「之前明明可以一覺瞓天光，點解八個月大突然半夜起身喊幾次？」如果你正面對緊呢個情況，恭喜你，你遇到咗「睡眠倒退」現象。

點解會出現倒退？
八個月大係一個重大嘅發展關口。BB開始學識坐、學識爬，甚至開始扶住企，大腦不停咁運轉，就算瞓覺都停唔到。另外，分離焦慮喺呢個時期達到高峰，BB半夜扎醒發現媽媽唔喺身邊，就會驚到喊出嚟。

加固期嘅睡眠迷思
好多媽媽以為「俾多少少粥仔佢食，飽啲就瞓得好啲」。其實，食得太飽反而會引起腸胃不適，令睡眠質素更差。如果BB因為加固而便便唔暢順，肚仔唔舒服，一樣會瞓得唔好。

應對睡眠倒退五大法寶
1. 堅持日間常規
就算夜晚幾攰，日頭都要盡量維持固定嘅小睡時間同遊戲時間。規律嘅生活節奏，會俾到BB安全感。

2. 加大日間活動量
八個月大BB精力旺盛，日頭盡情俾佢爬、俾佢探索。放足電，夜晚自然容易入眠。

3. 檢視睡前儀式
睡前半小時，應該進入「冷靜模式」。避免玩得太瘋癲，可以改為靜態嘅親子共讀、按摩，或者唱搖籃曲，等BB知道「係時候要瞓覺」。

4. 畀機會佢學習自我安撫
如果BB半夜喊，唔好即刻沖入去抱佢。等幾分鐘，觀察下佢係咪可以自己再瞓返。如果喊得好犀利，可以入去輕拍佢，用溫柔嘅聲音話「媽媽喺度，瞓覺喇」，但千祈唔好抱佢出嚟玩，否則會強化佢「半夜有得玩」嘅錯誤觀念。

5. 引入「過渡物品」
八個月大可以開始嘗試引入「安撫物」，例如一條細細嘅毛巾仔或者一隻公仔，等BB喺媽媽唔喺身邊嘅時候，都可以攬住獲得安全感。

睡眠倒退只係短暫嘅過渡期，通常維持2-6個星期就會過去。媽媽們要好好照顧自己，日頭趁BB小睡時，爭取時間休息，先有精力應付夜晚嘅挑戰。




Mama Log

** 博客文章文責自負,不代表本公司立場 **