人仔細細就話有壓力？拆解BB的「分離焦慮」同「陌生人焦慮」

你有冇發覺，以前邊個抱都得嘅BB，踏入八個月左右突然「認人」認得好緊要，一見陌生人就喊，甚至媽媽行開一步都唔得？呢個唔係BB「扭計」或者「怕醜」，而係佢認知發展嘅重要里程碑——「分離焦慮」同「陌生人焦慮」出現喇。

點解會有呢個階段？

八個月大嘅BB開始明白「物體永存」嘅概念，即係知道就算見唔到媽媽，媽媽都仲存在。但佢嘅時間概念仲未發展好，唔知媽媽「一陣」會返嚟，所以當媽媽離開視線範圍，佢會以為媽媽永遠消失，因而感到極度不安。

點樣同BB安穩度過？

玩「躲貓貓」遊戲：用毛巾遮住自己塊面，然後突然出現，同BB講「媽媽喺度！」，等佢明白「消失」等同「會再出現」。

短暫練習分離：由短時間開始，例如行開一分鐘去斟水，一邊行一邊同BB講話：「媽媽去斟水，即刻返嚟㗎。」等你返到嚟，可以開心咁同佢講：「你睇，媽媽返咗嚟啦！」慢慢拉長分離時間。
引入「過渡物品」：一條有你味道嘅紗巾、一個你成日攬嘅公仔，可以喺你唔喺身邊時俾到BB安全感。

唔好偷偷摸摸走：以為靜雞雞走咗BB唔覺就最好？錯喇！咁樣只會令BB更加警覺，成日驚你突然消失。每次都應該好好咁同佢道別，雖然佢可能會喊，但呢個係建立信任嘅過程。

Mama Log

** 博客文章文責自負,不代表本公司立場 **

為咗引BB乖乖沖涼，好多媽媽都會買沐浴球，貪佢哋遇水會融化，仲會彈出小禮物，令沖涼時間變得有趣。但消委會早前測試揭示，呢啲「驚喜」分分鐘係「驚嚇」！

消委會測試咗市面上17款沐浴球樣本，發現8款附有小禮物，當中有5款完全冇標示安全警告字句，包括冇標明「不適合3歲以下兒童使用」或「窒息危險」等警告。

問題係，呢啲小禮物全部含有細小部件，溶解後先會浮現。如果家長唔為意，俾年幼子女隨便把玩，一旦放入口誤吞，足以造成窒息致命！

仲有，消委會喺9款沐浴球中檢出香料致敏物質，其中兩款檢出嘅苯甲酸苄酯濃度分別達0.024%和0.36%，但產品包裝上完全冇標示。雖然沐浴球嘅香料濃度會被洗澡水稀釋，但小朋友可能會喺浴缸玩一段較長時間，身體大面積接觸沐浴球溶液，增加致敏風險。

媽媽選購貼士：

留意警告字句：購買時一定要睇清楚包裝有冇標明適用年齡同安全警告，揀有中英雙語標示嘅產品較穩陣。

避免3歲以下使用：如果BB仲細，最好完全避免用呢類附有細小組件嘅沐浴球。
家長全程陪同：就算用，都一定要陪住小朋友沖涼，留意小禮物有冇被放入口。
留意稀釋指示：揀有說明「應於多少升水中稀釋」嘅產品，可以減低香料濃度。
沖涼本應係開心時刻，唔好因為一時方便，令BB暴露於風險之中。