陳健安Nowhere Boys歌迷會聯合BBQ聚會 安仔送驚喜全場睇歌曲首播 即興表演似開騷

陳健安的歌迷會「本原族」與樂隊Nowhere Boys的歌迷會「Nowhere Boys & Girls」，日前在大埔的燒烤場舉行「2026圍爐BBQ暨Fans Gathering」，這是第二次聯合party，他們與本地及世界各地過百Fans玩遊戲、抽獎和燒雞翼比賽。去年Nowhere Boys主音Van全程煮私房菜給Fans，今年放下鑊鏟，專心享受被Fans餵食。當眾人專心BBQ時，安仔突然驚喜宣布《流星劃過富士山》演唱會版MV 在YouTube首播，全場尖叫並一同倒數，欣賞自己與安仔在片中大銀幕出現的美好回憶。安仔更即興伴唱走勻全場握手，連場外客人亦變成Fans，一起揮手吶喊，彷彿「穿越」年初演唱會現場，非常熱鬧。

陳健安的歌迷會「本原族」與Nowhere Boys的歌迷會「Nowhere Boys & Girls」，日前在大埔燒烤場舉行第二次聯合BBQ派對，過百粉絲參與。

眾人玩遊戲、抽獎、燒雞翼比賽，氣氛熱鬧。

安仔說：「今日真係好開心，見到有啲Fans第一次嚟，同唔相識嘅圍埋一爐，眼神尷尷尬尬。」他喜見Fans之間建立友誼，相約食飯、唱K、搞應援。其中有一枱Fans因為安仔新歌《梨子》製作梨子頭飾，安仔亦玩埋一份。他說：「好開心因為我哋嘅音樂，令佢哋連埋一齊。」Van說：「因為佢哋鍾意我哋嘅音樂，都係同一個energy 。上年聚會我掛住專心煮嘢畀大家食，同Fans之間隔住幾個煲，無機會傾偈。今年我決定打破隔膜，唔煮嘢食，逐張枱坐埋去同Fans傾偈、一齊BBQ，感覺好溫暖，好開心！最神奇係作為樂隊，Fans通常嚟睇我哋開騷唱歌，但今日冇表演只有BBQ，佢哋都肯嚟一齊玩，我哋關係已經變成朋友！」

安仔突然驚喜宣布《流星劃過富士山》演唱會版MV在YouTube首播，全場倒數尖叫。

他更即興伴唱走勻全場握手，連場外客人也變成粉絲，彷彿重現年初演唱會現場。

安仔悉心安排這晚在YouTube 首播演唱會版《流星劃過富士山》，因為片中的演唱會舞台上大銀幕，播放大量他和fans的合照，與BBQ現場氣氛互相呼應。他說：「呢首歌係我翻唱少爺占隊band『YEAHS』嘅作品，係講人與人之間嘅緣份，好難先至會遇上，好似我同你哋或者同歌迷之間，經歷過好多嘢至會遇到。咁啱今日BBQ現場音響又播到，支咪又幾好聲，我喺上面疊住唱，突然變咗演唱會咁，氣氛非常好。」Van表示希望舉辦郊野音樂會，與Fans一齊露營，由夜晚玩到天光。

Nowhere Boys主音Van今年放下鑊鏟，逐枱與粉絲傾偈BBQ，感覺溫暖。

安仔感動表示：「好開心因為我哋嘅音樂，令佢哋連埋一齊。」

鼓手Nate今年第一次參與BBQ聚會，被發現捧住一大疊格仔餅密密燒，原來他誤食fans的格仔餅，所以親手燒去氹fans作為補償，果然寵粉。而低音結他手Hansun自爆鍾情「獨食」，說：「平時我真係好鍾意一個人打邊爐同埋燒肉，如果見到我一個人出沒呢啲餐廳，唔需要驚訝！不過今日咁多人一齊BBQ好開心、好溫暖，我個心都融化咗，人係要有啲群體活動。」琴鍵手漁佬笑言：「夾咗咁多年band，我都係啱啱先知Hansun鍾意一個人打邊爐。」至於結他手Ken是素食者，Fans擔心他不夠飽，不停為他煮各色各樣蔬菜，令他感到好幸福。

樂隊Nowhere Boys 新歌《離家出走》MV昨晚（11月5日）YouTube 上架，今次MV在大廈天台拍攝，畏高的結他手Ken嚇到面青，主音Van笑指第一次見到平時在舞台上跳跳紮的Ken變得乖巧，動也不動，非常搞笑。而今次新歌是Nowhere Boys在「寰亞音樂」告別作，即將約滿離巢後出外闖，Van最難忘與偶像鄭伊健合唱和到新加坡演出。

樂隊Nowhere Boys新歌《離家出走》MV昨晚（5日）上架，在大廈天台拍攝，畏高的結他手Ken嚇到面青動也不動，主音Van笑指第一次見他彈結他如此斯文。

Van笑言自己面無血色：「正午時候，我哋喺天台拍攝新歌MV，烈日當空下拍咗幾個鐘頭，好曬好曬，希望觀眾感受到我哋嘅熱情和熱血！我第一次見Ken彈結他咁斯文。」Ken哈哈大笑說：「我第一次覺得支結他咁重，成個人郁唔到！」Van說：「剛才有一下我跳起，佢嚇到大叫『冧呀』、『震啦』！」Ken自言非常畏高，甚至在拍攝前有「縮沙」念頭，他還拉埋琴鍵手「漁佬」落水，笑對方驚到汗流浹背，「漁佬」解釋：「我唔係驚跌落去，係要避開佢啲結他，令我有『怯』嘅感覺。」身旁的低音結他手Hansun 點頭認同。而MV中飾演「離家出走」的16歲少年阿銘，獲MV導演Oscar 和Van大讚演技到位，外形充滿少年感。

新歌《離家出走》Nowhere Boys包辦作曲、填詞、編曲和監製，填詞的Van說：「過往Nowhere Boys作品通常由『漁佬』或者Oscar填詞，今次由我寫，因為好有feel。內容描述由細到大好多想做嘅事，因為身邊環境令我做唔到，有一刻幻想自己可以脫離，勇闖出面嘅世界，去做自己鍾意做嘅嘢。例如我，曾經有啲朋友覺得我明明有份工，點解要去夾band搞音樂？好多不鼓勵嘅說話，甚至推倒或打擊我自信。然後我就學識要搵一啲啱能量、啱頻率嘅朋友，篩走唔好嘅energy。」他強調並非不理家庭、拋下父母的「離家出走」，而是內心解脫束縛，勇敢衝出去。

新歌由樂隊包辦曲詞編監，是告別寰亞音樂前最後作品，即將約滿離巢出外闖。

Van最難忘與偶像鄭伊健合唱及到新加坡演出，又指填詞靈感來自追夢路上被質疑，籲大家找對能量與頻率的朋友。

這首歌亦是Nowhere Boys告別唱片公司前最後一首作品，Van：「寰亞所有師兄弟姊妹都係好朋友，我哋都好珍惜每一位，大家好似一家人，我哋即使離開呢間公司，關係仍然好close，所有同事都一樣，將來搞騷一定請大家嚟玩，我哋已經係一家人。」Ken說：「每一次宣傳項目都令我好震撼，大公司多資源，最重要係有一班人好認真做每件事，公司所有人都好用心幫Nowhere Boys！」Hansun最難忘與鄭伊健在新加坡同台演出，他說：「真係大開眼界，可以留芳百世，將來同阿女有排講。」

MV中飾演「離家出走」16歲少年阿銘的演員，獲導演Oscar及Van大讚演技到位、外形充滿少年感。

Ken說：「有時喺頒獎禮後台，我會諗我最初諗住夾band，只要有表演就好開心，點解會去到頒獎禮？過緊細細個睇電視見到嗰啲Rock Star嘅生活，好感激公司。」Van補充：「令我哋有做Artist感覺，畢生難忘！一生人有幾多機會有呢啲經驗？我哋完成咗，嚟緊行我哋自己嘅路。」 鼓手Nate坦言：「我無諗過會成為一個咁多演出機會嘅樂手，每次演出大型商演我都好驚嘆，我知自己一個人係做唔到，所以好感恩。」

他們承諾將來作為獨立樂隊，繼續創作和舉辦Live Show，Van說：「嚟緊我哋心態會改變，未必出現喺頒獎典禮，但一定會不停出歌和做騷，搞唔同形式音樂會，例如小型campfire活動，繼續同歌迷保持密切聯繫。」他們揚言未來的作品和演出只會更瘋狂和無底線，Van說：「大家期待我哋變返無著衫嘅《無處遊人》，奔放嘅Nowhere Boys！」

他們承諾獨立後繼續創作及舉辦不同形式Live Show，與歌迷保持密切聯繫。