星光背後｜Delta T圓夢出碟揭星途 感激軒仔賞識 為193平反Auto-Tune誤解

先為ERROR成員做歌，繼而獲張敬軒及古巨基賞識邀請合作為人認識的全能音樂人Delta T（蛋撻頭），為歷時五載圓夢推出的實體雙CD專輯《INNER-SELF》及《OUTER-SELF》接受雷霆881商業一台《星光背後》專訪。Delta T 五年前以獨立歌手身份出道，其實他早於唸大學時已與友人組成「清晨樂團」並參與不少歌唱比賽追夢逾15年。節目中，Delta T除了大談他儲錢裸辭入行、網上自學曲詞編監？打碟成就出碟及首次開騷的心願外，還大談被張敬軒及古巨基賞識經過，與及監製保錡及193(郭嘉駿)歌曲的趣事，對於193錄歌被評倚賴Auto-Tune(自動調諧)，身為監製的Delta T說：「如果要執走音，根本唔使用Auto-Tune！」

Delta T歷時五載圓夢推出的實體雙CD專輯《INNER-SELF》及《OUTER-SELF》。

Delta T於2020年以獨立歌手出道前，早已將作品放上網，最早找他合作的圈中歌手，是ERROR的吳保錡，他說：「係無啦啦保錡有日DM我搵我合作，任何一個搵我嘅人我都無諗過，梗係好，起碼佢入咗行，我唔放過任何機會畀大家認識我。」Delta T讚保錡是行動派，不會拖延時間，至於保錡經常撞板，他說：「哈！佢衝動嘅，所以亦都正常。」

Delta T 將於2025年10月16日在留白Livehouse舉行他入行五年來的首個個人音樂會《純愛夜SHOW》。

透過保錡，Delta T亦成為193的好友與監製，他認同193本身不是科班出身的歌手，但他指193有其聲音特質，「每個歌手都有優缺點，監製就要將歌手優點放大。其實193有一把好滑、好溫柔同好輕嘅聲線，所以無論係幫佢寫歌或錄歌，就應該去放大呢樣嘢。」對於193的作品被評過度倚賴Auto-Tune，Delta T重申，「坊間hater真係唔熟Auto-Tune，如果要執走音，根本唔使用Auto-Tune！有另一個軟件可以執到好自然而且無Auto-Tune嘅感覺，用Auto-Tune反而花更多功夫。Auto-Tune其實係一個效果選擇，究竟我哋想唔想要一個唔自然同啲人聲平晒的效果？唔同歌手，有人適合，有人唔適合，譬如我同林智樂試玩歌，佢把聲好細膩就唔適合落Auto-Tune，而193本身把聲偏向滑，落Auto-Tune就再滑啲。」合作數年，Delta T亦見證193轉變，「佢變化好大，我第一次同佢錄係《再次PuppyLove》，我咁講好衰，佢當時已經處於一個唔想亂咁唱階段，最初佢係有少少亂咁唱感覺。到一兩年後再同佢錄，就覺得『嘩！你唱得好咗咁多！』佢話：『我而家有學唱歌嘛！』真係唔同晒，以前我係要求佢唱到首歌，而家係我要求佢點唱好首歌。」

為193平反。

Delta T感激張敬軒賞識。

2021年，張敬軒邀請Delta T為其一曲《Sweet Escape》撰寫歌詞，亦因軒仔推介令Delta T開始為人認識，Delta T視軒仔為恩人，也估不到自己一首玩味作《通心粉》會被神級歌星留意，「非常感謝張敬軒，我正式入到行，同佢有最大關係！又係最初收到佢嘅電話，我仲以為係騙徒。去到今時今日，如果件事唔係發生自己身上，我都唔信，係唔會信佢會留意《通心粉》呢首歌。因為呢首歌冇嚟正經，同佢出啲歌完全唔同。佢話要我寫《Sweet Escape》，仲話目標要『少少鹹多多趣』！竟然佢有咁嘅諗法，好！我就同你寫！當佢睇到啲歌詞，仲話我係鹹濕仔！」合作此曲後，Delta T感謝軒仔不時邀他分享作品，令他獲益良多，他亦大讚軒仔與古巨基都是敢於嘗試的神級歌手，「我諗正正因為佢哋肯試新嘢，就能夠上位，對我係好好嘅榜樣！」

今日（10月11日），下午二時至三時於雷霆881商業一台播放的《星光背後》，主持人梁泰來邀得Delta T任嘉賓。

1985年15歲參加《歡樂今宵》模仿葉蒨文大賽入行的陳松伶(松松)，91年憑《天涯歌女》一劇飾演金嗓子周璇爆紅全港，唱片更大賣六白金。惟松松的半生儼如周璇般坎坷，因堅持學業與家人爆出誤會，導致不相往來20年。之後又與長期工作夥伴反目，最終身無分文離港。慶幸松松於05年在上海拍劇認識比她少9歲的內地演員張鐸，令這位天涯歌女定居北京不再漂泊。陳松伶為40周年企劃推出新歌《松伶》，並接受雷霆881商業一台《星光背後》專訪。節目中，松松憶述半生受盡打擊，曾跌入情緒低谷，慶幸認識老公重整人生，明白人生的苦難都是花開有時。

陳松伶憑《天涯歌女》爆紅，卻因學業與家人誤會決裂，更曾與工作夥伴反目，一度身無分文離港。

松松直認由陳少琪填詞的《松伶》如同她的自傳，當中一句「人未長高，已看懂人生」就像當年在家貧的情況下要邊讀書邊拍劇以幫補家計。松松與家人之間產生誤會多年，有指與她當年拒絕放棄學業有關，問她年輕時為何如此堅持讀書，她說：「唱歌拍戲都係被人安排，唔係由我控制。但讀書我可以主導，努力讀就考得好。」與家人誤會多年後，松松再與合作多年的工作夥伴反目，爆出是非，促使她心淡離港。「二零零幾年出咗啲事，我係心灰意冷，成個人失去重心，總之我想離開呢個是非地，當時好混亂，覺得自己嘅無能，但我都要生活，就去上海拍劇，亦喺上海認識我先生。」未認識老公及未與家人和好如初前，松松感謝今天的經理人陳淑芬於05年最黑暗期間向她伸出援手，給予她工作機會。「爸爸同外公先後在05、06年去世，嗰時我最崩潰。好彩《雪狼湖》喺國內巡演，陳太叫我幫手，期間我無返過香港，唔需要接觸傳媒可以休息。陳太的確係扶起我嘅人，佢其實知道我發生咗咩事，但從未問過，我亦一句都無講。總之發生了一啲事，佢一直俾咗一個空間我，令我仲可以有收入支撐自己，我唔會喺佢面前講，但佢呢40年來一直係我嘅恩人，我哋心知肚明。」

陳松伶將於2月28日在伊利沙伯體育館舉行演唱會。

陳松伶婚前檢查發現無法生育，曾主動退讓，老公卻堅定選擇共度餘生，令她感動稱幸遇良伴。

當年松松跟不少還未爆紅的男神，包括黎明、鄭伊健、古天樂、張智霖等合作，之後他們個個彈起，問她為何不曾仰慕過對手，她回答：「當時佢哋個個都有女朋友嘛。」至於06年能在上海與老公張鐸合作內地劇《血未冷》修成正果，松松說：「最重要係佢單身。擦出火花係套劇快拍完時，我一直以為佢年紀比我大，當我知佢細我九年，基本上我就話算啦，唔好啦，反正又未真正有深感情，但佢鍥而不捨地跟我話：『未試過，點知？』當我哋相處幾年後，係OK，佢用行動證明佢所講，佢比我更冷靜，可以梳理我情緒，講出我嘅問題。我亦唔係要對方完全聽我話嗰種人，而佢亦需要我呢種女朋友。」

松松指二人於07年開始拍拖，她用了4年時間觀察及磨合這段文化差異很大的關係是否適合更進一步結婚。「佢極北方，我係印尼華僑極南，譬如佢成日講『胡說』我都以為佢鬧我，但只不過係口頭禪。」至於夫妻二人曾否計劃生下一代，她說：「有呀！梗係想啦！但當我哋準備結婚做婚前檢查，就發現我係唔可以生小朋友。」松松直認這亦是她作為人妻的一個遺憾，「會係一個遺憾，當時一知結果，我已經同佢講，你仲有好多選擇。係！我又第二次落閘，因為都要為佢著想，但佢話：『我就係要我哋結婚。』之後甚至話：『我都可以唔鍾意小朋友！』哈！其實佢都鍾意小朋友，我真係覺得我識到一個好好嘅伴侶。」

陳松伶接受《星光背後》節目主持梁泰來訪問。