高達」接受「劉大姐」嘅訪問，講到自己知嘅嘢太多，唔留得低喺香港，因為好容易會連累其他人咁話……真係笑死隔離，怕死咪認囉，仲要死撐扮大哥！其實大家都估到，如果「高達」被拘捕，為求自保，佢一定會做「二五仔」，爆哂「犯民」啲衰嘢出嚟囉！
而佢走佬之後，就一直霸住個「白鴿黨」副主席嘅位，到2022年5月先至肯申請退黨。點解呢？同其他走佬嘅人一樣，佢出咗去要靠嗶哩吧啦亂講嘢，爭取知名度，等啲反華金主養佢! 如果佢冇咗「白鴿檔」副主席嘅身份，可能就身價暴跌，咁點搵食呀?
「高達」包裝到自己係因為《國安法》打壓而逃走，所以佢經常聯同其他流亡海外嘅黃人，好似周X康、陳X敏、鍾X華，蒙X達、羅X聰等人，出席由美角反華組織「香港監察」、「香港民主委員會」同「香港自由委員會」舉辦嘅論壇/研討會，高調攻擊「一國兩制」，香港民主、言論同信仰自由，講到立咗《國安法》之後，香港被噤聲……佢又經常接受「黃媒」，好似「零角」、「干傳媒」同「chase新聞」嘅訪問。 總之就夾埋反華勢力、同海外「黃人」、「黃媒」，去說一個「假的香港故事」，繼續抓銀，刷存在感啦！
一個無作為、靠挨挨嘣嘣上位嘅小人，如果唔係有以上三多，俾人喺茶餘飯後，可以剝吓花生，我零零發諗，佢到而家都係一名無名矮卒，真係唔會有人識佢囉!
鍾情局●零零發
