王維基的香港電視昨日宣布裁員207人，同時又話再申請免費電視牌照，又話司法覆核。老實講我雖然好想港視開台，但睇王維基的新聞睇到有啲悶，日又講夜又講，只有口水不見人來。
唔好介意我事後孔明去講（其實一早有此感覺），王維基早前開晒記者會炮轟通訊管理局，講到好似好惡，但實情係想撤退。睇埋昨日港視的通告，直情覺得王維基係大撤退，搞咁多大龍鳯，主題只有一個：責不在我。
小鯊開宗明義支持港視攞免費電視牌照，但係真係唔想食佢個公關套餐，特別係昨日那場戲，炒咁多人都唔打算做咯，唔做就唔做，可以話「我唔做只因一男子唔俾我做」，唔好好似而家咁一路炒人一路又話申請牌照，乜有政府招收申請咩？佢咁搞令人有個錯覺覺得佢過幾個月會開台，實情係點大家心照。王維基的手法好似劈緊友的黑社會個口一路喊打，兩隻腳一直後退。
小鯊始終唔明，港視已行到呢一步，點解唔做手機移動電視（按足通訊局話得的制式），甚至網絡電視都可以做住先，一路做一路爭。我又唔係幾明點解王維基覺得網絡電視咁無得做，死都唔肯搞。佢咁迷信免費電視，都係一種舊思維。
最後想講句，唔該王維基將「警界線」其餘咁多集放埋上網，唔好吊住大家癮啦。
臨尾想收筆時，睇到蘋果日報話維基有Plan C，搞網上購物平台，俾各戶在佢哋網站上銷售產，港視為啲客拍廣告短片，希望佢今次係搞真啦。
小鯊
** 博客文章文責自負,不代表本公司立場 **
壹傳媒日前話要節省成本5%，工會早前按4000員工推算，可能大裁員200人。蘋果老總張劍虹今日在他的專欄澄清，5%係成本支出，唔係裁員比例，佢透露計劃裁員的人數佔集團比例只係2%，加埋自然流失同凍結一些未補齊的人員名額，整年人手大約減少4至5%。另外，佢話會減紙(減少每份的頁數)去額外降低成本，估計省錢大計可以超額完成員，表現好的員工仲可能有人工加咁話。
而家仲講加薪，虹哥真係好話說盡，不如睇吓蘋果究竟會裁幾多人實際啲。壹工會之所以得出裁員人數200人，係根據壹傳媒集團年報話有4000員工、由此計減5%而得出，而沙膽虹之前已經提過，台灣壹電視已經賣咗，壹電視總員工990人，所以集團員工無咁多，只有約3000人，現在佢話裁員2%，即係大約裁60人，如果剩計香港，裁員人數會更少，可能只是30人左右，聽落無咁震撼。
不過香港現時四圍仲係人逼逼，食餐飯都要排隊，好耐無聽到裁員呢兩隻字，我估傳媒都係第一個大行業，開始要動刀殺人。不過全世界傳統媒體都不景氣，美加報紙去年廣告收入都係10幾、20%咁插，香港已經叫做好少少，但係都唔慌好景，小鯊都有啲為傳媒朋友擔心。
今次蘋果大鑼大鼓話裁員，老實就夠老實啦，不過就令到報業人心惶惶，蘋果開咗第一刀，唔知邊張報紙要開第二刀啦。
