話說前立法會議員「陳師奶」，喺2021年靜靜雞去台灣島，自稱入廚只得3年，就開咗間私房菜，最近仲攞埋個美食獎，好似好叻叻咁！不過大師傅「頂爺」講過，烹飪係一門學問，係要經驗累積嘅，所以我零零發覺得「陳師奶」可能連把刀都未真正舞得掂……不過都唔使太認真，講白啲，如果佢唔係有呢個「黃政棍」嘅人設，台灣島又點會捧佢上天呢？大家就當連續劇咁睇吓就得㗎啦！
咁「陳師奶」究竟點樣從大律師、「尊貴」嘅立法會議員淪落到要敗走，喺台灣島揸鑊鏟搵食呢？
「陳師奶」喺香港出生，日日都發明星夢，喺1992年，21歲未夠，大學都未讀完，就走去參加「香江小姐」選舉，希望一夜成名。 但以佢嘅「美貌與智慧」，同埋據佢自己講當年130磅嘅師奶look，又點會跑出呢？咁佢之後唯有柄埋，寄情讀law，做住假髮大狀先。但愛出鋒頭同強烈表演慾嘅DNA，係從來都冇離開過佢，於是喺2003年，佢就參與政治舞台劇演出，亦都因為咁，而認識咗行家「白頭李」、余x薇等人。「陳師奶」咁鍾意出風頭，咁鍾意做「偽人」，絕對啱晒係政治圈混水摸魚，於是呢兩個老油條就招攬呢個「舞台舊人、政治新丁」加入咗工民黨，從此就踏上政棍呢條不歸路。
初初入政圈時，「陳師奶」自知冇乜料到，所以扮晒乖巧，日日以老成行政look示人，於是呃咗個山頂區區議員嚟做，2008年又同余x薇行孖beat，當選立法會議員。但好景不常，2011年佢不但連任區議員失敗，第二年連立法會選舉都輸埋，變咗雙失議員。為咗突圍，於是把心一橫，將一頭長髮剪短，染埋綠色，化行妝， 丟晒啲「老西」，換上奇裝異服去扮年青搶眼球，再搏一鋪！
呢個全新形象，成功幫「陳師奶」搶fo，喺2016年得以重返立法會，不過佢做立法會議員嗰幾年又無咩建樹，仲比媒體爆出佢喺「議會缺席王」排名，高居第二位，缺席率高達兩成，白支議員高薪，浪費公帑。而過咗冇耐，佢又因為「佔中」期間，與邵x臻等人煽惑他人作出公眾妨擾而被控，經審判後喺2019年被裁定有罪。喺呢一個「生死存亡」嘅時刻，佢嘅「偽人」本色即刻上身，滿面病容話個腦部生咗個腫瘤，要切除同接受放射性治療，希望法庭輕判。結果佢被判監8個月但緩刑兩年，成功過關，而邵x臻就要坐足8個月。
係開腦切除腫瘤呢個大手術之後，「陳師奶」奇蹟地神速復原，仲喺2020年4月新冠肺炎爆發期間，被媒體影到佢違反「限聚令」，去咗深水埗一間酒吧吃喝玩樂。當時酒吧擠滿人，氣氛非常熱鬧，但「陳師奶」竟然砌詞話係以立法會議員身份，同酒吧業界開會咁話，佢更聲稱酒吧係落半閘閂咗門喎。不愧係「偽人」，講大話真係唔眨眼！之不過後來有網民篤爆，話酒吧嗰晚喺偷偷地開門做生意，而「陳師奶」就劈酒劈到12點幾，腳步浮浮、醉醉地咁離開。「陳師奶」之後都有被傳票控告，但係又俾佢走得甩。
呢幾單嘢之後，「陳師奶」知道誠信破產，基本上無辦法參選下一屆立法會選舉，好難再喺政壇呃到飯食，所以喺2020年9月立法會會期完之前，佢就話因個人健康同家庭理由，正式退出政壇，係記者會上更哽咽，講到自己經歷生死邊緣，又話愧對母親，所以趁健康，陪多啲老人家等等，又寄語各位手足要繼續支持所謂「民主運動」同「黃色經濟圈」……而家睇返轉頭，原來係鋪定條後路比自己！
雖然過咗緩刑期兩年，呢個唔知仲做過咩嘅「陳師奶」係《國安法》嘅震懾力之下，就狠心拋低「相依為命」嘅年邁母親，神神秘秘咁竄走咗去台灣島。有用時就攞阿媽出嚟扮孝順女，冇用嘅時候，就嫌舵手掕腳丟低個老人家，不過佢咁嘅表現，都係一貫反中亂港份子「自己鬆」嘅做法。我零零發以為佢走咗佬，就唔諗住返香港，不過線人話「陳師奶」臨走前，特登喺一間大律師行掛名，似乎想留條後路俾自己。其實「陳師奶」身為一個律師，被判「煽動他人犯法」罪成，大律師公會係咪要慎重考慮吊銷佢嘅專業資格呢！
去到台灣島，為咗賺盡「黃色經濟圈」嘅錢，「陳師奶」於是就用佢嘅政治人設，以「延續服務他人，回饋社會嘅初心」做噱頭，學人開設私房菜餐廳，仲以天價每位成千蚊港紙嘅價錢，俾啲幾餸飯人食，食水深到呢！聽聞「教怯」餘孽葉x源、「黃偽人」杜x澤都幫襯過。而開張頭幾個月，的確生意唔錯，而且仲攞咗個台灣島美食獎，所以「黃氣」急升，豬籠入水！一個之前喺香港淨係識得用微波爐叮嘢食，從來冇煮過餸嘅人，真係三年就可以變廚神？ 咪玩喇！！！ 不過又係唔使咁認真喎，「生果佬」都可以提名「落背耳」和平獎，盲字都唔識多個嘅人，都可以入讀英美最高學府，只要你係黃人，有咩係唔得㗎？！
不過「陳師奶」都知自己斤兩有限，所以餐廳攞獎之後，就高調接受媒體訪問，大灑溫情牌，話好多謝台灣島嘅照顧，又話期待一班坐緊監嘅「貴賓手足」，可以日後嚟享用一場如在家中嘅盛宴，回味過去嘅溫情、家嘅感覺咁話喎……(即係四餸一湯，白飯任裝嗰類嘅住家飯，唔好諗住有鮑參翅肚或者花巧嘢食囉！) 如果「陳師奶」真係咁有心，不如拎賺賺埋埋嘅錢，煮啲兩餸飯派俾「手足」仲好喇！「偽人」即係「偽人」，咁七情上面、打冷震嘅對白，係佢先嗡得出囉！
「陳師奶」已經年過半百，唔知係「黃色經濟圈」揸鑊鏟搵食嘅「美夢」可以發到幾時呢？「黃色經濟圈」喺香港已經衰到貼地，而「黃友們」多數只會口講支持，唔知呢種俾面嘅衝動消費，又可以維持幾耐？
鍾情局●零零發
鍾情局
** 博客文章文責自負,不代表本公司立場 **
上期講到美角執到「生果佬」呢隻千年難得一遇充滿賣國基恩嘅棋子，而家睇吓佢哋幫「生果佬」reset咗個咩人設先！
捍衛新聞自由工作者？
「生果佬」1989年賣民運T恤發咗國難財之後，就搞咗份報紙同周刊。 其實好多香港人都係睇「生果報」大，佢嘅套路主要都係揭人私隱同嘩眾取寵，用狗仔隊去跟蹤名人作故仔，呢啲小報式、簡單而又充滿娛樂性嘅報道手法，好多人都好受落同埋習慣曬；而呢份「生果報」又成日用煽情嘅手法，去報道一啲社會和國家相關嘅議題，制造事端，挑撥民怨民憤，潛移默化地將反政府、反祖家嘅種子，就散落係幾代讀者嘅心裏，目的就係等機會爆發！
咁「生果佬」點解佢會無喇喇去攪報紙、攪雜誌？因為無咩組織嘅影響力同滲透力，會大得過傳媒! 而當「生果報」踩過界嘅時候，本地「毒媒」同美西方就會一唱一和，話香港無新聞自由，話「生果佬」係維護新聞自由嘅犧牲者咁囉！嘩，呢個人設實在太高明了！
虔誠教徒？
話說「生果佬」1997年入教，搵咗美角一家大報高層「麥昆」做教父，點解「生果佬」會搵美角人，又係做傳媒嘅人做教父嘅？唔通崇拜佢後台夠硬凈，定係可以經常交流報業心得呢？
而家啲外媒成日話「生果佬」係虔誠嘅教徒。我唔明「生果佬」做過啲乜嘢會令大家覺得佢好虔誠呢?「虔誠」呢個加持係邊度嚟㗎呢？唔通佢關照「陳大教主」搭飛機坐頭等艙，可以同佢食飯吹水，就可以高級過其他教徒？唔通出咗錢就係虔誠啲？
民主梟雄？
聽聞同「生果佬」共事過嘅人都會用「一言堂」嚟形容佢，一個本質唔民主，對好多嘢都唔覺得重要嘅人，點解會跑在民主最前線嘅，做咗「犯民」icon嘅？無他嘅，佢一直都用張「生果報」去宣揚美式民主，又踩底祖家，加上佢有錢，養咗唔少犯民線人，好似「陳大教主」、「陳四萬」、「袋巾梁」、「長毛賊」等等！咁好自然，佢就成為「犯民」嘅領頭羊啦！
「生果佬」嘅後半生好似好風光，佢不但被神化為一個虔誠天主教徒，一個白手興家嘅企業家，而且係傳媒大亨，可以同大教主、前高官平起平坐，又可以去美西方見吓啲政要……而自從拉咗佢「串謀勾結外國勢力危害國家安全」罪之後，金主仲加多咗戲份俾佢，就係做受政權迫害嘅「囚犯」！係美西方部署下，「生果佬」即刻被360度無死角咁利用，去抹黑香港嘅司法制度同囚權嘅情況；嗰啲無理指控同謬論，真係無日無之，嗡得就嗡， 不過真係有唔少人被誤導咗㗎！
單獨囚禁，剝奪人權 ?
「生果佬」被單獨囚禁呢個安排，由還押嗰日，到今時今日被判刑，一直都被大肆炒作。事實係「生果佬」自己要求單人囚禁，而諗落都覺得正常吖；試問堂堂一個傳媒大亨，點會肯同其他犯一個倉喎！加上佢都係一個「星」級囚犯，點都會自動upgrade 去「獨立倉」啦！仲有，個個囚犯都係「放風」先至可以吸收下陽光同新鮮空氣㗎啦，依家係坐監，你估住酒店咩，日日去曬日光浴呀！
冇適切治療，死於監倉？
「生果佬」個仔叫黎x恩，喺2020年底巳經離開咗香港，咁多年都冇返過香港，冇見過老豆，冇傾過電話，但佢就成日喺外邊講阿爸好慘，有非常嚴重嘅糖尿病，精神又差，又冇得治療，可能會死喺監倉咁話！最近連走咗佬個女黎X，都喺海外同黎X恩一唱一和，講到老竇病到就嚟「si」咁，唔通真係想快啲分身家？
想當年，好多越南人都特登偷渡嚟香港犯案搏拉，目的就係想免費享用一等一嘅醫療，免費醫番好啲奇難雜症，出冊後又一條好漢。另外，一個囚犯要睇病，因為保安風險理由，佢一定唔使好似普通市民咁要等幾粒鐘，所以我零零發夠膽話，囚犯隨時會得到比市民更便捷同更有效率嘅醫療服務呀！
喺2024年11月，「生果佬」自辯去駁斥主控嘅時侯，中氣十足。而喺舊年8月結案陳詞嘅時候，「生果佬」話個心唔舒服，懲教署就即刻安排咗部心臟機去監察住佢嘅健康情況，又日日有救護員standby喺法庭。早兩星期判刑見到「生果佬」，佢確係清減咗啲，但精神好好。好多人用10幾廿萬去美容、健身院，都係想要有呢種「健康瘦」，所以呢啲天花板級頂流嘅醫療服務，喺邊度搵呀！
冇得領聖體？
一班連監都無探過嘅海外律師團隊，就話係代表「生果佬」，成日大大聲同聯合國提出緊急申訴，話特區政府唔尊重宗教自由、懲教署拒絕俾生果佬領聖體等等；而啲外國天主教媒體又冇fact check，就撲出嚟和應，真係亂嗡當秘笈，你話佢哋唔係夾埋都冇人信喇！不過「生果佬」嘅本地律師團隊，一早就話佢哋係唯一代表「生果佬」嘅律師團隊，又澄清係「生果佬」選擇唔使神父為佢做彌撒、領聖體咋！如果咁講，嗰班海外大狀係咪呃人？有冇知法犯法呢？真係要請高人指點迷津喇！
「生果佬」而家被判20年監，外力又用盡所有辦法，大喊話要無條件釋放佢，連冬奧冠軍唔同佢求情都好似欠咗佢咁，你估搵幾個紅鬚綠眼外國官員同議員加持就得咩！香港法庭嘅審訊公開公正，又有上訴機制，而班外國領事又日日去聽審，發生咩事根本一清二楚。所以美西方嘅牌面當然好似「幫緊你、幫緊你」，但實情就係想無限loop 啲謊言，不斷重複「生果佬」嘅人設，去瞞騙所有對單案一知半解嘅人，利用單案去污名化中國。 其實佢哋不知幾開心生果佬判得咁重，因為呢20年都唔使再度新橋，而且佢哋更想「生果佬」可以壯烈犧牲，咁先可以有更多話題去唱衰中央同特區政府。雖然係咁，但「生果佬」都無得say，只可以繼續做鵪鶉，任由宰割。「生果佬」嘅生死，邊到會有人理㗎！
我零零發諗，當初連美西方都估唔到，「生果佬」呢隻蘋果棋可以咁襟玩，唔單止好人好姐嗰時可以利用，而家連衰咗坐緊監都用得，再難聽啲，就算躺平地府，相信都可以繼續無限loop，被消費！
鍾情局●零零發
