93年17歲參選港姐入行，曾是一代性感女神的麥家琪，於06年下嫁大律師王國豪後淡出娛圈。育有兩子一女的麥家琪，為事隔17年復出客串的港劇《我愛九龍城》接受雷霆881商業一台《星光背後》專訪。節目中，率直的麥家琪無所不談，談半百保養得宜，她直認靠醫美，「好似修一修咁，箍牙都係一樣！」談及多年沒拍劇，她坦言：「只係無人搵，啲人以為我嫁咗唔憂。」以為她會避談當年選美決賽被爆裸照大熱倒灶，她說，「啲相我仲keep喺度，全部都俾晒仔女睇！」原來，她希望以過來人身份，教育三子女別行錯自己的舊路，學懂如何保護自己。
麥家琪上《星光背後》接受主持人梁泰來訪問
麥家琪當年是新法書院校花，她坦承年輕任性，談及她中學未畢業便選港姐，她說：「真係focus唔到讀書，唔想考試，無諗名利，只想快啲離開呢個學校束縛。」93年參選期間，麥家琪一直是熱門之一，最終決賽五強不入，翌日就有周刊爆她15歲時被前男友誘騙拍下的裸照。對於當年事件轟動全城，她認同落選與事件有關，並說：「呢個經歷到而家都影響我，所以我好保護我啲小朋友，我同佢哋講晒成件事，啲相我仲keep喺度，全部都畀晒仔女睇！等佢哋知有可能發生呢啲事，就係因為我曾經任性。所以你哋點玩都得，但有啲嘢我試過，會對日後有影響，你哋要學識保護自己。」
當時還未到18歲，麥家琪稱不懂如何面對，幸得父母體諒保護，亦獲TVB給予機會簽約安排演出處境劇洗底捱過低谷。憶及當時背負新聞入行，她指沒想過逃避：「我必需面對，因為係自己犯嘅錯！其實我都係畀人搵笨，但無影響其他人，只係我年幼無知畀人呃。點解繼續留低？我咁想離開讀書呢個束縛，我可以去邊？係我自己放棄學業，唔通我要求出國讀書？屋企唔富裕，有三兄弟姊妹，哥哥啱啱去咗加拿大讀書，如果我再要求，爸爸媽媽會好辛苦。」
麥家琪一入行便影視兩忙，原來她至參選翌年才獲TVB簽下為期兩年的包薪經理人約，至於為何96年便決心離巢，她說：「96年後要我簽返普通藝員約，人工少咗三分之二，我就話唔簽。我就係唔忍得，如果我忍到六、七千蚊一個月，我可能忍到而家都留喺TVB，做埋甘草演員。」之後隻身勇闖影圈，麥家琪指已故的李兆基是其恩人，給與她不少電影機會，當中包括話題作，麥家琪剃光頭主演的《龍虎砵蘭街》。問為何多年來不找經理人合作，麥家琪大爆鮮為人知的際遇，「有offer，但全部都要我脫，譬如要我拍三部脫戲就簽你，話會打成你好似邊個邊個咁，但我唔係想要呢啲，我唔想麥家琪打敗麥家琪！我咁辛苦入電視台幾年，就係想大家知，當時嘅新聞唔係我策劃，我真係畀人陷害，事隔三年仲要我食住條水去拍嗰啲戲，我咪變咗大家諗嗰啲人？做人要有價值，剃光頭有發揮就有價值。96年我仲算新人，嚿錢有幾多？壓得就壓啦！仲畀我93年出嚟撩我拍三級片仲少一半。」原來早於93年選完港姐後，已有片商高價利誘麥家琪拍三級片，但她不為所動，「當年已經有人叫我唔好簽TVB出嚟拍戲，嗰時風月片咁hit，係畀成過百萬，我係不為所動，因為件事唔係我想咁發生！」至於從未全裸或 露點拍戲就被外間標籤成三級片女星，她淡淡的說：「唔無奈！邊個叫我細個任性呢？」
42歲的陳柏宇（Jason）今日（11月1日）為今年第五首派台歌、首次掛帥有份監製的《不愛無壞》接受雷霆881商業一台《星光背後》主持人梁泰來專訪。
陳柏宇接受梁泰來專訪。
入行19年的Jason曾兩度登上紅館，先後三次於叱咤頒獎禮摘下男歌手銀獎（2016、2017及2019），以及一次我最喜愛男歌手（2017）。Jason曾揚言從不想大紅大紫，惟樂迷一直替他不值，2016年先於網上推他成「樂壇隱世歌手」；今年臨近頒獎禮，網上又再掀「關於陳柏宇與男金的距離」討論。2017年與太太符曉薇（Leanne）結婚，先後育有兩名七歲及兩歲愛女的Jason於節目中除了大談成為父親的轉變外，亦分享他對獎項成績與不渴望大紅大紫的心態，他說：「大紅大紫就要有犧牲，在我人生當中，最在乎唔係事業，事業只係第三位。」
陳柏宇日前推出今年第五首派台歌《不愛無壞》。
年初開會展騷前，Jason曾公開訂下2025目標「向男金出發」，外間以為向來佛系的他終重拾鬥心，今天Jason說：「點解當日咁講？只想畀個目標自己，睇吓自己工作心態會點，邊有話一定攞到？」十九年來，Jason承認也有過緊張頒獎禮的階段，「入行頭嗰六、七年，對攞唔攞到獎感受會重啲，之後慢慢放低。因為明白件事唔係自己可以控制，知道每年我嘅成績，唔係單純我每年畀左幾多心機落去做音樂就可以決定。假設我每年付出一樣，某啲年份成績好啲，某啲年份無咁好，就唔係單止我點去做嗰件事，係有好多外來因素，既然件事Majority嚟自外來因素，唔輪到我可以控制，就唔去過份思考。」
《不愛無壞》MV圖片
對於「樂壇隱世歌手」，事隔多年再有網民討論「關於陳柏宇與男金的距離」，Jason說：「我無留意，音樂係好Objective，每個人聽都有唔同感覺，無話我花咗幾多心機喺音樂，就應該攞乜嘢獎，要明白遊戲唔係咁玩。」
《不愛無壞》MV圖片
問過往三次奪銀獎，有那一次感覺與「男金」擦身而過？Jason笑說：「吓？三次咁多？我以為得兩年咋！講真，無覺得邊年應該係我，對我嚟講，有已經好巴閉。喺我心目中，無論係金銀銅，有得上台已經過癮啦，已經係開心事，因為攞第四無人知。」Jason也不認外間指他的成績與其公司宣傳不力有關，「樂迷咁睇我都無法，有時唔係我哋宣傳唔夠，只係有人更加紅攞到更多曝光。當有好新聞發生，我嘅唔夠大，咪睇唔到囉，唔關我亦唔關公司事。」
《不愛無壞》MV圖片
新聞價值與藝人當紅程度掛鉤，但Jason於節目中再坦承從不想大紅大紫，Jason說：「大紅大紫就要有犧牲，在我人生當中，最在乎唔係事業，事業只係第三位。當你大紅大紫，你嘅工作量越多，私人時間就越嚟越少。我係咁諗，當我將來老咗，再睇返我人生嘅成就，第一樣嘢並唔係睇我事業，而係睇我家庭，係我兩個女同太太。」
陳柏宇一家四口
成為爸爸之後的Jason，緊張家庭多於一切，但並不表示他輕視唱歌，他亦坦言近年感受到何謂長江後浪推前浪，「唔會無壓力，但亦都屬於我控制唔到嘅事，我都係喜歡默默耕耘嗰一批，我又唔識點搶Fo，我又唔識去爭任何嘢，我只能運用我做歌手嘅堅持。」所以，即使唱功認好的「隱世歌手」Jason於疫情開始重新拜師學唱歌，「因為唔知點前進，學唱歌先至知自己有好多不足，而家係比以前好，但仲有好遠距離先至到我認為叻嘅水平。」
陳柏宇一家四口
