星光背後｜力臻經歷家庭巨變放棄出道 父親遺物重燃歌手夢

現年30歲的力臻自2021年投身演藝圈，曾為中學教師及現身兼補習導師。最近於ViuTV選秀騷《CHILL CLUB X THE FIRST TAKE：THE STAGE OF VOICE》「歌手組」中脫穎而出，獲邀飛到東京登上日本著名頻道「THE FIRST TAKE」獻唱全新作品《Flyin' for your love 2882點85》。力臻乘勢為派台新作接受雷霆881商業一台《星光背後》專訪。真名黃力臻的力臻，其實早於2016年仍就讀中大時已贏得歌唱比賽冠軍，更有機會於翌年出碟做歌手。奈何同時父親猝逝，他被迫放棄出道及需負起養家重擔。回憶當年經歷家庭巨變，力臻說：「一夜之間，啲親戚全部都話：『你要大個仔呀，頂住！』嗰陣我仲未畢業，壓力大到心理都有問題。」當了數年教師，經濟穩定下來再重拾夢想，最終去年卻不獲學校續約，力臻坦言：「當刻有打擊，穩定收入點？係咪我平衡做得唔夠好？」

力臻獲邀飛到東京登上日本著名頻道「THE FIRST TAKE」獻唱全新作品《Flyin' for your love 2882點85》。

作為家中獨子及成長於基層家庭的力臻擁有中大數學及數學教育雙學位，談及2018年開始教書的起薪點，他說：「第一間傳統直資學校人工已經好好，第二間國際學校撬我過去更高，養到家亦儲到錢。但心理唔平衡，見到好多以前歌唱比賽嘅朋友先後企響叱咤台，譬如Zpecial嘅康聰、曾比特或者吳林峰，當年我哋一齊起步，個個都可以繼續追夢，感覺個天響度玩我。」

力臻經歷家庭巨變一度放棄出道。

力臻坦言小學五年級已立志做歌手，2016年讀大二期間，因參加C AllStar經理人公司「私人國」主辦的《ShowOff 歌聲對戰》比賽摘下冠軍獲得一紙合約，並獲安排於翌年出碟。奈何父親於2017年猝逝，他被迫作出取捨，「爸爸好錫我，為養家同供我讀書，日頭做運輸，夜晚做鐵路維修。就喺準備出碟嗰年有一晚凌晨收到電話，話爸爸送咗去醫院，我同媽咪去到，姑娘話爸爸到醫院已經無咗心跳。當時好亂一片空白，一夜之間，啲親戚全部都同我講：『你要大個仔呀，頂住！』嗰陣我仲未畢業，壓力大到心理都有問題。」雖然自己與媽媽一直有兼職，親友們亦有經濟支援，但力臻坦言當年感到無助崩潰，「好無助！亦有怨個天點解響當時帶走我爸爸，係屈出咗啲小毛病，好記得響大學宿舍打去情緒輔導電話爆喊。」畢業教書初期，力臻曾對唱歌夢死心，惟疫情期間發現父親遺物，令他追夢之火重燃，「因為疫情網課多咗響屋企，見返父母花好多錢送畀我部keyboard，又發現爸爸有隻USB儲咗好多以前我唱歌嘅片段，覺得係佢畀我一個message，所以我主動打返電話畀經理人阿Bert。成件事好快，2021年一月我打畀佢，三月就出歌。」

力臻曾對唱歌夢死心，但在疫情期間發現父親遺物，令他追夢之火重燃！

打從第一所任教學校期間出道做歌手，又或是跳槽至國際學校。力臻指每次出歌都有向校方申報並獲批，但最終至去年四月被通知不獲續約，力臻坦言最初曾受打擊，「有打擊！會諗穩定收入點算？係咪我平衡做得唔夠好？睇返轉頭，已經力臻完美，已盡力做到最好。無估計過個結果係咁，但我好清楚，總有一日我要make decision，我腦海都有諗過，只係最終邊個令你做呢個決定，要專注做好事業，好難兩邊都成功，都要取捨。」

談及採用全新創作的《Flyin' for your love 2882點85》衝出香港，登上日本國際平台「THE FIRST TAKE」，而此曲將成為力臻首支過百萬點擊的作品，力臻指歌名中的「2882.85」乃東京與香港的距離，對他別具深層意義，他說：「首先，東京係當年第一次儲到錢請父母去旅行嘅地方；其次，二千八百幾公里呢個距離，對好多香港人嚟講或者只係四個幾鐘頭機程，唔算好遠；但對於我，唔在於飛四個幾鐘機，而係我花咗幾多時間、努力，得到幾多人照顧同幸運，先至可以飛到呢程機。」

今日（9月27日），下午二時至三時於雷霆881商業一台播放的《星光背後》，主持人梁泰來邀得力臻任嘉賓。

入行50年，縱橫歌影視播、幕前幕後公認瓣瓣掂的鄭丹瑞(阿旦)今年踏入人生70之齡，快將成為外公的阿旦永不言休，更揚言活到老學到老。他今年公開拜27歲音樂鬼才陳恩碩為師，並於10月正式於港島西區新劇場推出二人合力監製的全港第二齣長壽音樂劇《小男人周記》。阿旦接受雷霆881商業一台《星光背後》專訪，憶述《小男人周記》由80年代經典廣播劇變身千萬票房電影的傳奇經過。節目中，曾三入三出商台的阿旦，自揭入行50年人生最大遺憾，他說：「人生最大遺憾係《6 PAIR半》呢張碟無我！」

鄭丹瑞入行50年，縱橫歌影視播、幕前幕後。

阿旦1978年由商台轉戰麗的電視，83年再獲邀加盟港台後，憑《小男人周記》廣播劇創出於港台的首個事業高峰，故事除了衍生一系列暢銷小說外，更於89年起被拍成三齣電影及兩齣電視劇。當年首齣《小男人》電影票房賣過千六萬，阿旦於節目披露最初本來是邵氏斟拍，演主角梁寬，亦另有其人，「最初係邵氏先，導演黃泰來話想拍《小男人周記》，到我搞好劇本畀邵氏，就諗搵人演梁寬。第一個係搵許冠傑，佢話好鍾意故仔，但就話：『我八嚿腹肌，一啲都唔小男人！』之後我搵阿倫，阿倫話好想演，但話要忙巡唱，要兩年後；我再搵最神似嘅阿Lam，阿Lam聽完故仔話：『你信我啦阿旦！係你自己做至得！』咁你即係推我啫，我無票房保證，方逸華點會肯？我都試過搵學友，學友又係忙到癲，咁成件事就停咗。」阿旦指《小男人》能拍成電影，一定要感謝當年執掌嘉禾的蔡瀾，「擺低咗件事成年，就係蔡瀾先生有一日同我食飯，話睇咗我本書，話一定要拍戲，仲話：『你做！我話得就得！』」

阿旦憶述《小男人周記》由80年代經典廣播劇變身千萬票房電影的傳奇經過。

當年首齣《小男人》雲集一眾如鄭裕玲、鍾楚紅、胡慧中、李美鳳等當紅女神參演，阿旦說：「老婆阿Ann，我哋從來諗住Do Do嚟寫，蔡生叫我搵佢，但《小男人》擺明係襯你鄭丹瑞，最初都估佢唔肯，我就嘗試喺TVB一齊做司儀嘅時候問佢，佢就話：『有錢咪得囉！哈！』鍾楚紅當時咁紅，都係好多合作過朋友一齊遊說，畀埋劇本佢睇，先至成就咁多女神襯托我呢個無名小子。」

今年阿旦70歲快將成為外公，回望入行50年創出事業多個高峰，原來亦有不少挫敗及遺憾。節目中，他坦言人生最大遺憾是來自三入三出的商業電台，他亦把經過記錄於剛推出的新書《我失敗希望你成功》中，他說：「我人生第一份工就係商台，我本來係第一代元祖『6 PAIR半』，當時就嚟浸會畢業，做緊中午節目《阿旦日記》，我做得好差，但我以為自己做得好好，到畢業麗的搵我過去同林奕華一齊做年青人節目，我就同俞琤(YT)傾想兩邊都做，點知YT話：『你連自己節目都未做好，我唔同意。』當年我年少氣盛，咪拍枱唔做商台囉，做電視喎，覺得自己叻咗喎。」

由鄭丹瑞授權，爆炸戲棚藝術總監陳恩碩包辦作曲、填詞、編劇、導演，並由二人共同監製的音樂劇《小男人周記》，於10月正式於港島西區新劇場推出。

雖然阿旦過檔麗的有份創作《天蠶變》、《天龍訣》、《IQ成熟時》等經典，但他坦承俞琤一答應他請辭已即時後悔，但最後悔還是看到商台於1980推出了一張經典唱片《6 PAIR半》，「麗的我做得好開心，但我人生最大遺憾同挫敗就係，突然之間一張《6 PAIR半》唱片橫空出世，入面點解無我？呢個係我到今日，人生嘅最大遺憾。所以到我88年返商台做二台台長，我第一時間做《叱咤新一代》嘅碟，裡面就有首《留給最愛的說話》，同埋之前喺港台，我亦第一時間做咗首《無可奉告》。呢一批歌，都係我想做返《6 PAIR半》，我要有我份呀！到今日，我仲係耿耿於懷。」三入三出商台的阿旦，最感謝人生伯樂俞琤對他的鞭撻，原來新書《我失敗希望你成功》，俞琤亦義務為他做校對，更為他親筆撰寫書中最後一章。

今日(11月29日)，下午二時至三時於雷霆881商業一台播放的《星光背後》，主持人 梁泰來邀得鄭丹瑞任嘉賓。